“Mauaina o Tupe mo se Misiona,” Mo le Malosi o le Autalavou, Ape. 2023.
Ou Te Mafaia Mea Uma ia Keriso
Ua faasoa mai e le autalavou le ala na faamalosia ai e Keriso i latou e faia mea faigata (tagai Filipi 4:13).
Mauaina o Tupe mo se Misiona
I le taimi muamua, sa leai sou manao e auauna atu i se misiona. Sa ou manatu e tele lava nisi mea e mafai ona ou faia i lea taimi, e pei o le alu i le kolisi po o le galue malosi e faatau se taavale. Ae na ou faalogo lea i se lauga mai lo tatou perofeta, o Peresitene Russell M. Nelson, lea na ia talanoa ai e uiga i le faatuatua ma ta’ua ai le galuega faafaifeautalai. Sa ou mafaufau i le auala na ou maua ai se malamalamaaga i le talalelei ona sa filifili ni faifeautalai se toalua e auauna atu. O lea sa ou talanoa atu ai i lo’u epikopo e uiga i le alu i se misiona.
Sa ou iloa e tatau ona ou galue e totogi la’u misiona, ae o le mauaina o se galuega i le taimi o le faama’i pipisi o se tulaga faigata. I se tasi aso sa ou lagonaina le atuatuvale e uiga i le mauaina o tupe. Sa ou filifili ou te tatalo atu i le Atua. A o ou mafaufau loloto, na oo mai i lo’u mafaufau upu nei “Faatau atu fagu vai”. Sa matua malosi lena uunaiga! I Pasila, e masani ona faatau atu e tagata meaai mama po o meainu i fetaulaiga o moli taofi. Sa vave ona tele ni au fesili e uiga i le faatauina atu o vai, ae sa ou lagona le musuia e uiga i le auala e fai ai. Sa ou faia ni suesuega ma filifili ai e faatau atu le vai i se auala e sili atu ona aloa’ia.
Sa faigata ona faatau atu vai, aua sa matuai vevela lava. O le aso muamua na amata ai ona matou galulue, o se tulaga matuia sa i ai le vevela i le 100 tikeri Fahrenheit (38 tikeri Celsius) ma e matuai pala lava, ma sa le mafai ona matou nonofo umi i lalo o le faamalu ona sa tuu ai lalo a matou kula. O lena aso, sa ma galulue ai mo le lima itula e aunoa ma se malolo i le mutinitini o le la. I na itula uma sa ou mafaufau ai pea, “O lenei mea e mo la’u sini. O le a ou alu i se misiona!” I se tulaga loloto sa ou iloa lava sa faatasi le Alii ma a’u ma o le a ia puipuia au ma fesoasoani mai ia te au.
Ua na o a’u le tagata o le Ekalesia i lo’u aiga, ma o le mea e uunaia ai a’u o lo’u faatuatua lea ia Iesu Keriso. Ou te iloa e ui lava ina tuua na o au i nisi vaega, ae o loo i ai o Ia iina mo au. Ma afai tatou te faia mea ua Ia poloai mai ai, faalagolago ia te Ia, o le a Ia fesoasoani mai ia o tatou o’o atu i le mea e tatau ona tatou iai.
E ui lava atonu e tele ni afa tatou te feagai i le olaga, ou te iloa e mafai ona ou filifili e faamalosia lo’u faatuatua i puapuaga. Ua ia Iesu Keriso le mana e fesoasoani ia te au ia latalata atili atu ia te Ia ma molimauina vavega semanu ou te le molimauina lava e aunoa ma faigata. Afai ou te mulimuli ia te Ia ma salamo i a’u mea sese, o a’u osigataulaga uma o le a mo se faamoemoega tele, ma o lena mea e aumaia ia te a’u le filemu.
Ítalo O., Pasila