Sokumuni—Kua ni Veiseyaki

Mai vei David A. Edwards

Mekasini ni Lotu

E sega ni dau vakaraitaka na Kalou na digi vakailoa vei ira na tamata, ka sega talega ni dodonu me vakakina oi keda.

iVakatakilakila

veimataqali tamata

Droini mai vei Travis Constantine

Ni oti e vica na macawa noqu yaco yani ki Jamani niu daukaulotu, keirau a tukituki kei noqu dauveituberi ena katuba ni dua na marama qase cake, ka vakadonuya me keirau vakavulici koya.

Ena imatai ni gauna ni neirau lesoni, keirau a sureti koya me wilika i cake e dua na ivolanikalou. Mai na matailoilo vavaku, a wilika ena dredre levu, ka tatao ena vosa. E lekaleka wale na veika e sauma ena neitou taro. Keirau sega ni kila na levu ni nona kila.

Keirau a kerei koya me wilika eso na malanivosa ena iVola i Momani ni bera na neirau veisiko ka tarava. Ni keirau sa lesu tale yani, sa wilika o koya ia e vaka me sega ni matata vei koya. Keirau a lomatarotarotaka de na rawa ni sotava eso na bolebole ni vuli. Keirau lomatarotarotaka se sa dodonu me keirau tomana tikoga nona vakavulici okoya. Ia keirau toso tikoga.

Ena neirau veisiko ka tarava, keirau a kurabui ni kaya ni vinakata me papitaiso. Ia, ni keirau tomana tiko na neirau vakavulici koya, keirau raica ni sa vinaka cake na nona wiliwili. Na nona isaunitaro ki na neirau vakatataro e se lekaleka ga ia e rairai vinaka cake ka veivakadeitaki.

Sega ni dede au sa lesi ki na dua tale na koro levu, ia a qai vola vei au e muri o noqu dauveituberi me kaya ni a papitaiso na marama oqo ka tokoni mai vei ira na lewe ni tabana. Kevaka o a tarogi keirau ena vica na macawa yani ki liu se o cei vei ira kece na neimami veitaratara e rawa ni papitaiso ka kunea e dua na vanua ena Lotu, ke a sega ni tiko o na marama oqo ena ulu ni neitou lisi.

Keirau sa vulica kina e dua na lesoni makawa—na lesoni vata ga a vulica o Pita na iApositolo ena gauna makawa ka sa gadrevi vei keda yadua me da vulica tikoga: “Sa sega ni digitaki ira vakailoa na tamata na Kalou” (Cakacaka10:34).

E Dua na Veisau Levu

A vakatulewa o Pita ena Lotu ena dua na gauna dredre. A vakaroti ira vakaoqo na iApositolo, “Dou lako yani ki vuravura taucoko ka vunautaka nai tukutuku vinaka vei ira na tamata kecega” (Marika 16:15). Ia ena gauna oya eratou a se vunau voli ka veipapitaisotaki wale ga vei ira na Jiu.

Sa qai yaco e vica na ka veivakurabuitaki. E dua na turaganivalu mai Roma ka yacana o Cornelius—e dua na Matanitu Tani, sega ni Jiu, e dua na sotia ka daramaka na unifomu vata ga era a vakamatei Jisu Karisito ena kauveilatai—a raica e dua na agilosi ena raivotu. A kaya na agilosi vei Cornelius me tala mai e dua na tamata na yacana o Pita me vakavulici koya. Sega ni dede ni oti oya, a raica o Pita e dua na raivotu ka raica kina na kakana sa vakatabui ena lawa vaka-Jiu, ia a qai tukuna vua me kania baleta ni sa vakasavasavataka na Kalou. Ni oti sara ga na raivotu nei Pita, era sa yaco mai na italai nei Cornelius ka kerea vua me lako vata mai kei ira. Sa tukuna vei Pita na Yalotabu me lako.

