“O molimau o le Toetu,” Mo Le Malosi o le Autalavou, Ape. 2023.
Sau, Mulimuli Mai ia te A’u
Eseta
O Molimau o le Toetu
O molimau o le Feagaiga Fou i le Faaola toetu e mafai ona fesoasoani ia te oe e mauaina ai foi lau oe lava molimau.
Ua Toetu o Ia, saunia e Greg Olsen
I le taeao o le Aso Sa ina ua mavae le Faasatauroina o Iesu Keriso, na sau ai Maria le Makatala i le tuugamau lea sa tuu ai Lona tino. Sa ia maua atu le maa tele, ma le mamafa ua fuli ese ma ua gaogao le tuugamau.
I lona talitonu ai ua aveeseina le tino o le Faaola, sa tagi ai Maria. Sa faalatalata atu se tasi ia te ia ma fai atu, “Funa e, se a le mea e te tagi ai?”
Sa lei iloaina e Maria le leo na tautala atu ia te ia. Sa faapea o ia o le leoleo ia o le fanua, sa ia fai mai ai, “Ta’u mai ia te a’u po o fea le mea ua e tuuina ai o ia, ona ou aveeseina lea o ia.”
“Maria,” sa tali mai le leo.
Sa vave ona iloa e Maria lē na valaau i lona igoa. O le Faaola—ua faamamaluina nei ma toetu mai! (tagai i le Ioane 20:15–16).
Na avea Maria ma tagata muamua na vaai ia Iesu Keriso ua soifua mai. Ua ta’u mai e tusitusiga paia ia i tatou e faapea, na i ai foi isi sa molimauina na Ia faatoilaloina le oti. E mafai faapefea e o latou aafiaga ona faamalosia lou faatuatua? E mafai faapefea e oe, e tusa lava pe e te lei vaai tino ia te Ia, ona molimau atu o loo soifua le Faaola?
O Soo e Toalua i Luga o le Ala i Emau
Ala i Emau, saunia e Greg Olsen
I se tasi aso, e lei leva ona mavae le Faasatauroga o Keriso, na faatasi ai le au soo e toalua na malaga atu i Emau ma se tagata ese. Sa latou talatalanoa faatasi i valoaga e uiga i le Toetu. O lenei talanoaga na faatumulia ai soo faanoanoa i le olioli.
Ina ua latou taunuu atu i Emau, sa fai atu le au soo i le tagata ese e nonofo faatasi ma i latou. I le taimi o la latou taumafataga o le afiafi, sa faamanuiaina ma laulauina atu meaai e le tagata ese. Na faafuasei lava ona iloa e le au soo le tagata ese, ae latou te lei faiatu se tala, sa mou ese atu le tagata ese. Sa latou iloaina sa i ai le Faaola faatasi ma i latou i le taimi atoa!
“E lei mu ea o ta loto i totonu ia i ta’ua?” sa la fesili atu ai i le tasi ma le isi. Sa faamautu mai e le Agaga o Iesu moni lava sa faatasi ma i la’ua (tagai Luka 24:13–34).
O Aposetolo e Toasefulu
Na faaali atu Iesu Keriso i Ana Aposetolo e toa 10 a o latou talanoa e uiga i molimau sa latou faalogo i ai e faatatau i Lona Toetu.
“Ia outou manuia,” na Ia fetalai atu ai. “Ia outou vaavaai mai i o’u lima ma o’u vae, aua o a’u lava lenei; ia outou tagotago mai ia te au, ma ia vaavaai mai; aua o le agaga e leai sona aano ma ni ivi, pei o a’u nei ua outou vaavaai i ai” (Luka 24:36, 39). Sa vaai ma lagonaina e Aposetolo taitasi lima ma vae o le Faaola o i ai ma’ila o fao.
O Le Aposetolo o Toma
O Toma Masalosalo, na saunia e Carl Heinrich Bloch
Sa lei i ai Tomasi iina ina ua faaali atu le Faaola i isi Aposetolo. Sa le talitonu o ia ua toetu moni lava Iesu. Sa ia fai mai, “Afai ou te le vaai atu i ona lima, i mea na tutui ai fao, … ou te le talia lava” (Ioane 20:25).
Ina ua mavae aso e valu, sa toe faaali atu Iesu i Aposetolo. O le taimi lea sa i ai iina Toma ma sa ia talitonu. “Ua fetalai atu Iesu ia te ia, Toma e, ua e talitonu, aua ua e vaai mai ia te a’u. Amuia o e le vaai mai, a e talitonu mai pea” (tagai i le Ioane 20:26–29).
Mauaina o Lau Lava Molimau
Na faaali atu Iesu Keriso i isi ina ua mavae Lona Toetu (tagai i le Mataio 28:9–10; Galuega 9:4–8; 1 Korinito 15:6). E ui atonu e te le vaai ia te Ia e pei ona latou vaai, ae e mafai lava ona avea oe o se molimau.
Sa fesili le Faaola i Ona soo, “Pe se a le upu a tagata ia te au le Atalii o le tagata, poo ai?” Sa latou tali atu, “O le upu a isi, o oe o Ioane le Papatiso … po o se tasi o le au perofeta.”
Ona fetalai atu lea o Iesu, “Ao outou, pe se a la outou upu ia te au, po o ai?”
Ona tali mai lea o Peteru, “O oe o le Keriso, o le Alo o le Atua soifua.”
“Amuia oe,” na fetalai atu ai Iesu ia Peteru. “Aua e le se tagata na ia faaali atu ia te oe, a o lo’u Tama o i le lagi” (Mataio 16:13–17).
Sa tulai Iesu i luma o Peteru. Sa tele ina savavali ma talanoa Peteru faatasi ma Ia ma vaai i le tele o Ana vavega, ae e lei tuuina atu e na mea ia Peteru sana molimau. Sa faailoa mai e Iesu o le molimau a Peteru na faaalia i ai e lo tatou Tama oi le Lagi. Sa ia aoao mai foi o lena molimau e sili atu ona mautinoa nai lo le vaai atu i ai i o tatou mata.
E tusa lava pe aunoa ma le vaai tino ia Iesu Keriso, e mafai lava ona e saili atu ia te Ia ma aoao atili e uiga ia te Ia. E mafai ona e faaali atu lou faatuatua ia te Ia e ala i le tausia o Ana poloaiga. E mafai e le Agaga ona pa’i atu i lou agaga ma tuu atu ia te oe se molimau. E pei lava o i latou na vaai moni i le Faaola toetu, e mafai foi ona e tu ma molimau atu o loo soifua o Ia, e alofa ia i tatou, ma e i ai pea iina mo i tatou i aso nei.
E Le o Iinei o Ia,, saunia e Walter Rane