“Ngkana E Kammarakiko Aia Rinerine Tabeman,” Ibukin Kakorakoraia Kairake, Turai 2023.
Ngkana Aia Rinerine Tabeman A Kammarakiko
Aikai bwaai tabeua are ko na uring ngkana tabeman aomata a kabonganai inaomataia n rinerine n te aro are ko na maraki iai.
Kabwarabwara n te tamnei iroun Shana Keegan
Ko karaoi rinerine aika a mwaiti ni katoa bong—tera ae ko na bwainna, tera ae kona kanna n teingabong, antai raoraom ake kona raoniia. Inaomata n rinerine, ke inaomatam n rineia ao ni mwakuria, bon te bwaintaninga ae korakora are E anganiira te Atua.
Ara rinerine naba a karekei kangaanga, ao tabetai aia reinerine tabeman aomata a kona ni kamarakiira. Ngkana ko a tia ni katuaeaki man te bwai ae karaoia tarim, ko na ataia bwa e kanga te kakaewenako are e kona n riki ngkana tabeman aomata a kabonganai inaomataia n rinerine n te aro are ko aki tangiria!
Ma n tabetai iai riki bwaai aika a buakaka ake a kona aomata ni kabonganai inaomataia iai. Ataei n te reirei a kona n iowawa nakoim, ke tao kaain te utu a iangoia ni kitana te Ekaretia. Iai mwaitin taai ngkana te maiu e taraa n aki boraoi man katanginano. N anne, ko kataia ni kabongana inaomatam n rinerine ni karaoi rinerine aika eti—ma aera aki karaoia?
E koaua, ko aki kona ni kairiia tabeman. Ma te rongorongo ae tamaroa bwa ko kona ni bitiko ngkoe. Bairean mwakuriana bon te bitaki bwa tera are ko katurua am iango iaona ao ni karaoa te rinerine ae tamaroa riki ngkana tabeman aki.
Aikai tabeua bwaai ake ko na uring iaon te waaki rake ma te onimaki, riki ngkana tabeman aomata a kabonganai inaomataia n rinerine n te aro are ko maraki iai:
-
Tatan e ukoria n kamauna te inaomata n rinerine (taraa Mote 4:3). E ngae ngke e kangaanga n taraia tabeman ni karaoi rinerine aika buakaka, ko bon inaomata ni karaoi rinerine n tou mwiin Iesu Kristo ao n riki n ai Arona!
-
Am mwakuri iai mwiina. Uringa, “Ti bon inaomata n rinerine, ma ti aki kona n rinea te kangaanga.”1 Nooran aia rinerine tabeman aomata ake a rootiko a kona n riki bwa te kauring ae tamaroa ibukim ni karaoi rinerine ake a na aki urua arom ke tabeman.
-
Ni kabane aomata a na bukinaki ibukin oin aia rinerine (taraa Reirei ao Berita aika Tabu 101:78). Ko riai n aki karawawatako n am namakin ni bukintaeka ibukin bitakiia tabeman aomata ke aia rinerine. N onea mwiina, ko kona ni katurua am iango iaon karaon babaire aika a tamaroa ao n toua mwiin Iesu Kristo.
-
Ko kona ni rineia bwa ko na akoi. E na kona temanna n rangi n iowawa nakoim, ma ko kona n teimatoa n akoi nakoia. E anaa te ninikoria n akoiia aomata ao ni kabwarai aia bure ngkana a buakaka nakoim, ma anne raoi te bwai ae karaoia Iesu (taraa Ruka 23:34).
-
Ko riai ni katuruturu iaona bwa tera ae ko kona ni kairia. Ko aki kona ni katokiia am karo man karaoan aia buuraure, n aron te katooto, ma ko kona n rineia ni katurua am iango iaon kawain te berita, buokiia tarim ma mwanem, reiakina aron te reitaki ae kamarurung, ao karaoan te kouru ibukiia am utu ibukin taai aika a na roko. Rineia ni bitii am kangaanga nakon aanga ni kabwaia n rikirake ao nreiakinaki.
-
Iai rikim ae tabu mai iroun te Atua ao bukin rokom n te maiu aei. Ngkana ko uringa kinaakim ngkai natin te Atua ao ni manga katurua am iango iaon am kouru n te maiu aei, ko kona n namakinna bwa tera aroaro aika a riki. Katurua am iango iaon bukin rokom n te maiu aei ao n noorana bwa kakaewenako aikai bon tii mwakoron karakinan maium are e kona ni buokiko ni waaki rake ma te onimaki.
-
Rinanon onimakinan Iesu Kristo, ko kona ni kunea raum ibon iroum, riki ngkana bwaai ake a katobibiko akea raum iai. Beretitenti Russell M. Nelson e taku, “Ti kona n namakina te rau ao te kimwareirei, riki inanon taai aika kamangaongao.”2 Te maiu ai bon aron buakan taari, ao e bon bebete bwa n ara kantaninga ao e na kona te Atua ni boai angibuaka akanne inanon maiura. Ma tabetai n onea mwiina kanakoraoan taari bwa e na raoi, E karaui nanora, ngaira aika kaimoa. Bubuti Nakoina bwa E na buoka am kangaanga, ao E na buokiko.
Te Atua e anganiko te inaomata n rinerine n te aro bwa ko kona n rineia n toua Mwiina ao ngkanne ko na riki n ai Arona. Ngkana ko karaoia, ko na bon reiakinna man am rinerine ao am kaairua ao man aia rinerine tabeman. E ngae e kangaanga ni mataku ni karaoan aia rinerine aomata ae a kamarakiko, ko kona n reiakinna man taneiai akanne ao waaki rake ma te kantaninga, onimaki, ao kimwareirei.