11 Na iTalanoa Leleka Dina me baleta na Wasei ni Kosipeli

Kei na sala e rawa ni o wasea talega kina!

Vakaraitaka na iWalewale e Rawa ni Veivuke kina na Kosipeli

Au a tiko ena kalasi ena dua na siga niu dabe tikivi noqu itokani. Keitou sa vakarau me keitou veitarogi, ka tukuna vei au ni sa taqaya sara ga o koya. Au vakila niu gadreva meu vakavulici koya ena ivakarau ni masu. Keirau sa qai cuva sobu na ului keirau ka masulaka lo na veivuke ena veitarogi. Au vakavinavinaka ni masu e rawa ni vukea me vakamaravutaka na lomai noqu itokani.

Abigail, Uruguay

Veiqaravi vei Ira era Vakaleqai

E tiko e dua na marama qase cake ena neitou tabanalevu ka sega ni rawa me lako mai vakai koya ki na soqoni ni sakaramede ena vuku ni leqa ni ituvaki ni bula. Keirau dau kerei bisopi kei tamaqu ke rawa ni keirau kauta na sakaramede ki na nona vale ena veimacawa. Na watina, ka luluqa tu vakalotu, a tekivu me taura talega na sakaramede. Na vakasokumuni i Isireli e kena ibalebale me da sureti ira na tani me ra toro voleka yani vei Jisu Karisito. Na veiqaravi e dua na tikina levu.

Shion, Utah, Amerika

Veisureti ki na dua na iTaviqaravi

Au vodo baisikeli tiko ena dua na valenilotu kau raica e vuqa na tamata ni ra danisi voli e kea. Au a kaciva e dua na cauravou (a yacana ko Courage) ka tarogi koya se cava era sa cakava tiko. E kaya ni ratou sa lako tiko mai ki na kalasi ka vakatokai na semineri. A tukuna vei au o koya ni na dua na itaviqaravi e valenilotu ka taroga ke rawa niu na lako vata kaya. Ko Courage, ni noqu itokani, a veisautaka sara ga na noqu bula ena nona vukei au meu kila na kosipeli.

David, Ghana

Mo iVakaraitaki

Au vulica e levu na ka ena noqu saravi tuakaqu. Au taleitaka na qito ni vidio kei na soka, ka dina, au na cakava beka na veika oqori ena veigauna kece kevaka e sega okoya. E taleitaka talega o koya na veika oqori, ka levu na gauna keirau dau qito vata kina, ia e dau solia na gauna me tubu ka vakatorocaketaki. Au na sega vakadua ni guilecava na noqu sureti meu vakayagataka na waigaga e koronivuli. Au vakasamataka sara na tuakaqu ka kila na ka ena digitaka o koya; baleta niu vinakata meu vakataki koya, au sa digidigi donu ka kaya me kua.

Emilio, Tennessee, Amerika

Vukei Ira na Tani me ra Vakila na Loloma i Karisito

Ena dua na koniferedi ni MST, au sa galili saraga. Au masu e veisiga, ka nuitaka meu vakila na Yalotabu kei na loloma i Jisu Karisito. Ni oti e dua na vosa, e dua na goneyalewa au sega tu ni kila vakavinaka ka mai mokoti au. Au vakila na loloma i Karisito e na nona mai mokoti au, me vaka e tukuna tiko vei au ni lomani au.

Natalie, Chile

Vakamuria na Veivakauqeti.

Ena dua na siga a vakauqeti vakayalo meu sureta na noqu itokani vinaka duadua mai koronivuli ki na dua na lotu. Au vinakata meu vakawalena na veivakauqeti, ia au qai vakauta vua e dua na text ni vo e dua na siga. Ni keirau dabe vata ena lotu, au a taqaya. Ia ni sa oti na soqoni, sa matadredredre sara toka ga o koya. E sa dua na veivakananumi vei au ni kilai ira vinaka cake na Luvena na Kalou mai vei au ka dodonu meu dau muria na veivakauqeti meu wasea na kosipeli i Jisu Karisito.

Eliza, Minnesota, Amerika

Masulaka na Ka mo Kaya

Keirau lewe ni Lotu duadua ga kei taciqu yalewa ena neitou koronivuli. Era na raica na tamata ni keirau duidui ka dau vakataroga e veigauna. Taumada au a rere meu vosa vei ira, ia au a masulaka meu rawa ni tukuna na ka dodonu, ka ra a vakarorogo ka rokova na noqu digidigi.

Ruben, Norway

Wasea na Dina ni Kosipeli ena Initaneti

Me baleta e dua na takete, au a wilika na Lako Mai, Mo Muri Au ka kunea na ivolanikalou kei na vosacavuti meu wasea ena itukutuku raraba. Au a ciqoma eso na ivakamacala mai vei ira na tamata era kaya ni ra a vakila na Yalotabu ena noqu vavakau. Na wasei ni kosipeli e rawa ni vukei ira na tani ena sala eso eda sega ni rawa ni raitayaloyalotaka ena gauna oya.

Raquel, Brazil

Bulivakasama Mada

Ena dua na noqu kalasi ni vuli, keimami a wilika tiko e dua na ivola a vakacacana na Lotu. Au kila niu gadreva meu vosa me baleta na dina ni kosipeli vakalesui mai. Au a Laveta na Ligaqu. A kacivi au mai o qasenivuli, ia au sega ni kila na ka meu tukuna. Ena dua na vuna, sa tekivu meu lagata na sere ni Yavu ni Vakabauta. Au kurabui, ni dua na vakarokoroko titobu ena loma ni rumu. Ni oti oya a lailai na veilecayaki, ka ra dau veivosaki vata kei au na noqu qasenivuli kei ira na lewe ni kalasi ena veidokai.

Monique, Massachusetts, Amerika

Mo dua na Rarama

Niu sa yabaki 15, au sa lewa meu sa na vaqara e dua na lotu. Ni oti e vica na siga, au a veitokani kei na dua na goneyalewa e koronivuli ka vaka me tu vua e dua na rarama. Ni oti e vica na macawa, a sureti au o koya ki nona vale. Niu yaco yani ki kea, a sureti au na nona matavuvale meu mai duavata kei iratou ena lotu vakamatavuvale. Au a malele kina Na Lotu i Jisu Karisito ni Yalododonu Edaidai, vakalevu baleta niu a vakila ka raica na marau ni nona matavuvale na noqu itokani ena yakavi o ya.

McKaylie, Colorado, Amerika

Veiwasei ena Loloma

A vakayaloqaqataki au o tavalequ meu sotavi rau na daukaulotu, au vakasamataka, baleta ni vinakata o koya meu marautaka na veivakalougatataki a marautaka tiko ena gauna o ya. Au vakila ni o tavalequ kei noqu itokani, o Enoch, e lomani au ka vinakata e dua na ka vinaka vei au. E vakavuna meu logaloga vinaka ena noqu lako mai ki lotu.

Eric, Ghana