“4 Kawai ni Boutokaia Rao Ake A Maeka ma Tiaki Membwa n Aia Utu,” Ibukin Kakorakoraia Kairake, Turai 2023.
Maium Buokana
4 Kawai ni Boutokaia Rao Ake A Maeka ma Tiaki Membwa n Aia Utu
Ko kona ni buokiia aomata nako n namakina te tangiraki ao te mwannanoaki ibukin te ekaretia n aki ongea aia kangaanga.
Utu nako a roko n aroia aika a kakaokoro. Aomata ake ko nooria n te taromauri, n aron te katooto, a kona n iai kaain te utu ake tiaki membwa n te Ekaretia ke ake a tia n rineia bwa a na aki iriira ana waaki te Ekaretia. N akean te boutoka man te utu, e kona ni matoatoa ibukiia aomata n roko n te taromauri, ke n namakina ae a riki bwa kaaina.
Anne are ko roko n rinnako!
Ko kona ni karaoa te nakoa ae kakawaki ni kakabwaiaiia aekan nako utu, inanon aekan nako kangaanga nii kabane. Aikai tabeua kawai aika ko kona n ibuobuoki iai:
Te kamataata n te tamnei iroun Oksana Grivina
Tataro ibukin Kawai n Ibuobuoki
Tataro n ataia bwa ko na kanga ni buokiia koraki ake a roko n te taromauri ma aia utu. Tatauraoi ni mwakuri iaon taian kaeka ake ko karekei.
Kataia ni Kinaa te Utu
Ngkana e riai, kataia ni kinaiia ana utu ae bwanin raoraom. Aio e na ibuobuoki n ataakina bwa tera boutokaan raoraom ni mweengna ao tera te kangaanga are tuuka rorokona n te taromauri. Ngkai ko a tia raoi ni kinaia te utu, ko kona ni kairaki mai ieta n ibuobuoki ni kawai aika onoti are e kainanoaki.
Kakoaua bwa ko Maiuakina te Euangkerio
A mwaiti aomata a kukurei n te Ekaretia ngkana a noriia membwa ni maiuakin bwaai ake a kakoaua. Ko aki kona n ataia bwa antai ae taratara. Ko kona n kakoroi nanon bwaai aika a bebete man maiuakinan te euangkerio. Man karaoana e na kakabwaia maium ao ni kona ni uota ootan te euangkerio nakoia koraki ake a katobibiko.
Eng Bwaina te Akoi
Tai katautaua bwa e kanga te akoi ae bebete ni kona ni karika te kaokoro ae bubura. Ibukin te katooto:
Ngkana ko noora temanna ae tekateka n tii ngaia n te taromauri, tekateka irarikina ke anganano n tekateka ma am utu.
Ngkana aaki kona n roko n te taromauri ke waaki ni kakukurei i bon irouia, katokaia n am kaa ke kaoiia bwa a na airii ma am utu.
E kakawaki naba reitakiia raoraom inanon waaki ni kakukurei. Te kakao nakon ana waaki ni kukurei te uoote ke te utu e na taraa ni uarereke, ma e na kona ni buoka raoraom n rineia n tiku ni kaan nakon te Tia Kamaiu ao Ana Ekaretia ngkana a namakinna bwa a mwaneaki raoi.