“Wasea na Veika o Taleitaka,” Me iSakisaki ni iTabagone, Julai 2023.
Wasea Na Ka O Taleitaka
Na nomu lomana na kosipeli, o ira na tani, kei na Turaga ena vakaukauwataki iko mo wasea na kosipeli.
Ena iNaki Oqo, mai vei Yongsung Kim, Havenlight.com
Au a sikova taumada na Uciwai na Ribble volekati Preston, Igiladi, niu a se daukaulotu gone voli ena Tabana ni Kaulotu e Peritania. E kea, erau a papitaisotaka kina o Heber C. Kimball na iApositolo ka daukaulotu na imatai ni curuvou ki na Lotu vakalesui mai i Jisu Karisito ena taudaku ni Vualiku kei Amerika ena Julai 1837.
Niu duri tu ena dua na wavu raibaleta na uciwai ka vakasamataka na veika a yaco e kea, au a ciqoma e dua na ivakadinadina kaukauwa sara me baleti Jisu Karisito kei na Nona kosipeli vakalesuimai.
Na noqu kaulotu e dua na gauna totoka ka veivakurabuitaki ena noqu bula. Nikua, au dau vakananuma lesu na kena rekitaki vei au meu vakayagataka vakalevu na noqu bula ena wasei ni kosipeli i Jisu Karisito. Au sega ni vakasamataka rawa e dua tale na ka e bibi cake.
Na Gagadre me Wasei na Kosipeli
Raitayaloyalotaka mada ni ko a tisaipeli i Jisu Karisito ena gauna ni Nona Tucaketale. Ena vakacava beka na totoka ni noda raici Koya ka rogoca na Nona itukutuku?
Na itukutuku veiuabaleti ni Turaga sa vakaturi cake e veisureti kei na ivakaro me wasei na Nona kosipeli. A kaya O Koya, “mo dou qai lako, ka vunautaka na veimatanitu kecega” (Maciu 28:19), ka “dou lako yani ki vuravura taucoko, ka vunautaka na itukutuku vinaka kivei ira na tamata kecega” (Marika 16:15).
Sa vakaraitaka o Peresitedi Russell M. Nelson ni “se sega mada ni gadrevi vakalevu cake sara na kosipeli i Jisu Karisito me vakataka nikua. Sa noda na itavi tabu me da wasea na kaukauwa kei na sautu i Jisu Karisito vei ira kece era via rogoca ka laiva na Kalou me qaqa duadua ena nodra bula.”1.
Na Turaga E Gadrevi Iko
Ko ni bula donuya tiko e dua na gauna duatani ka bibi—na iotioti ni itabagauna ni bera na iKarua ni Lako Mai i Jisu Karisito. E parofisaitaka na Parofita o Josefa Simici ni se bera ni lako tale mai na Turaga: “na dina ni Kalou ena lako yani ena doudou, vakaturaga, ka tu vakaikoya, me yacova ni sa curubasikata yani na veiyasana yadudua, sikova na veivanua, curuma yani na veimatanitu, ka rogovaki ena veidaliga yadudua me yacova ni sa vakacavari na veinaki ni Kalou, ka na qai kaya ko Jiova sa Cecere ni sa qaravi oti na cakacaka.”2
O cei ena vukea me rawata na ka oqo? O iko!
E sega ni gadrevi mo dua na daukaulotu tudei mo vakatetea na kosipeli. E gadrevi iko nikua na Turaga mo wasea na Nona kosipeli rekitaki tawamudu ena vosa kei na ivakarau ni bula kei na dua na tiki ni nomu bula.
Raimatua ki na Loloma
Na vuna bibi duadua eda wasea kina na kosipeli oya ni sa kerea vei keda na Turaga. Ena so na gauna e rawa ni veibolei na ka oqo, ia au yalataka ni gauna o raimatua kina vua na Turaga o Jisu Karisito kei na levu ni nomu lomani Koya kei na levu ni Nona lomani iko, o na dusimaki kina ena nomu sasaga.
