“Ni Vakamavoataki Iko na Nodra Digidigi na Tamata Tani,” Me iSakisaki ni iTabagone, Julai 2023.

Ni Vakamavoataki Iko na Nodra Digidigi na Tamata Tani

Mai vei Gabrielle Shiozawa

Mekasini ni Lotu

Oqo eso na ka me da nanuma ni ra vakayagataka na tamata tale eso na nodra galala ena sala e vakararawataki iko.

iVakatakilakila

sotava tiko e dua na goneyalewa na yalo ca

Droini mai vei Shana Keegan

O cakava e bini na digidigi e veisiga—na ka mo daramaka, na ka mo kania me ikatalau, na itokani mo gadiva. Na digidigi, se na galala mo digia ka cakacaka, sa dua vei ira na isolisoli cecere duadua sa solia vei keda na Kalou.

Na noda digidigi e tiko talega na kena isau, ka so na gauna na nodra digidigi eso tale na tamata e rawa ni vakamavoataki keda. Kevaka o sa bau tarovi tu baleta e dua na ka a cakava na tacimu, o na kila na bolebole e rawa ni yaco ni ra vakayagataka na tamata na nodra galala ni digidigi ena sala o sega ni taleitaka!

Ia eso na gauna e dau ca sara na veika era rawa ni vakayagataka na tamata ena nodra galala ni digidigi. Era rawa ni vakatotogani iko na gone e koronivuli, se dua beka na lewe ni matavuvale e nanuma me sa biuta na Lotu. E vuqa na gauna e vaka me sega ni veirauti na bula. Me vaka, o saga tiko mo vakayagataka na nomu galala ni digidigi mo digidigi donu kina—na cava e sega kina?

E dina sara, e sega ni rawa ni o lewai ira tale eso. Ia na itukutuku vinaka sai koya ni rawa ni o veisautaki iko. Na kena iwalewale o ya mo veisautaka na veika o vakanamata kina ka digidigi vinaka ena gauna mada ga era sega ni rawata kina na tani.

Oqo eso na ka mo nanuma tiko me baleta na toso ki liu ena vakabauta, ni ra sa taurivaka mada ga na tamata tani na nodra galala ni digidigi ena sala e vakararawataki iko:

E segata o Setani me vakarusa na galala ni digidigi (raica na Mosese 4:3). E dina ga ni dredre me da saravi ira na tani me ra digidigi ca, o sa galala talega mo cakava na digidigi vinaka mo muri Jisu Karisito ka yaco mo vakataki Koya vakalevu cake!
Na nomu ivalavala e tiko na kena revurevu. Nanuma tiko, “Eda sa galala meda digidigi, ia eda na sega ni rawa ni digitaka na kena isau.”¹ Na raici ni nodra digidigi eso tale na tamata e rawa ni o dua na ivakananumi vinaka mo cakava kina na digidigi ka sega ni vakacacani iko se o ira tale eso.
Sa nodra itavi yadua na tamata na nodra digidigi (raica na Vunau kei na Veiyalayalati 101:78). E sega ni dodonu mo vakaogai iko ena nomu vakila na itavi ni veisautaki ni so tale na tamata se na nodra digidigi. Ia, e rawa ni o vakanamata ena nomu vakatulewa vinaka ka muri Jisu Karisito.
E rawa niu digitaka meu yalovinaka. Ena rairai dua beka e yalo ca vei iko, ia e rawa ni o dau yalovinaka tikoga vei ira. E taura na yaloqaqa me da lomavinaka vei ira na tamata ka vosoti ira ni ra yaloca vei iko, ia oqori sara ga na ka ena cakava o Jisu (raica na Luke 23:34).
E dodonu mo vakanamata ki na veika e rawa ni o vakatulewa kina. Ena sega beka ni rawa mo tarova na nodrau veisere na nomu itubutubu, kena ivakaraitaki, ia e rawa ni o digitaka mo raica matua tiko na salatu ni veiyalayalati, vukei ira na tacimu, vulica na veimaliwai bulabula, ka vakarautaka na takete eso me baleta na nomu matavuvale ni mataka. Digitaka mo vukica na nomu bolebole me madigi ni tubu ka vuli.
E tiko na kemu ivakatakilakila kei na inaki vakalou. Ni o nanuma na kemu ivakatakilakila ni o luve ni Kalou ka vakanamata ki na nomu takete ni bula, sa rawa mo raica na iyaloyalo e levu cake. Na vakanamata ena nomu inaki kei na raici ni veibolebole oqo e dua walega na tiki lailai ni nomu italanoa ni bula ena rawa ni vukei iko mo toso ki liu ena vakabauta.
Ena vakabauti Jisu Karisito, sa rawa ni o kunea na vakacegu yadua, ena gauna mada ga e sega ni veivakacegui kina na veika eso era tu wavoliti iko. E kaya o Peresitedi Russell M. Nelson, “E rawa ni da vakila na vakacegu kei na reki, ena gauna mada ga ni yaluma.”² Na bula e wasawasa voravora, ka rawarawa ni da diva me vakamaravutaka na Kalou na cava oqori ena vukuda. Ia ena so na gauna ni sega ni dau vakamaravutaka na wasawasa, e vakamaravutaki keda o Koya, oi keda na dausoko. Vuki Vua ena nomu leqa, ka na vukei iko o Koya.

iVakatakilakila

goneyalewa

Sa solia vei kemuni na Kalou na galala ni digidigi mo ni digitaka mo ni muri Koya ka yaco mo ni vakataki Koya. Ni ko vakayacora, o na vuli ga mai na nomu digidigi kei na cala kei na nodra digidigi na tani. E dina ga ni dredre me da sarava nodra digidigi na tamata ka vakararawataki iko, e rawa ni o vuli mai na veika sotavi oqori ka toso ki liu ena inaki, vakabauta, kei na reki.