Ni oti na sota kei Cornelius ka raica na kena vinaka kei na dina, e kila o Pita na ibalebale ni nona raivotu. Na kosipeli e gadrevi me lako kivei ira na kai Matanitu Tani me vakataki Cornelius talega. Oqori na gauna a kaya kina o Pita, “Ia au sa kila ni sa sega ni digitaki ira vakailoa na tamata na Kalou: ia ena veivanua kecega sa vinaka vua ko koya sa rerevaki koya, ka caka dodonu” (Cakacaka10:34–35). A vakavulici Cornelius o Pita me baleti Jisu Karisito ka sureti koya kei na nona matavuvale me papitaiso. (Raica na Cakacaka 10.)

Na kau mai ni kosipeli vei ira na Matanitu Tani e vakatakilakilataka e dua na veisau levu me baleta na Lotu taumada. Eso na tamata era sotava na gauna dredre mera ciqoma na veisau oqo. Ia sa ka dodonu, ka vakavulica e dua na dina taumada me baleta na Kalou kei ira na wekada.

Sega ni Digi Taleitaka

Ena Nona vakalougatataki ira na Luvena, e sega ni dau vakaraitaka na Kalou na digi taleitaka me baleta na matanitu, kawatamata, tolotolo, iyau, vuli, rawa-ka, irairai, se dua tale na duidui e wasei ira na tamata.¹ Sa “duavata na tamata kecega; ia ko koya sa ivalavala dodonu sa totaki mai vua na Kalou” (1 Nifai 17:35). E rawa ni ra lako kece mai Vua na tamata kecega, ni ”sa tautauvata na tamata kecega vua na Kalou” (2 Nifai 26:33). Sa “raica na yalo ko koya” (1 Samuela 16:7). E ciqomi ira era “caka dodonu, loloma veivueti, ka lako ena yalomalumalumu“ (Maika 6:8).

Sa rawa vua e dua me digitaka me lako mai vei Jisu Karisito, veiyalayalati kei Tamada Vakalomalagi, ka muria na Nodra sala. Na dina oqo e dodonu me dusimaka na ivakarau eda wasea kina na kosipeli ni Turaga kei na Nona loloma.

Eda sega ni rawa ni raica ga na nona ivakarau e taudaku e dua ka nanuma ni sega ni “mataqali” ni kosipeli. Eda sega ni rawa ni vakayagataka ga na ivakatakilakila vakavuravura vei ira na tamata ka nanuma ni ivakatakilakila oqori e sega ni rawa ni okati kina mai na lotu. E sega ni rawa ni da vakatulewa walega me da kakua ni qarava e dua baleta ni duidui na nodra nanuma vakapolitiki, veika taleitaki, se veika talei mai vei keda.

E sega ni raica na Kalou e dua na tamata me ivakasokumuni ni ivakatakilakila ka matataka na veimataqali ilawalawa se ivakarau ni bula. E raica e dua na tamata—Me luvena. Ka sai koya oqori na sala meda raici ira kina na tamata yadua—me vaka e dua na tamata duatani sara ka tautauvata na nodra madigi kei na kaukauwa me ra lako mai vua na Kalou.

Mo dua na Dauvakasokumuni

Sa vakayaloqaqataki keda o Peresitedi Russell M. Nelson meda vakaitavi ena vakasoqoni vata nei Isireli.² Ia kevaka, eda sega ni tautauvata kei na Kalou, digitaka me da “digitaka me ra dau nanuma tikoga na tamata” ena gauna e wasei kina na kosipeli ka oka kina o ira na tamata ena lotu, eda na veiseyaka beka se tawasea vakalevu cake mai na noda vakasokumuna vata ka duavata.

Me da cakava yadudua e dua na yalayala: me kakua tale ni dua na veivakasevi. Mo dua na dauvakasokumuna Loloma, veiwasei, ka veisureti.

Keirau sega ni kila kei noqu itokani se na rawa ni papitaiso na marama keirau veivakavulici tiko mai Jamani. Keirau sega ni kila na yalona, ia a kila ga na Kalou. Au marau ni keirau a vakauqeti me keirau vakavulici koya tikoga.

Ni o tovolea mo muria na Yalotabu ka tovolea mo kakua ni dau digitaki ira vakailoa na tamata, o na tuberi mo vukei ira era tu wavoliti iko me ra lako mai vei Karisito, se cava ga na nodra duidui.