Mau ha’amaita’ira’a patereareha
Fenua Ētuatōria
Tō ’outou ha’amaita’ira’a patereareha—e arata’ira’a fa’auruhia nō ’ō mai i te Metua i te ao ra
’Ua riro tō’u ha’amaita’ira’a patereareha ’ei mea faufa’a rahi mau nō’u i tō’u taure’are’ara’a nō e rave rahi tumu. ’A tahi, nā roto i te mana o te Vārua Maitai, ’ua tauturu tō’u ha’amaita’ira’a patereareha iā’u ’ia māramarama i tō’u hīro’a ta’ata mure ’ore mau—’o vai mau vau ’e ’o vai tā’u e riro mai […] ’Ua ’ite iho ā vau ē, ’ua mātauhia vau ’e ’ua herehia e tō’u Metua i te ao ra ’e e tō’u Fa’aora, ’e tei roto roa Rāua iho i tō’u orara’a. ’Ua tauturu te reira iā’u ’ia hina’aro i te ha’afātata atu ia Rāua ’e ’ia fa’arahi i tō’u fa’aro’o ’e tō’u ti’aturi ia Rāua […]
Te ’itera’a ’o vai mau vau, ’ua tauturu iā’u ’ia hāro’aro’a ’e ’ua hina’aro ’ia rave i te mea tā te Atua e tīa’i ra ’ia rave au.
’Ua arata’i te reira iā’u ’ia tuatāpapa i te mau fafaura’a tā’u i rave ’e te mau ha’amaita’ira’a i fafauhia i roto i te fafaura’a a te Atua ia Aberahama. ’Ua hōro’a mai te reira iā’u i te hō’ē hi’ora’a ātea, tei fa’auru iā’u ’ia ha’apa’o maita’i a’e i tā’u mau fafaura’a […]
E mea faufa’a mau nō’u ’ia fāri’i i tō’u ha’amaita’ira’a patereareha ’a riro ai au ’ei feiā ’āpī ’e ’a tupu noa ai tō’u ’itera’a pāpū i te rahi […]
[…] Te fa’ahereherera’a i tō’u ha’amaita’ira’a patereareha i tō’u ’āpīra’a, ’ua hōro’a mai iā’u i te itoito ’ia paruparu ana’e au, i te tāmahanahana ’ia ri’ari’a ana’e au, i te hau ’ia fāri’i ana’e au i te hepohepo, te tīa’ira’a ’ia ’ite ana’e au te tīa’i-’ore-ra’a ’e te ’oa’oa i te taime e hina’aro rahi ai au. ’Ua tauturu tō’u ha’amaita’ira’a patereareha ’ia fa’arahi i tō’u fa’aro’o ’e te ti’aturi i tō’u Metua i te ao ra ’e i tō’u Fa’aora. ’Ua fa’arahi ato’a te reira i tō’u here nō Rāua—’e te tāmau noa nei ā te reira.
Te taime e fāri’i ai i tō ’outou ha’amaita’ira’a patereareha
E au mau tamāroa, e au mau tamāhine, e au mau metua, e au mau ’episekōpo, e ’ere te ha’amaita’ira’a patereareha nō te fa’aineinera’a noa nō te tāvini i te hō’ē misiōni. E nehenehe te mau melo ti’a mā tei bāpetizohia, ’ia fāri’i i tā rātou ha’amaita’ira’a patereareha ’ia ti’a te taime nō rātou […]
Te mau taea’e ’e te mau tuahine, tē hōro’a nei au i tō’u ’itera’a pāpū ē, tē ora nei te Metua i te ao ra ’e tāna Tamaiti here ’e te Fānau tahi, ’o te Fatu ra Iesu Mesia. ’Ua here rāua ia tātou. E mau hōro’a mo’a te mau ha’amaita’ira’a patereareha nō ’ō mai ia rāua. ’Ia fāri’i ’outou i tā ’outou ha’amaita’ira’a, e ’ite ’outou ’e e putapū ho’i ’outou i tō rāua here ia ’outou, e ’ite ’outou i tō rāua rōtahira’a i ni’a i te ta’ata tāta’itahi.