“Faamoemoega o Jonalin mo le Malumalu,” Mo le Malosi o le Autalavou, Ape. 2023.
Faamoemoega o Jonalin mo le Malumalu
Sa le’i fiafia tele Jonalin e pei o le fiafia o isi i le oo mai ai o se malumalu i Amerika Samoa—seia oo ina talosagaina o ia e lauga i le suatiaina o le eleele.
Ata na pueina e Sam Solaita
I se tasi aso, na maua ai e Jonalin Y. se valaau mai i le telefoni e lei faamoemoeina.
Ua tu lata le suatiaina o le eleele mo le Malumalu o Pago Pago Amerika Samoa, ma sa talosagaina e taitai eria ia Jonalin e 16 tausaga e faasoa atu lana molimau i le malumalu i le taimi o le sauniga o le suatiaina o le eleele. Ae sa tasi lava le faafitauli. E le’i alu lava Jonalin i se malumalu. Sa manao lava o ia e alu ina ia faamau i lona aiga, ae na te lei iloaina pe o le a tupu lena mea i se taimi lata mai.
“Ina ua latou faasilasila mai o le a fausia le malumalu iinei, sa ou le fiafia pe naunauta’i iai e pei o isi tagata uma,” o le tala lea a Jonalin. “Sa ou manatu e leai se mea o le a fiafia ai fua, aua o lo’u tama o se tagata e le auai i le ekalesia ma e le mafai ona sau o ia ma i matou i totonu o le malumalu. O le a le suia e se malumalu le mea moni o le le faamauina o lo’u aiga.”
O le aiga o le tina o Jonalin ua leva ona auai i Le Ekalesia a Iesu Keriso o le Au Paia o Aso e Gata Ai mo le tele o augatupulaga. Sa aoaoina o ia ma ona tei e toa fa e lona tina i le talalelei a Iesu Keriso, ma sa papatisoina i latou i le atoa ai o le valu o o latou tausaga. Ae sa filifili lona tama e le avea o ia ma tagata auai o le ekalesia.
Mo se taimi umi o lo o mafai e Jonalina ona manatua, sa taumafai lona aiga e fesoasoani i lona tama ia liua i le talalelei a Iesu Keriso. O ia ma lona tina, o uso e toatolu, ma lona tuagane sa o latou valaaulia o ia i le lotu, ma e masani lava ona sau pe afai e le faigaluega. E fai foi a latou afiafi faaleaiga ma valaaulia o ia i gaoioiga a le Ekalesia. E le mafaitaulia faifeautalai na savavali mai i lo latou faitotoa, ae e lei filifili lava le tama o Jonalin e agai i luma i le talalelei.
Ona o lenei mea, sa le mautonu ai Jonalin i le talosagaina o ia e talanoa e uiga i le malumalu. Sa foliga mai sa sili atu le fiafia o ana uo uma e uiga i le malumalu nai lo ia ma sa le mafai ona faatali e o atu iina ma o latou aiga atoa. “Ou te manatua lo’u mafaufau faapea, ‘O au o le teine o lona tamā e le lotu. Aisea ua tupu ai ia te au?” Fai mai ai Jonalin.
O Se Suiga o le Loto
E lei umi ae amata ona suia lagona o Jonalin e uiga i le malumalu. “O le mea na suia ai lo’u loto o le filifilia lea e faasoa atu la’u molimau,” o lana tala lea. “Sa pei o le ala lea a le Atua e fesoasoani ai ia te au ia iloa o le malumalu o se faamanuiaga. Sa ou iloaina o Lana ala lea e faatoafilemu ai lou loto masalosalo.”
“Na ou faalogo o le malumalu e manaia, e filemu,” o lana tala lea. “Ou te matuai fia lagonaina lava lena mea mo au lava ia. O le saunia e faasoa atu la’u molimau na tuuina mai ai ia te a’u le avanoa e mafaufau ai e uiga i le ofoofogia o le i ai o se malumalu e fausia latalata mai i lo’u aiga. Ma na aumaia ai ia te a’u se faamoemoe o le a i ai se aso, e tusa ai ma le taimi a le Atua, o le a faamauina ai lo’u aiga i le malumalu.”
Ua faia e Jonalin le mea sili na te mafaia e faalagolago ai i le taimi a le Atua nai lo ia lava. “E galue le Atua i auala faalilolilo,” o lana tala lea. “Sa Ia iloa le taimi sa’o e fausia ai se malumalu i Amerika Samoa, o se taimi ua faanoanoa ai tagata uma ona o le faama’i oti, o se taimi ua manaomia ai le malumalu e le toatele naua, ma o se taimi na ia iloa ai lo’u faananau mo lo’u aiga ina ia faamauina. O Lana taimi o le taimi sili lea.”
Olioli i le Talalelei
O se tasi mafuaaga e manao ai Jonalin ia papatisoina lona tama ona o le avea ai o le talalelei ma se faamanuiaga i lona lava olaga. “Ou te fiafia e faaaoga aoaoga o le talalelei i le aoga, ma e matuai fesoasoani lava,” o le tala lea a Jonalin. “Ou te matua faafetai lava i le avea ai ma se tagata o le ekalesia ma ua ou fiafia lava e avea ma se vaega o lenei galuega tele ma le ofoofogia.”
E taumafai foi Jonalin e faasoa atu le olioli o le talalelei i ana uo, o le toatele o i latou o tagata o le Ekalesia. “Soo se taimi lava ou te popole ai i se mea, ou te alapo lava i le taeao ma alu atu e matamata i le lagi. O se vaifofo tele lena mea,” o lana tala lea. “O nisi taimi a o ou faia lenei mea, ou te lagona ai e tatau ona ou faamaumau ni nai faamatalaga, e pei o lesona na ou aoaoina mai le lotu. Ona ou auina atu lea o na faamatalaga i au uo i totonu o se talanoaga faavaega. E i ai sa’u uo e toatasi e le o se tagata o le ekalesia, ma o le vaai atu ia te ia o tali mai ma se loto tele—e ese le manaia, ma ou te fiafia tele i ai.”
Faamoemoe i le Lumanai
A o faasoa atu e Jonalin lona faatuatua i ana uo, o loo ia faamoemoe pea o le a i ai se aso o le a liua ai lona tama i le talalelei a Iesu Keriso. “E silasila le Atua i lo’u loto ma silafia le tele o lo’u manao ia papatisoina lo’u tama,” o lana tala lea. Ae ua ia malamalama foi ua i ai i lona tama le faitalia e filifili ai. “Sa i ai taimi na ou fesili atu ai i le Atua pe aisea lava ua faatuai ai lo’u tama. Ae o loo tumau pea le tali lava lea a le Tama Faalelagi: ia onosai. O lea la, o le a ou onosai.”
“Ou te tatalo ia i ai se aso o le a faamauina ai lo’u aiga mo le faavavau,” o le tala lea a Jonalin. “Ou te iloa le moni o le Ekalesia. Ua faamanuiaina ai lo’u olaga i le anoanoai o itu. Ou te molimau atu e faafofoga le Atua ia tatou tatalo. Ua faamanuiaina au e avea ma se vaega o Lana galuega ma o le a faaauau pea ona ola e tusa ai ma Lona finagalo.”