Hōʼē i roto i te Mesia
Parau ’īritihia
I ni’a ana’e ia Iesu Mesia tātou nehenehe mau ai e riro mai ’ei hō’ē.
Te rirora’a ’ei hō’ē i roto i te Mesia e tupu hō’ē hō’ē ïa—e ha’amata tātou tāta’itahi nā ni’a ia tātou iho. E ta’ata tino ’i’o ’e te vairua tātou ’e i te tahi taime, tē ’aro nei tātou tāta’itahi ia tātou iho […]
E ta’ata tino ’i’o ’e te vairua ato’a Iesu Mesia. ’Ua tāmatahia ’oia ; ’ua māramarama ’oia ; e nehenehe ’oia e tauturu ia tātou ’ia roa’a te hō’ēra’a i roto ia tātou […]
[…] Te aura’a mau o te parau ’ia « ’ahu i te Mesia », o te ravera’a ïa i tāna « ture mātāmua ’e tei hau i te rahi » [hi’o Mataio 22:37–38] mai tā tātou fafaura’a mātāmua ’e te rahi a’e, ’e mai te mea ’ua here tātou i te Atua, e ha’apa’o ïa tātou i tāna mau fa’auera’a.
E rahi mai te hō’ēra’a ’e tō tātou mau taea’e ’e mau tuahine i roto i te tino o te Mesia, ’a ha’apa’o ai tātou i te piti o te ture—tei tū’ati maita’i roa i te ture mātāmua—’ia here ia vetahi ’ē mai ia tātou iho […]
’Ia « ’ahu [ana’e tātou] i te Mesia », e ti’a roa ia tātou ’ia fa’a’āfaro ’aore rā ’ia tu’u i te hiti i te mau ta’a-’ē-ra’a, te mau mārōra’a ’e te mau tama’ira’a […]
’Aita te hō’ēra’a e tītau i te huru, e tītau rā te reira i te au māite. E nehenehe tō tātou māfatu e nati-roa-hia i roto i te here, ’ia hō’ē i roto i te fa’aro’o ’e te ha’api’ira’a tumu, ’e e fa’aitoito tāmau i te mau pupu ta’a ’ē, ’aita e tū te mana’o i ni’a i te mau tumu parau ta’a ’ē i te pae politita, e ’āparau i te mau ’ōpuara’a ’e te rāve’a maita’i nō te tāpae atu ’e e rave rahi mea mai te reira te huru. ’Eiaha roa rā tātou ’ia mārō atu ’aore rā ’ia aro atu i mua i te riri ’aore rā i te au ’ore i te tahi ’e te tahi […]
Tē parau fa’ahou atu nei au ē, e mea nā roto ana’e ’e i roto i tō tātou ha’apa’ora’a tāta’itahi ’e tō tātou here ia Iesu Mesia, tātou e nehenehe ai e tīa’i ’ia hō’ē tātou—hō’ē ’ōroto ia tātou, hō’ē i roto i tō tātou ’utuāfare, hō’ē i roto i te ’Ēkālesia, hō’ē ato’a i Ziona, ’e ’oia mau, hō’ē ’e te Metua ’e te Tamaiti ’e te Vārua Maita’i.