“Tibwa te Bwai ae Ko Tatangiria,” Ibukin Kakorakoraia Kairake, Turai 2023.
Tibwaia Bwa Tera ae Ko Tangiria
Am tangira ibukin te euangkerio, ibukiia tabeman, ao ibukin te Uea e anganiko te mwaaka n tibwaua te euangkerio.
Ibukin te Kantaninga Aei, iroun Yongsung Kim, Havenlight.com
I moan kawara te Karaanga ae Ribble irarikin Preston, Engiran, n au tai ni beku ngke te kairake ni mitinare ngai n te British Mition. Ikanne, te Abotoro ao te mitinare ae Heber C. Kimball e bwabetitoiia ana moan aomata ake a rairaki nakon Ana Ekaretia Iesu Kristo ae kaokaki itinanikun Amerika Meang n Turai 1837.
Ngke I tei iaon te buriiti n taraa tinanikun te karaanga ao iangoia bwa tera are e riki ikekei. I karekea te mwaaka ni kakoaua Iesu Kristo ao Ana euangkerio ae kaokakl.
Au mwakuri ni mitinare bon te kakukurei, ae moan te tamaroa inanon maiu. N te bong aei, I aki toki n iangoia bwa tera te kimwareirei are e a tia riki nakoiu ni kabanea maiu n tibwaua ana euangkerio Iesu Kristo. I aki kona n iangoi bwaai tabeua rnakon aika a kakawaki riki.
Kainnanoan Tibwauaan te Euangkerio
Iangoia bwa aongkoa ko a tia n riki bwa ana reirei Iesu Kristo n Ana tai ni Mangauti. E kanga te kakukurei n aron are ko a tia n Nooria ao n ongo Ana rongorongo?
Tokanikain utin te Uea bon te rongorongo ni kakao ao taekan tibwauaan Ana euangkerio. E taku, “Ma ngaia ae kam na nako ni kakiritiania botanaomata ni kabaneia ” (Mataio 28:19), ao “kam na nako n aba ni kabane, n tataekina te euangkerio nakoia kain aonaba ni kabaneia” (Mareko 16:15).
Beretitenti Russell M. Nelson e katanoata bwa “ana euangkerio Iesu Kristo e tuai rangi n kainnanoaki ngkoa nakon riki te bong aei. … Bon tibwangara ae tabu bwa ti na tataekina korakoran ao ana rau Iesu Kristo nakoia aomata ake a kan ongora ao ni kan karimoaa te Atua inanon maiuia.”1
E kainnanoiko te Uea Ngkai
Kam maeka inanon te tai ae onoti ao man kakawaki—te kabanea ni bong imwaain Kauoakin Iesu Kristo. Te Burabeti Iotebwa Timiti e taetae ni burabeti bwa imwain manga okin riki te Uea, “koauan te Atua e na waakirake ni matoatoa, n rine, ao n inaomata, ni karokoa e tokanikai n waakina ni kabanei aaba, ni kawari ni kabane taabo , kaitiaki aaba ni kabane, ao tang inanon taninga ni kabane, ni karokoa e kakoroaki oin bukin ana mwakuri te Atua, ao Iehova ae korakora ane e taetae bwa e a tia te mwakuri.”2
Antai ae e na buoka katiaan aei? Ngkoe!
Tiaki nanona bwa ko na riki bwa te mitinare ae bwanin ana tai n tibwaua te euangkerio. Te Uea e kainnanoiko ngkai ni karaoan tibwauan Ana kimwareirei, kakawakin te euangkerio ae akea tokina n te taeka ao te mwakuri n te aro ni maiu ao ni mwakorona bwa antai ngkoe.
Katurua am Iango iaon te Tangira
Te kabanea ni kakawaki bwa bukin tera ti tibwaua te euangkerio bon te Uea e tuangiira bwa ti na karaoia. N tabetai e kona n riki aei bwa te kakaewenako, ma I berita bwa ngkana ko katurua am iango iaon te Uea Iesu Kristo ao mwaitira am tangira Ibukina ao mwaitira Ana tangira ibukim, ko na bon kairaki inanon am kekeiaki.
