Ou Te Mafaia Mea Uma ia Keriso

Ua faasoa mai e le autalavou le ala na faamalosia ai e Keriso i latou e faia mea faigata (tagai i le Filipi 4:13).

E Fesoasoani o Ia ia te A’u i Taimi o Faanoanoaga

Ou te lei fia i ai i le tolauapiga a Tamaitai Talavou i le tausaga ua mavae. O le tolu vaiaso na muamua atu na maliu ai lo’u tamamatua, ma sa na ona ou manao lava ia tuuatoatasi ma alu ese mai tagata uma. E oo atu i le taimi na matou taunuu ai iina, sa ou lagona e pei sa le tatau ona ou sau.

Peitai, i le aso muamua, sa faia ai se faigalotu a le matou uarota lea o le a le galo lava ia te au. Sa saunoa ai se tasi o tamaitai talavou matua e uiga i le mauaina o le olioli. I le taimi muamua sa faasesepa solo o’u mata. E mafai faapefea ona ou maua le olioli pe afai lava e leai se mea?

Ae na ia ta’u mai se mea ou te lei mafaufau lava i ai: Pe a lagona e pei e le mafai ona tatou maua le olioli i se isi lava mea, e mafai ona tatou mauaina i le Faaola. O nisi taimi e faatumulia ai o tatou olaga faaletino i le faavauvau, faanoanoa, ita, tofotofoga, ma taua faifai pea i luga. O nisi taimi e faigata ai ona maua le olioli vagana ai ia te Ia.

E ui o aafiaga o le tolauapiga a a’u teine e lei atoatoa, ae sa ou maua lava le olioli. Sa ou mauaina e ala i le liliu atu i le Faaola—i tusitusiga paia, i le siosiomaga, ma i taimi paganoa lea e mafai ai ona ou tatalo i le Tama Faalelagi. O lenei mataupu faavae ua taitai ai a’u mai le tele o tofotofoga talu mai lena taimi. Ou te matua faafetai lava mo le malamalama o le alofa atoatoa o le Faaola e mafai ona oo mai ia i tatou e tusa lava pe tatou te lagona e leai se olioli.

Elise B., Misuri, ISA