Rikaenōm̧m̧an ro Jej Aikuji
Jidik in kōnono in
Āinwōt rikaļoor ro an Jisōs Kraist, jej aikuj in erom̧ waanjon̄ak ko kōn ekōjkan ikitōltōl ippān ro jet—eļap tata n̄e eoktak ļōmņak ko ad jān doon. Juon iaan wāween ko repidodo tata n̄an kile juon rikaļoor em̧ool an Jisōs Kraist ej ewi jon̄an an armej eo meanwōd ilo kōm̧m̧an n̄an armej ro jet. …
… Ennaan eo an Rilo̧mo̧o̧r eo ealikkar: rikaļoor ro An rem̧ool rej kalōk, kotak, kōketak, kareel, im im̧we—jekdo̧o̧n jon̄an pen in jekjek eo. Rikaļoor ro rem̧ool an Jisōs Kraist rej rikōm̧m̧an aenōm̧m̧an. …
Rilo̧mo̧o̧r eo ekar kapidodoik n̄an kōj n̄an anjo̧ ioon aolep nana—ekoba jum̧ae. …
Ro jeiū im jatū jitōnbōro, ad kōm̧m̧an n̄an doon elukkuun aorōk! Wāween ad kōnono n̄an im kōn ro jet ilo m̧weo, ilo m̧ōn jar eo, ilo jerbal, im online relukkun aorōk. Rainin, ij kajjitōk ippād n̄an ikitōltōl ippān doon ilo juon wāween eutiejļo̧k, ekwojarjarļo̧k. …
Iakwe-em̧ool ej unokan akweel. Iakwe-em̧ool ej menin letok an jetōb me ej kōm̧m̧an ad julo̧k mantin lal in, eo ej lōmņak kōn e make, jumae, utiej buru, im ebanban. Iakwe-em̧ool ej pedped in katak kōn kadkad in juon rikaļoor em̧ool an Jisōs Kraist. Iakwe-em̧ool ej kōmeļeļeik juon rikaenōm̧m̧an. …
… Ij kajjitōk ippāmi n̄an keememej Jisōs Kraist. Jar in bōk peran im māletlet n̄an ba ak kōm̧m̧an ta eo En kar ba im kōm̧m̧ane. Ilo ad ļoor Irooj in Aenōm̧m̧an, jenaaj erom̧ rikaenōm̧m̧an ro An. …
… Rainin ij kajjitōk ippam̧ n̄an etale mour in rikaļoor eo am̧ ilowaan wōt jekjek in wāween eo kwoj kōm̧m̧an n̄an ro jet. Ij kōjeraam̧m̧an kom̧ n̄an kōm̧m̧an jabdewōt oktak ko me remaron̄ in menin aikuj bwe bōnjam̧ en leļo̧k kautiej, jeļā ņae, im ribōk jikin juon rikaļoor em̧ool an Jisōs Kraist.