“Kukube Matua ki na Dina,” Me iSakisaki ni iTabagone, Julai 2023.
Kukube Matua ki na Dina
Droini maivei Ben Simonsen
Na imatai ni gauna au raica kina e dua na vale ni Lotu, au nanuma ni sa dua na valenibula. E savasava ka vakanomodi. Au a taleitaka na kosipeli i Jisu Karisito ena gauna au a tiko kina ena soqoni ni lotu.
Rau sa tekivu vakavulici au o Sisita daukaulotu, kau sa lewa meu sa papitaiso. E siga talei duadua!
Au a vakaveikilaitaki ki na kosipeli mai vei koya na tuvoleka, ka sa lesu mai na kaulotu. A qiriti au mai o koya ena dua na mataka ni Sigatabu ka kerei au meu lako vata kei na nona matavuvale ki na valenilotu. Taumada, a tukuna vei au o tinaqu niu sega ni rawa ni lako baleta ni sega vei keitou na ilavo me baleta na ivodovodo ni basi. Niu tukuna vua na wekaqu, a kaya ni na kauti au o koya, ka vakatara o tinaqu meu lako.
Ena Gauna Mada ga Eda Lako Duadua Voli Kina
Niu papitaiso oti, au a sotava e vuqa na gauna dredre vata kei na noqu matavuvale. Ena so na gauna era vinakata meu tiko ga e vale ena Sigatabu, ia au na digitaka meu gole ki lotu. E vuqa na gauna a dredre sara meda muria na salatu ni veiyalayalati.
Eso vei ira na noqu lewe ni matavuvale era sa saqata tiko na Lotu ka ra tukuna vei au ni sa cala na noqu digidigi meu lewena. Ni ra tukuna vei au na ka oqo, e votu mai noqu vakasama na veimalanivosa oqo: “Au kila ni bula tiko na Tamada Vakalomalagi kei Jisu Karisito. Au kila ni dina na Lotu.” Na veivakanananu oqori sa vukei au meu tautauri matua ki na dina.
Na Noda iValavala e Rawa ni Tara na Nodra Bula na Tani
Niu saga dredre meu kila na sala meu saumi ikatini kina, a vakaraitaka vei au na wekaqu na sala meu sauma kina. Oqo ni sa solia mai vei au o tinaqu na ilavo, au dau sauma na noqu ikatini. Keirau sa raica vakamatavuvale na veivakalougatataki mai kina. Sa tekivu solia sara mada ga vei au na noqu matavuvale na nodratou ilavo me ratou saumi ikatini kina! Sa dua na ka veivakurabuitaki.
E vuqa na gauna au dau gole ki lotu vakataki au, ia eso na gauna e dau lako vata mai kei au o tinaqu. A nanuma o tinaqu me vulica eso tale na ka me baleta na kosipeli ka kunea ni sa ka ni marau, dina ga ni se bera ni papitaiso.
Na Masu kei na Vakabauta e Veisautaka na Yalo
Au sa raica na liga ni Turaga ena bula ni noqu matavuvale niu masulaki ira ka kerei ira eso mera masulaki ira ena valetabu. Era sa dau veitokoni vakalevu cake na noqu lewe ni matavuvale, ka ra sa vakayaloqaqataki au oqo meu lako ki lotu ka dina vei au.
Se qai takali wale toka ga na tukaqu, kau kunea na yacana niu cakava tiko na cakacaka ni tuva kawa. Au a tarogi tamaqu kevaka e rawa ni vakayacori na nona cakacaka vakalotu ena valetabu. A kaya okoya, “Cakava ga kevaka sa ka dodonu.”
Reki Dina kei na Marau
Na wiliki ni ivolanikalou kei na kilai ni Veisorovaki i Jisu Karisito sa kauta mai vei au na reki, marau, vakacegu, kei na logavinaka.
Au kila ni ena vuku ni Veisorovaki ni iVakabula, au rawa ni lesu tale meu tiko vata kei na Tamada Vakalomalagi ka rawa talega me keitou tiko vata vaka matavuvale kevaka keitou na vauci ena vale tabu ena dua na siga eliu.
Na dauvolaivola o ya mai Vanuatu ka vakaitikotiko e Viti.