“E mafai faapefea ona ou iloaina aafiaga faaleagaga o aso uma i lo‘u olaga?” Mo Le Malosi o le Autalavou, Ape. 2023.
Fesili ma Tali
“E mafai faapefea ona ou iloaina aafiaga faaleagaga o aso uma i lo‘u olaga?”
Tusi i Lalo Lagona ma Uunaiga
“Vaavaai mo lagona o le faamafanafanaga, fiafia, ma uunaiga e fai mea lelei. O nei mea e mai le Agaga Paia. A e mauaina, tusi i lalo. O le toe faitauina o mea na e tusia e mafai ona fesoasoani ia te oe e iloa ai auala e fesootai mai ai le Agaga ia te oe. E mafai foi ona tuuina atu ai le mafanafana i taimi faigata.”
Jordan P., 15, Virginia, ISA
Taulai atu i le Faaola
“E tatau ona tatou faatumauina la tatou taulaiga i le Faaola ma fesili ifo ia i tatou lava po o a mea e mafai ona tatou aoao mai i o tatou aafiaga.”
Chloe P., 14, Idaho, ISA
Faitau Ou Manuia
“Pe a tatou lagona le fefe, masalosalo, po o le lofituina, e mafai ona tatou lagonaina le Agaga e ala i le faitauina o o tatou faamanuiaga. O lenei mea e mafai ai ona tatou maua se molimau i le tele o le alofa o le Atua ia i tatou, ma e faaali mai ai ia i tatou auala Na te faamanuiaina ai i tatou. A tatou iloaina nei faamanuiaga, o le a sili atu lo tatou gafatia e faalogo ai i uunaiga a le Agaga Paia. E mafai ona tatou vaai i aafiaga faaleagaga ua tuuina mai ia i tatou ma le auala ua latou faamalosia ai i tatou i taimi o o tatou tofotofoga.”
Bella R., 14, Arisona, ISA
Ia Lotofaafetai ma Faalogo
“Ou te iloa aafiaga faaleagaga i aso uma e ala i le lotofaafetai, faalogo i uunaiga a le Agaga i le usiusitai, ma le lagolagoina o lo’u aiga i faigalotu i taeao ma po.”
Richard A., 12, Nigeria
Saili ma Faamoemoe mo Vavega
“Na valaaulia i tatou e le perofeta e saili ma faamoemoe mo vavega. E ala i le mulimuli i le fautuaga a le perofeta, e mafai ai ona tatou vaaia le aao o le Atua i mea uma nai lo le na o le vaai atu i vavega i o tatou olaga ua na o se mea e tupu fua.”
Evelyn L., 20, Pasila
E Silafia e le Atua le Mea e Sili Mo Oe
“Vaai i ni itu lelei o mea uma. O nisi taimi e foliga mai ua faasagatau mai le lalolagi ia te oe, ae o loo faatasi le Atua ma oe. Aua lava nei galo o aso sili ona leaga e mafai ona avea ma aso sili ona lelei mo oe. ‘O le tofotofoina o lou faatuatua … [e] sili atu ona taua nai lo le … auro (1 Peteru 1:7).”
Broc C., 17, Iuta, ISA