“4 Na Sala Me Tokoni Kina na iTokani ena Matavuvale Lewenilotu Vakatikina,” Me iSakisaki ni iTabagone, Julai 2023.
Veivuke ni Bula
4 Na Sala me Tokoni kina na iTokani ena Matavuvale Lewenilotu Vakatikina
E rawa ni o vukea na tamata kecega me ra vakila ni ra lomani ka kauwaitaka ena lotu se cava ga na kedra ituvaki.
Na matavuvale e yaco mai ena kena veimataqali. O ira na tamata o raica ena lotu, me kena ivakaraitaki, era na rairai lewe ni matavuvale era sega ni lewe ni Lotu se ra sa digitaka mera lako tani mai na Lotu. Ni sega na veitokoni vakamatavuvale, e rawa ni dredre vei ira na tamata mera vakaitavi ena lotu, se vakila sara mada ga ni ra sa taukeni.
Oqori na vanua ena qai curu mai kina o iko!
E rawa ni o cakava e dua na itavi bibi ena kena vakalougatataki na veimatavuvale kecega, ena veimataqali ituvaki ni bula kecega. Oqo e vica na sala o rawa ni veivuke kina:
Droini mai vei Oksana Grivina
Masulaka na Sala mo Veivuke Kina
Masulaka mo kila na sala mo vukei ira ruarua era lako mai ki lotu kei na nodra matavuvale. Tu vakarau mo cakacakataka na isaunitaro o ciqoma.
Mo Kila na Matavuvale
Kevaka e rawa, tovolea mo kila na matavuvale taucoko nei nomu itokani. Oqo ena vukei iko mo kila na veitokoni cava e tiko vua na nomu itokani e vale kei na cava e vakadredretaka vei ira na nomu vakaitavi ena lotu. Ni sa yaco mo kila vakavinaka cake na matavuvale, sa rawa mo vakauqeti mo veivuke ena veisala eso e gadrevi.
Raica mo Bulataka Tikoga na Kosipeli
E vuqa na tamata era sa malele mai ki na Lotu ni ra raici ira na lewenilotu era bulataka tiko na veika era vakabauta. Ko na sega ni kila ko cei ena sarava. E rawa ni o rawata e levu na ka vinaka ena nomu bulataka na kosipeli. Ni ko vakayacora oqo ena vakalougatataka na nomu bula ka rawa ni vukea na kena vakavotui mai na rarama ni kosipeli vei ira era tu wavoliti iko.
Dau Yalovinaka
Kakua ni vakawalena na kena rawa ni vakayaco veisau levu na yalovinaka rawarawa. Me kena ivakaraitaki:
Kevaka o raica e dua e dabe duadua tiko e valenilotu, dabe tikivi iratou se solia me ratou dabe vata kei na nomu matavuvale.
Kevaka era sega ni rawa ni lako mai vakai ira ki lotu se ena so tale na itaviqaravi, dolele mo vakavodoki ira se sureti ira me ra lako vata mai kei na nomu matavuvale.
Sa ka bibi talega me ra okati o ira na nomu itokani ena itaviqaravi. Ena lailai beka na veisureti ki na itaviqaravi ni dua na tabanalevu se matavuvale, ia e rawa ni vukei nomu itokani me digitaka me volekata tikoga na iVakabula kei na Nona Lotu kevaka era nanuma ni ra sa okati.