E a Manga Uti,, iroun Greg Olsen
Am tangira ibukin te euangkerio, ibukiia tabeman, ao am tangira ibukin te Uea e na anganiko te mwaaka ni butimwaea Ana kakao ae mai ieta n tibwaua Ana euangkerio.
Tangira te euangkerio
E taku te Uea, “Reirei Irou” (Reirei ao Berita aika Tabu 19:23; Mataio 11:29). Mwaitin am kamatebwai riki iaon te euangkerio ao reiakinan Iesu Kristo ao Ana mition ae tabu ngkai te Tia Kamaiu ao te Tia Kabooira, e na rikirake riki tatangiran te euangkerio.
Ko tibwaua am tangira ibukin te euangkerio ngkai ko maiuakinna. E reirei te Abotoro ae Bwauro, “Ko na riki ba aia tia kakairi aomata aika onimaki, n te taeka, n te aro ni maeka, n te tangira, n te onimaki, ao n te itiaki’ (1 Timoteo 4:12). N taainako aomata a kai butimwaea te euangkerio ibukina bwa a tia ni karekea te taneiai ae tamaroa ma membwa n te Ekaretia. Taiaoka tai maiu inanon karabaakin arom. “Kam na kaoti ami oota” (Mataio 5:16) ao kaotia nakoia tabeman bwa te euangkerio bon mwakorom ae kakawaki bwa antai ngkoe ao tera tibwangam.
Tangiriia Tabeman
Iangoi Aroia Raoraom. Ko tibwauai am tamnei, katangitang, ao amwarake ake ko tatangiri ma ngaiia? Ko tibwauai am tarena ao bwaai ake ko tatangiri ni karaoi? Tao ko na bon miimi ngkana a kan ongora nakon te euangkerio ngkana ko tibwauaia ma ngaiia. Ko na bon aki ataia ni karokoa ko kataia. Beretitenti Nelson e reirei, “aomata ni kabane a riai ni karekea aia tai n reiakina ana euangkerio Iesu Kristo are e a tia n kaokaki3
Kawariia raoraom inanon te tangira, kaain ami utu, kaain rarikim, raom n reirei, ao tabeman—uringa bwa bon ngaiia tarim ao mwaanem ao natin te Tama are i Karawa aika a tangiraki—ao ko na kunea bwa e na bebete iroum tibwauan te euangkerio ma ngaiia.
Tangira te Uea
Ngkai ngaira membwa n Ana Ekaretia Iesu Kristo ibukiia Aika Itiaki ni Boong aika Kaitira, ara rongorongo nakon te aonaaba bwa e bon maiu Iesu Kristo! E a tia n anganiira bwa ti na konaa ngaira n tatabemaniira ni karekea te kamaiuaki ao te karietataaki.
Ko na namakin ana tangira te Uea ibukim ngkai ko iangoi raoi bwaai ni kabane ake E karaoi ibukim. Tamneim e na kaonaki n te tangira Ibukina, ao ko na kunea bwa kona tangiria ni kan tibwaua tamaroan te koaua are ko karekea mai Irouna.
Te Korakora E na Riki bwa Kimwareireim
Au taneiai n te maiu n tamnei ae kaungaunano iaon te buriiti iaon te Karaanga ae Ribble inanon au tai ni mitinare ngke I kairake e anganai te kimwareirei ae akea tokina are e beritanaki nakoia koraki ake a tibwaua te euangkerio (taraa Reirei ao Berita aika Tabu 18:15).
Ngkai ana Abotoro te Uea Iesu Kristo, I rang kakoaua n te bong aei bwa tibwauan te euangkerio bon te kimwareirei ao kakawakin kaotakin ara tangira ibukin te euangkerio ae kaokaki, ibukiia natin te Atua, ao ibukin te Uea.
Unimwaane Cook e marooro ma kairake ake a kamaiuaki man te Warekeno ae Taal i Batangs, Biribin, n Tianuare 15, 2020.
I kakoaua bwa ngkana ko kariaia ana kakao te Uea ao n tibwauaia bwa tera ae ko tangira, ko buokia ni katea Ana Ekaretia ao ni katauraoa te aonaaba imwain Okina, ngkai E na tautaeka bwa aia Uea Uea ao …aia King King.”4 I tataro bwa ko na toua Mwiina ao n tibwaua Ana euangkerio inanon maium.