Sa Tucake o Koya, mai vei Greg Olsen
Na nomu lomana na kosipeli, o ira na tani, ka bibi duadua, na nomu lomana na Turaga ena vakaukauwataki iko mo ciqoma na Nona veisureti vakalou mo wasea na Nona kosipeli.
Taleitaka na Kosipeli.
Sa kaya na Turaga, “Mo vuli vei au” (Vunau kei na Veiyalayalati 19:23; Maciu 11:29). Na levu ga ni nomu vulica na kosipeli ka vulici Jisu Karisito kei na Nona ilesilesi tabu vaka iVakabula ka Dauveivueti, na levu ni nomu lomana na kosipeli ena tubu.
Ko na wasea na nomu lomana na kosipeli ni ko bulataka tiko. E vakavulica na iApositolo o Paula, “Mo yaco mo nodra ivakarau era sa vakabauta, ena vosa, ena ivalavala, ena loloma, ena lomadina, ena yalosavasava” (1 Timoci 4:12). Sa dau vakawasoma ni ra ciqoma na kosipeli na tamata baleta ni ra sa sotava na veika vinaka vei ira na lewe ni Lotu. Yalovinaka kakua ni bula tiko ena vakalecaleca vakayalo. “Me caudre vakakina na nomudou rarama” (Maciu 5:16) ka vakaraitaka vei ira tale eso ni kosipeli e tiki bibi ni nomu bula kei na veika o cakava tiko.
Lomani Ira na Tani
Vakasamataki ira na nomu itokani. O dau wasea beka na iyaloyalo, sereivakatagi, kei na kakana o taleitaka vata kei ira? O dau wasea beka na nomu taledi kei na ka taleitaki? O na rairai vakataroga beka kevaka era na vakaio ki na kosipeli kevaka o wasea vei ira. O na sega ni kila vakavo kevaka o tovolea. Sa vakatavulica o Peresitedi Nelson ni, “Tamata kece sara e dodonu me kila na kosipeli vakalesui mai i Jisu Karisito.”3
Dolele yani ena loloma vei ira na itokani, lewe ni matavuvale, veiwekani, itokani, kei ira tale eso—ka nanuma tiko ni ra sa tacimu kei na ganemu kei ira na luvena lomani na Tamamuni mai Lomalagi—ko ni na kunea ni vakarawarawataka na wasei ni kosipeli vei ira.
Lomana na Turaga
Nida lewena Na Lotu i Jisu Karisito ni Yalododonu Edaidai, na noda itukutuku ki vuravura oya ni bula tiko o Jisu Karisito. Sa vakarautaka o Koya vei keda yadua me da rawata na veivakabulai kei na bula vakacerecerei.
Ko na vakila na loloma ni Turaga vei iko ni ko tugana na veika kece sa cakava vei iko o Koya. Ena vakasinaiti na yalomu ena loloma Vua, ka o na raica ni sega ni rawa ni o kinoca ia mo wasea na dina totoka o sa ciqoma mai Vua.
Sa Na Uasivi Sara Na Nomu Marau
Na ka au sotava veivauqeti vakayalo ena wavu ni Uciwai o Ribble ni a kauta mai vei au na daukaulotu gone na reki tawamudu ka yalataki vei ira era wasea na kosipeli (raica na Vunau kei na Veiyalayalati 18:15).
Me vaka e dua na iApositolo ni Turaga o Jisu Karisito, au sa vakadeitaka dina nikua ni wasei ni kosipeli e ka ni reki ka ivakaraitaki titobu ni noda lomana na kosipeli vakalesui mai, me baleti ira na luve ni Kalou, ka baleta na Turaga.
E vosa o Elder Cook kei ira na itabagone drotaki bula ni Taal Volcano e Batangas, Filipaini, ena 15 ni Janueri, 2020.
Au vakadinadinataka ni o na ciqoma na veisureti ni Turaga ka wasea na veika o lomana, o na vukei Koya me tara cake na Nona Lotu ka vakarautaka na vuravura ki na Nona lesu mai, ni “na veiliutaki ko Koya vaka Tui ni Tui ka Turaga ni Turaga.”4 Sa noqu masu ni ko na muri Koya ka wasea na Nona kosipeli ena nomu bula taucoko.