“O Lou Faaola ma le Lumanai i Ou Luma,” Mo le Malosi o Autalavou, Ape. 2023.
O Lou Faaola ma le Lumanai i Ou Luma
Ua faia e Iesu Keriso mea lelei uma e mafai i lou lumanai iinei ma i le faavavau.
O Keriso i le Tuugamau, saunia e Albin Veselka, ua faaaogaina ma le faatagana
O loo e i ai i se taimi matagofie o le olaga. E i ai au meaaoga, faauoga, tiutetauave faaleaiga, atonu o se galuega, faapea foi isi gaoioiga ma mea e fiafia i ai e ave i ai lou taimi ma le gauai atu.
I le taimi lava e tasi, atonu e te mafaufau ai e uiga i lou lumanai:
O le a se mea o i luma atu mo oe? O le a se mea e te fia manao e ausia? O a au mea o le a faia o se galuega? O a luitau o le a feagai ma oe? O la’u tali i na ituaiga o fesili e faigofie: Ou te le iloa! E leai se tasi na te iloa tonu le mea o le a aumaia e le lumanai.
Ae ua ou iloa o loo i ai i lou lumanai le tele o avanoa matagofie mo oe e aoao ai, tuputupu ae, ma alualu i luma. Ou te fia faasoa atu ia te outou le auala e mafai ona e maua ai le mea sili i lou lumanai iinei ma iloa ai avanoa uma o lou lumanai e faavavau i le olaga a sau.
Ia Iloa Lou Lumanai Mamalu
O mea lelei uma i lou lumanai ma faamanuiaga uma e taua e faavavau ua mafai ona o le Faaola, o Iesu Keriso. E sili atu nai lo se isi lava mea, e finagalo o Ia ma le Tama Faalelagi ia te oe e filifili ia avea e faapei o i La’ua ma toe foi atu e mau faatasi ma i La’ua ma maua le ituaiga olaga ua La soifua ai.
A aunoa ma Iesu Keriso, o le a leiloa lenei avanoa mamalu. A aunoa ma Ia, o le oti o le a avea ma mutaaga. Ona o le Faaola ma Lana Togiola, o le tino ola pea—ola e faavavau—o se mea moni mo tagata uma, ma o le ola e faavavau—ola e faavavau i le afioaga o le Atua—o se avanoa lea mo i latou uma o e agavaa. O upumoni lē masuia o le talalelei toefuataiina a Iesu Keriso e mafai ona taiala ai oe i mea uma ua teuina e le Faaola mo oe i le taimi nei ma i lou lumanai.
Manatua Pe O Ai Oe
Faatasi ai ma mea uma o loo e faia i le taimi nei, aua lava nei galo po o ai oe. O oe o se atalii po o se afafine o le Atua faatasi ai ma se gafatia faalelagi e le faatapulaaina. Na oo mai lou agaga i le lalolagi i se tino faaletino. I se tulaga faatasia, o lou agaga ma le tino o se agaga ola e mafai ona oo i ai tulaga o le olaga faitino i ni auala lea semanu e le mafai ona maua (tagai i le Mataupu Faavae ma Feagaiga 88:15). O lau galuega o le tuu atu lea o lou faasinomaga moni o se atalii/afafine o le Atua e mamanuina faaiuga e te faia i le taimi nei ma le faavavau.
Malamalama i le Lumanai o Lou Agaga
Mulimuli ane o le a oo mai le taimi o le a e oti ai. O le a tuueseeseina lou tino ma lou agaga ma, i lena tulaga, “e le mafai ona maua se atoatoaga o le olioli” (Mataupu Faavae ma Feagaiga 93:34). Ae faafetai ia Iesu Keriso, o le a e toetu. E le mafai ona e taofia— o le a e toetu!
O le a toefuatai atoatoa lou tino, e le toe tuueseeseina lava mai lou agaga. Ona avea ai lea o oe ma se agaga e faavavau. Ae pe o le a agavaa ea lou agaga mo le malo selesitila? E te filifili e ala i le filifili i lenei olaga e mulimuli ia Iesu Keriso ma maua meaalofa ua Ia ofoina mai. Ua aoao mai tusitusiga paia o le a tatou “olioli i mea ua [tatou] naunau e talia.” O le faanoanoaga, o nisi o le a le “loto e olioli i mea semanu latou te maua” (Mataupu Faavae ma Feagaiga 88:32; faaopoopo le faamamafa).
