E feiā ’āpe’e nō te Ari’i o te hau
Parau ’īritihia
’Ei mau pipi nō te Ari’i o te hau, ’ua fāri’i tātou i te arata’ira’a ’ia ora « ma te tāhō’ē mai i tō rātou ’ā’au i roto i te tāhō’ēra’a ’e i roto i te here te tahi i te tahi » [Mosia 18:21] […]
[…] Hō’ē o te mau tāpa’o pāpū maita’i, e ha’afātata atu ia tātou i te Fa’aora ’e e riro hau mai tātou mai iāna te huru, ’o te here mau, te fa’a’oroma’i ’e te maita’i i ni’a i tō tātou mau ta’ata tupu, noa atu te huru tupura’a […]
[…] ’Ia au i teie ha’api’ira’a tohu, e’ita e māerehia ē, te hō’ē o te mau rāve’a ha’avarevare a te ’enemi ’o te fa’atupura’a ïa i te au ’ore ’e te riri i roto i te ’ā’au o te mau tamari’i a te Atua. E ’oa’oa ’oia ’ia ’ite i te ta’ata ’ia fa’a’ino, ’ia ha’ama’au ’e ’ia ’ōhumu te tahi ’e te tahi […]
E te mau taea’e ’e te mau tuahine, ’a tauto’o ai tātou i te fa’ahotu i te mau huru mai tō te Fa’aora, e nehenehe tātou e riro mai ’ei mauiha’a nō tōna hau i roto i te ao nei, mai te hōho’a ’o tāna iho i ha’amau. Tē ani nei au ia ’outou ’ia feruri i te mau rāve’a e nehenehe ai tātou ’ia taui ia tātou iho ’ei ta’ata ’o tē fa’ateitei ’e ’o tē tauturu atu, ’ei ta’ata ’ā’au hāro’aro’a ’e te fa’a’ore hara, ’ei ta’ata ’o tē ’imi i te maita’i i roto ia vetahi ’ē, ma te ha’amana’o tāmau noa ē, « mai te mea tē vai atu ra te mau mea maita’i, te mau mea fa’ahiahia, te mau mea ro’o maita’i, ’e te mau mea poupouhia ra, e tītau ïa tātou i te reira » [Hīro’a Fa’aro’o 1:13].
Tē fafau atu nei au ia ’outou ē, ’a pe’e ai ’outou ’e ’a fa’ahotu ai i teie mau huru, e rahi atu ā tō tātou auhoara’a ’e te ’ite ’ōhie i te mau hina’aro o tō tātou mau ta’ata tupu, ’e e fāri’i tātou i te ’oa’oa, te hau ’e te tupura’a i te rahi i te pae vārua.