“Tatou O E Fagogota,” Mo Le Malosi o le Autalavou, Ape. 2023
Tatou O E Fagogota
Taiala mo au peresitene o korama ma vasega.
Ata na tusia e Jarom Vogel
O le toatele o uluai soo o Iesu Keriso sa mua’i galulue o ni faifaiva. Ina ua valaauina i latou e le Faaola, sa Ia fetalai atu, “Ina mulimuli mai ia ia te au, ou te faia oulua ma fai faiva i tagata” (Mataio 4:18–20).
Sa lei fai atu le Faaola i ona soo e tautau ni maunu i se laina fagota, lafo lea i se motu o tagata, ma toso mai ai po o ai lava le tagata e filifili e pipii mai i le matau. Nai lo lena, sa faauigaina e le Faaola e faapea i le avea ai ma Ona soo, o la latou galuega le fesoasoani i tagata ia o mai ia Keriso ma maua le filemu ia te Ia.
O outou foi o “faifaiva i tagata”! Ma afai o e i ai i se au peresitene o le korama po o le vasega, ua valaauina oe, vaetofia, ma tuuina atu le pule o le perisitua e fesoasoani ai e aumai i latou o i ai i lau korama po o le vasega i le Faaola. Tatou o la e fagogota!
1 Alu i totonu o le Vaa
Ua lelei, faatali mo se minute. Ia fai muamua se ofu faaola ma uu lou tino i se kulimi e puipuia ai mai le la. Uu mai lau meaai o le aoauli ma se foe. Ona faamautinoa lea e alu i totonu o le vaa! (Ioe, ua tautala atu i se tala faafaatusa.) I le avea ai ma se faifaiva i tagata, o lau uluai ia e matau mai o oe lava. O le avea ai ma se alii talavou po o se tamaitai talavou o le e mulimuli i le Faaola o lau faamuamua numera tasi lea.
2 Uu mai Au Mea Fagota
E fai lava si faigata ona fagota e aunoa ma ni mea fagota, po o le ofe. I le tulaga lenei, o vaega taitasi e suitulaga ma faaata mai ai se tasi o ou tiutetauave autu o se sui o le au peresitene o le korama po o le vasega.
1: Saili ma faamoemoe i faaaliga faaletagata lava ia.
Tatalo i le Tama Faalelagi e uiga i lou valaauga. Fai atu ia te Ia ni fesili, ona fai lea o au faatinoga e faatatau i mafaufauga ma lagona e oo mai i lou mafaufau. E finagalo o Ia e taiala oe i lau auaunaga.
2: Alofa ma auauna atu.
Faaalu se taimi e faamasani ai ma auauna atu i tagata taitoatasi o lau korama po o le vasega. O nisi o i latou atonu o loo ola i ni tofotofoga sili ona faigata tele. E mafai faapefea ona e auauna atu ia i latou, alofa ia i latou, avea ma a latou uo, ma fesoasoani ia i latou e o mai ia Keriso?
3: Faataunuu fonotaga a le au peresitene.
I le avea ai ma au peresitene o korama ma vasega, o outou o le kapeteni o le vaa, tau na faapena atu se tala. Ia potopoto soo faatasi ma lau au peresitene ma faufautua matutua. Talanoa e uiga i manaoga o lau korama po o le vasega, soalaupule pe mafai faapefea ona e auai i le galuega o le faaolataga ma le faaeaga, fuafua gaoioiga ma lesona o le Aso Sa, ma filifili pe faapefea ona e faasafua atu ou tiutetauave.
4: Taitai ma faia vasega o le Aso Sa.
O le Aso Sa o se aso taua i le avea ma se faifaiva i tagata. Faatautaia fonotaga a Tamaitai Talavou po o korama o le Perisitua Arona ma taitai le vaega o le “Fefautuaai Faatasi” i le Sau, Mulimuli Mai ia te A’u a o lei faia le lesona.
5: Fuafua ma faatino auaunaga ma gaoioiga.
O le o atu e fagogota e aofia ai ni fuafuaga lelei. Saunia auaunaga ma gaoioiga e i ai se faamoemoega anoa—o mea e le na o le malie, ae o le a fesoasoani i lau korama po o le vasega e aoao ai se mea fou pe avea atili ai e faapei o le Faaola.
3 Alu e Fagota
Ua e sauni e avea ma faifaiva i tagata? A o e fesoasoani i tagata o lau korama ma le vasega ia lagona le alofaina ma le faaaofiaina, o le a latou maua avanoa e latalata atili atu ai i le Faaola ma maua ai le filemu ia te Ia. Ma o le a e maua le filemu aemaise ai o le a e fesoasoani i le Faaola i Lana galuega.