O le a se mea ua e naunau e maua ma olioli ai? Pe o le a e maua ea le filemu ma le olioli lea e sau mai le saili ma le faamaoni ma mulimuli ia Iesu Keriso? Pe o le a e olioli ea i le faamoemoe o le ola e faavavau ma “ia te ia o lē na tuuina mai [lena] meaalofa”? (Mataupu Faavae ma Feagaiga 88:33). Afai o lau tali o le “Ioe!” o le a e manao e talia nei meaalofa ma isi meaalofa ua tuuina mai e Iesu Keriso ma le naunautai tele ia te oe ma i latou uma o le a taliaina i latou.
Saili Faamanuiaga o le Salamo
I lenei olaga o le a e pau atu ai i nisi taimi i faaosoosoga ma le agasala. A tupu lenei mea, e ofoina atu ma le alofa e le Faaola ia te oe le gafatia e sui ai. Ua ta’ua lena mea o le salamo. E manao Satani ia e vaai atu i le salamo o se mea le lelei e tatau ona aloese mai ai ma e manatu fefe ai atonu e leai se auala e toe foi mai ai mai le agasala. Ae e le moni lea mea.
E i ai lava i taimi uma se auala e toe foi ai. O Iesu Keriso o le ala. E le mafai lava ona e mamao ese mai ma Ia. Ua tu o Ia ma aao mafola ua sauni ma le naunautai e faamalolo, tafi esea, faamama, ma faapaia oe. A o e liliu atu i le Faaola ma faia laasaga e salamo ai, o le a e lagonaina le tele o Lona alofa ia te oe. O le a Ia faamagalo oe ma sui lou loto. Faafetai ia Iesu Keriso, e mafai ona e faia ia lelei atu ma ia lelei atili i aso taitasi!
Mauaina o le Malosi e Tumau ai e oo i le Iuga
E i ai taimi o le a e oo ai i faanoanoaga ma puapuaga. I nei taimi faigata, e mafai e le Faaola ona faamalosia oe ia tumau e oo i le iuga, e pei ona sa Ia faia.
Sa tauaveina e Iesu ma le loto malie i Ona lava luga au agasala uma ma tiga ma onosaia ou tiga ma mafatiaga uma. I na mea uma, sa le o Ia o se tagata e fiu gofie. Sa matua puapuagatia o Ia aua e alofa tele o Ia ia te oe! (tagai i le 1 Nifae 19:9–10). Sa Ia lafoai Lona soifua, ma i le tolu aso mulimuli ane, sa Ia faatoilaloina le oti ma avea ai ma tagata muamua na toetu mai.
Ona sa tumau le Faaola e oo i le iuga, ua i ai ia te Ia le mana e faamalosia ai oe. Ua Ia fetalai, “Ia outou vaavaai mai ia te au, ma tumau e oo i le iuga, ma o le a outou ola ai; aua o ia o le e tumau e oo i le iuga o le a ou tuuina atu i ai le ola faavavau” (3 Nifae 15:9).
Vaai atu i Lou Faaola
Ua ou vaaia ata o le taulelei i le lumanai. E tele naua mea tou te tulimatai atu i ai! A o e sau ia Iesu Keriso i le faatuatua, e mafai ona e agai atu i lou lumanai ma le mautinoa.
I se aso a sau, o le a e tu ai i luma o le Faaola ina ia faamasinoina. I lena taimi, o le a lofituina oe i le olioli i le i ai i Lona afioaga paia. O le a e tauivi e saili upu e faafetai atu ai ia te Ia mo Lona alofa atoatoa e le iu, ma le taulaga togiola lea ua mafai ai ona e mau faatasi ma Ia ma lou aiga e faavavau.
O Iesu Keriso o lou Faaola. Ou te valaaulia outou ia vaai atu ia te Ia ma avea o Ia ma totonugalemu o lou olaga. O le a Ia aumaia ia te oe le uiga ma le faamoemoe ma faia ia mafai mea e foliga mai e le mafai ia te oe. Faatasi ai ma Ia i ou autafa, o tulaga ua ausia ma aafiaga ofoofogia sa faa faigata ona e vaai faalemafaufau i ai, o le a avea mou i lenei taimi.
Ona o Ia, ua maua ai se lumanai matagofie ma le faagaeetia, iinei ma le olaga a sau!