“Kaainakin Teuana te Tiim,” Ibukin Kakorakoraia Kairake, Turai 2023.
Katiteuanaaki ma Toau
Ngaiia uoman ake a kakairiribai n te reirei a riki bwa rao ae a teimatoa.
Korotamnei Iroun Jeffery Barker Edwards
Ai bon tii onoua te wiiki n ana mition Titita Dil i Aotiteria ngke e a kunea bwa e na kabanea ana wiiki akanne ni mwakuri ma Titita Tuala!
“Bon te kabanea ni bwai are I aki tangiria bwa e na riki,” e taku Titita Dil.
Titita Dil ao Titita Tuala a kaman tatakaro ibukin aia reirei ae rietaata kaain te tiim n takakaro n te bwatiketibooro ae rianako aroia i Auckland, New Zealand. A bon kakairibai. A bon aki toki n tatakaro imarenaia n aia kabanea ni kaboo, ao a bon aki iraorao imarenaia.
“Ni karaoia bwa te rongorongo ae uarerekea,” e taku Tuala, “ti otinako man te tabo n takakaro ma te nanangaua ao te nukunkun.”
Titita Dil ao Titita Tuala a kabanea aia tai ae mwaiti ni kataneiai ao n takakaro n te bwatiketibooro. “Te watiketibooro e rang kakawaki iroura,” e taku Titita Dil.
Imwiin aia angabeeba man aia reirei ae rietaata, ngaiia ake uoman a namakina te kukurei ni karaoa aia mwakuri ni mitinare—e ngae ngke akea mairouia ae namakina te kan beku mai imwaina.
Karaoan te Rinerine ni Beku
Ibukin Titita Tuala, e anaa te tai kaetan nanona ma ana kantaninga te Uea. “Bon 21 au ririki ngke I karaoa au babaire ni mwakuri iaon ana wirikiriki te tamnei,” e taku. “I bon karaoa au kabanae ni kekeiaki ni karokoa are I a toka n te wanikibwa.”
Titita Tuala e roko n ana mition i Aotiteria inanon butin te aoraki ae te COVID-19, ao e ngae ngke e bon matoa, e rangi ni kakaitau ngkai e iangoia bwa e na beku.
“Akea iangoana ae boni ngai naba anneTitita Tuala ngke e koro 21 au ririki. I namakin ae I a taraa ni ikawai.”
Titita Dil e karekea ae “itiaki ao e ineti” te wirikiriki n tamnei bwa e na karaoa ana mwakuri ni mitinare ngke e karekea ana kakabwaia mairoun te tamananuea. Imwiin tabeua te tai, e iangoia n rimwiin ana wirikiriki te tamnei ni beku, ibukina bwa “ana kantaninga te Uea bon te kawai ae eti n taainako ao te rinerine ae tamaroa.” E roko te wewete, ao karin ana bwai n ana baeki ni beku i Aotiteria.
Katiteuanaaki ma Toau … n ae Raroa
Tii ibukina ngkai a karaoa aia mwakuri ni mitinare n te mition ae ti teuana tiaki nanona ae a riki naba bwaa rao n te tai ae waekoa. Imwiin kairiribaia n te tai ae maan, Titita Tuala e bon matoatoa iangoana bwa a na kona n iraorao imarenaia.
Ni koauana, ana moan bong Titita Tuala ngke e noora Titita Dil, ana moan iango bon, “I aki ataia bwa tao ngkana N na tangiria.”
Tokin te Bobuaka
Ngaia are ngke Titita Tuala ao Titita Dil a mwiokoaki bwa a na uaia ni beku, e bon rangi ni kamiimi.
Aia iango ni kauoman e bon tiku iaon te tabo ni bwatiketibooro ma aroia n takakaro. Aia iango n ibukibuki i bon imarenaia bwa temanna e kakanunuun, aki kan kokonaaki ao n iowawa.
Ma bwaai a moanna ni bitaki ngke a moanna ni kinaia imarenaia. Titita Dil e a tibwa ataia ae Titita Tuala bon “te kaitara a tamaroa” are e a tia nonoria n taainako. “Bon te aine ngaia ae rang tatangira—temanna mai ibuakoia toau ae rangi n tatangira are I beku ma ngaia,” e taku Titita Dil.
Titita Tuala e karekea te taneiai ae tii te arona. E aki kaman ataia are ana namakin ni kairiribai nakon Titita Dil e a tia riki “kanga te bobuaka ae e a mate” inanon maiuna.
Namakin aika aki raoiroi akanne n te bobuaka ao te momotikitaeka a bon oneaki mwiia ma te tangira ao te mataata ngkai neiei e moanna n nooria bwa antai raoi Titita Dil. Ao e ngae ngke Titita Tuala e taku bwa Titita Dil e bon aki bati ni ngoongo, e kunea bwa Titital Dil e bon konaa n taetae!”
N aia kukune ae boou ngkai a iraorao, Titita Dil ao Titita Tuala a tibwa ataia bwa tao a na aki kairiribai mai imwiin aei.
“N tain te bwatiketibooro ko kateia n am iango are tina riai n tokanikai, ao tiim ake tabeua bon ara kairiribai,” e taku Titita Dil. “Ao ngkana e a toki te bwatiketibooro, ao ko a tibwa ataia, ‘O, ngaiia bon tiaki ara kairiribai. Ni bon arona bon tiaki raoi ngaiia kariribai.’”
Ngkai, Titita Dila ao Titita Tuala a nooria bwa a toka n te tiim ae ti teuana”—ana tiim te Atua.
Kristo i Buakoia, Iroun Judith A. Mehr
A na anga karea Iesu Kristo bon ibukiia aomata ni kabane
Titita aikai a namakina bain te Atua bwa tooa ngaia n aia mwakuri ao n ataa mwaakan Ana Mwakuri Kamaiu Iesu Kristo ni anganiia te taneiai ni kamaiu ao ni bitaki.
“Iesu Kristo e karao te anga karea bwa e aonga bwaai ni kabane ake a nakobuaki n taai ake ngkoa bwa a na kona ni kamarurungaki, ni kaetaki, ao ni katamaroaki,” e taku Titita Dil. “Ti kona n ibuobuoki. Ti kona ni mwaninga. Ti kona ni kakoaua bwa tabeman a konaa ni bitaki.”
Tiaki tii Titita Tuala ao Titita Dil ni kamarurungaki n aia bobuaka, ma a reiakinna naba bwa e kanga tarakiia tabeman ngkai a taraaki iroun te Atua.
“Rokou ni mitinare ikai ao ni kona n noora toau ao tabeman aomata inanon te ota ae kaokoro, I a tibwa ataia are aia karaki aomata ni kabane bon bwaai aika a riiriki. “Ao aomata ni kabane a kainnanoa Ana Mwakuri ni Kamaiu Iesu Kristo.”
A reiakinna are e ngae ngke e kona ni kangaanga, e bon riai ibukiia aomata aika uoman ake a tia n taraiia ngkoa bwa kairiribai n tatabeman n roko n ikotaki rinanon te tangira.
E aki taraaki bwa iraua am ririki ke anuan tamarom,“ e taku Titita Tuala, “ke tao ngkoe ae akea am onimaki ke te tia onimaki ngkoe.
“Ngkana I kaai ni mwakuri ma temanna are akea irekerekeu ma ngaia, ao ngaira ake uoman ti roko n ikotaki ibukin teuana oin te kantaninga, ngkanne tabeman aomata a konaa naba.”