“Itiua te Bong n Tibwauakin te Euangkerio,” Ibukin Kakorakoraia Kairake, Turai. 2022.
Itiua te Bong n Tibwauakin te Euangkerio
Ko kona n tibwaua te euangkerio n arona ae riai ao ae ti taneiai iai. Ko tauraoi ibukin te kakaewenako?
Ngkana ti marooro iaon tibwauaan ara koaua, ti aki toki ni iangoia bwa ti na kaota ara koaua n tain te bootaki n toa ke tabeua taai aika a baireaki. Ma ti kaungaaki n “tarai taai ake ti kaotii iai ara onimaki n arona ao aanga aika ti taneiai iai.”1
Inanon itiua te bong ni kakaewenako ae inano, ko kona n tibwaua am koaua ni kawai aika a kakaokoro ni katoa bong n te wiiki. Ko kona ni karaoi bwaai aikai ni baireana, ke ko kona ni karaoia n oin am iango! Ko a tauraoi nakon te kakaewenako?
Kamataata n te korobanna iroun Emily Davis
Bong 1: Ekaretia
Iangoia ni kaota am koaua n tain te aki mamatam ao te bootaki ni kaoti koaua n te taromauri ngkana anne te bwai ae ko mwengaraoi iai. Ngkana tiaki, ko kona naba n tibwaua am koaua n te taromauri man irakin am kiraati n te Tabati ao n te tieminari. Am taetae are ko tibwaia ikanne e kona n tabekarake tabeman ao ni kakorakorai aia koaua n ai arom.
Bong 2 Raoraou
Tera ae ko reiakinna n te taromauri n te Tabati? Ko tangira te bwai are e tibwauaia temanna n te bootaki n toa ke inanon te marooro n am kiraati? Tao te anene ni kaukuuki bon teuana man te anene n taromauri ae mamaten nanom. Taekinna nakon raoraom! Ngkanne titirakiniia taekan naba aia wiikente.
Bong 3: Bwaai n Reitaki iaon te Intanete
Te bwai n reitaki iaon te intanete bon te tabo ae korakora n tibwauaan bwaai n te maiu n tamnei n arona ae riai ao ae taneiai te aba iai. Ibukin te bong ni kakaewenako aei, iangoia n tibwaua am bouti iaon:
-
Teuana man am kibu ni koroboki aika tabu.
-
Te reirei ae kaunganano man te maungatabu ni Kabuta.
-
Te iango ke taneiai n te maiu n tamnei.
-
Te bwai teuana ae ko tatangiria ke ni kakaitau ibukin te Tia Kamaiu.
-
Te kawai are E a tia ni buokiko n te tai ae aki maan ke tamaroana are ko kamoamoa iai Irouna ao bukin tera.
Bong 4: Tekiti ke Witeo
Kanakoa te rongorongo ae kaunganano nakon te rao rinanon te tekiti ke witeo. Ko kona n tibwaua te reirei man te maungatabu are ko taku bwa a na kona n tangiria, tuangiia te bwai teuana are ko kakaaitau iaoia, ke tibwaua am onimaki iroun Iesu Kristo. Ibukin kairaia, a na riai ni kainanoia n ataa taekan ana tangira Tamara are i Karawa ibukiia. Ko kona n tuangiia bon nakoia naba!
Bong 5: Mwakuri n Ibuobuoki
Ko bae n titiraki bwa e kanga te mwakuri n ibuobuoki nakoia tabeman ni kona n riki bwa te kawai n tibwaua am koaua. Te Abotoro ae Bwauro e tuanga Timoteo, “Ko na riki ba aia tia kakairi aomata aika onimaki, n te taeka, n te aro ni maeka, n te tangira, n te onimaki, ao n te itiaki’ (1 Timoteo 4:12). Ngaia ko kona ni kaota am onimaki rinanon te banna ni katooto, man te mwakuri n ibuobuoki nakoia tabeman ngkai te Tia Kamaiu e buokiia.
Bong 6: Korobanna
N tabetai aomata a kabonganai korobanna n aron te kawai ae kaokoro n tibwaakin aia iango ao namakin. Ko kona ni kabonganai korobanna, mwakuri aika a kaaraki man te atibu, kamatenano, katangitang, ke aekan nako korobanna n tibwauaia bwa e kanga am namakin n taekan Iesu Kristo ao Ana euangkerio.
Bong 7: Marooro aika Aki Baireaki
Tai maaku ni mwanewea am koaua n te tai ae aki baireaki, n aron ae ko kona n tibwauai tabeua iango are iai iroum iaon am taobiki.
Ko kona, eng ni marooro iaon ana waaki ni kakukurei te Ekaretia ke te kibu are ko a bon tibwa warekia, ma e kona naba n riki n aki baireaki nakon anne. Ibukin te katooto:
-
Ngkana e kaungaaki am namakin ni bwain te aba, kaota am kakaitau n ana karikibwai te Atua nakon temanna riki.
-
Tao ko karekea te taneiai n te maiu n tamnei aei rau n te tai ae aki maan. Tuanga raorom taekana ngkana e aki kaineti nakon temanna.
-
Kakaea katotongan te euangkerio n te boki ke tamnei ae ko tangiria, ao tibwaa am nonoori.
Arona ae Riai ao ae Taneiai te aba iai
Ngkai ko kunei kawai aika a kkaaokoro n tibwaua am koaua, e na rikirake man rikirake ao ko na taneiai ni kakaraoia. E na namakina te waremwe n te moan tai, ma e raoiroi! Uringa, am koaua anne e a kaman taneiai nakoim—ai bon mwakorom bwa antai ngkoe. Tibwaakina e kona n riki bwa te taneiai naba. Arona ni karaoaki bon taekinana teutana ni katoa bong.
Ko na kanga n tibwaua am koaua n te bong aei?