“O Le Meaalofa o Lou Gauai Atu,” Mo le Malosi o le Autalavou, Ape. 2023.
O Le Meaalofa o Lou Gauai Atu
O lou tomai e gauai atu ai o se meaalofa mai le Atua. O nisi nei o manatu mo le mauaina ai o le mea sili.
Ata na tusia e Dave Klug
O lou tomai e gauai atu ai o se mea ofoofogia moni lava. Se’i ou tau faaata atu:
O a ni mea faitino o iai i lou agavale ma le taumatau? O a ni lagona o le pa’i atu o ou ofu i lou pa’u? O a ni leo i tua atu o loo i ai iina? O a ni manogi? O le a le tofo o i ai i lou gutu i le taimi nei?
Atonu e lei alu lava lou mafaufau i se tasi o na mea seia oo mai i le taimi nei. O lou gauai atu sa iai i lenei tusiga (lea ou te faafetai atu ai ma le loto atoa). O le tulaga moni i lou mafai ona e tapunia uma atu i fafo isi faamatalaga o se vaega ofoofogia moni lava.
O ou sane e aveina i totonu le anoanoai o faamatalaga, ae o lou faiai na te faamamaina uma ma fesoasoani e te taulai atu ai i mea e taua ia te oe. A aunoa ma lenei faamama, o le a e i ai i se tulaga o le soona faaosofia faamalosi ma le tele naua o faamaumauga. Ma ua na o se vaega lena mai le lalolagi i fafo atu. E i ai foi ou vaega e te manatuaina, mafaufauga, ma lagona i totonu ia te oe e mafai ona ave iai lou gauai atu.
Na aoao ai Peresitene Russell M. Nelson: “Na Foafoaina e le Atua o se meaalofa ia te oe, [o lou tino] e matuai ofoofogia lava! … O lou faiai ua mafai ona e aoao ai, mafaufau, ma fetuunai ai.”1
O se tasi auala e fesoasoani ai lou faiai ia te oe e ala mai lea i lou tomai e gauai atu ai. O lenei mea ua mafai ai ona i ai se olaga saogalemu, faigofie, ma sili atu ona anoa. O se meaalofa mai le Tama Faalelagi e fesoasoani ia te oe a o e faia filifiliga ma a’oa’o.
Ae e le faigofie i taimi uma le gauai atu—po o le iloa o mea e taua e te gauai atu iai.
O se Meaalofa—Ia Taliaina
O le olaga i ona po nei e mafai ona faatumulia i le tele o mea e tauva uma mo lou gauai atu i ai. I lalo o nei tulaga, e mafai ona tupu ai ni mea se lua: (1) atonu e faigata ia te oe ona e faavasegaina mea e taua ma mea e le taua, ma (2) atonu e faigata ia te oe ona gauai atu i se mea se tasi mo se taimi umi lava.
Ua fiafia Satani i soo se tasi o nei taunuuga. E le finagalo o ia e te taulai atu i mea e taua moni lava, o lea afai e aga atu lou gauai atoa i mea e itiiti ifo, e fiafia o ia. I se isi itu, e manao foi o ia ia faalavelaveina pea oe i taimi uma ina ia fesuisuiai ai vaega e te gauai atu i ai mai le tasi mea i le isi. O ou aafiaga la e le o ni aafiaga loloto ma e le tele sou aoaoina ma sou tuputupu ae.
O ni nai manatu nei mo le talia ma onaina o le meaalofa o lou gauai atu i ai:
-
Mafaufau loloto ma tatalo. Faalatalata atu i lou Tama Faalelagi. Mafaufau i upumoni ma aoaoga e uiga ia te Ia ma Lana fuafuaga. Ia iai se paganoa ma Ia i le tatalo. Ole atu ia te Ia mo se fesoasoani.
-
Faitau. O le faitau o se tasi lea o mea e sili ona lelei e mafai ona e faia e faamalosi ai lou faiai ma aoao ai oe lava ia taulai atu. Faitau tusitusiga paia. Faitau isi “tusi sili ona lelei” e te fiafia i ai (Mataupu Faavae ma Feagaiga 88:118). Faitau se isi tusiga i totonu o lenei mekasini. Faaalu se taimi ma faitau.
-
Ia mataala ma ia i ai se faamoemoega. Taumafai ia e nofouta i mea e tosina atu i ai lou gauai atu, mea moni e te fiafia i ai, ma mea e faalavelave ia te oe. Ia gauai atu tumau ma le faamoemoe i mea taua. Tuu ese sina taimi i lou aso e taulai atu ai. Aoai oe lava ia e gauai atu i mea e te iloa e taua. Ma ia manatua, “O le malosi … e oo mai i le tuuina atu o o tatou taulaiga ma taumafaiga i aoaoga faavae autu o le talalelei toefuataiina a Iesu Keriso.”2
-
Tape mea faitino pe tuuese. Tape pe tuuese soo se mea e te iloa e faalavelave ia te oe—masini, televise, musika—po o le a lava. E i ai ni leo patino i tua atu e mafai ona fesoasoani ia te oe e taulai atu, ae o isi e leai. Ma o faasilasilaga faifai pea mai se masini e mautinoa lava e le mafai ai.
Taulai atu i le Loto Faafetai
O lou tomai e taulai atu ai e fesoasoani ia te oe e aoao, ma e fesoasoani foi ia te oe e lagonaina le olioli. Sa saunoa mai Peresitene Russell M. Nelson:
“O le olioli o tatou lagonaina e itiiti lava se mea e faatatau i tulaga o o tatou olaga a o mea uma o loo faatatau i le taulaiga o o tatou olaga.
“Afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga.”3
Faaaoga le meaalofa o lou gauai atu i lona atoatoa. Ia nofouta i le matautia o le faaseseina ma le faalavefau. Ma maua le olioli i le tuuina atu o lou gauai atoa i mea e sili ona taua.