“Ikotiia—Tai Kamaenakoia,” Ibukin Kakorakoraia Kairake, Turai 2023.
Nakomai, Iriirai
Ikotiia—Tai Kamaenakoia
Te Atua e aki kaota te aro n inanonano ibuakoia aomata, ao ti riai naba ngaira n aki.
Kamataata n te tamnei iroun Travis Constantine
Tabeua wiiki imwin rokou i Tiaman ngke te mitinare, Ngai ma te tia reiakinai ti karebwerebwe iaon ana mataroa te unaine, are e kariaia bwa ti na reirei ma ngaia.
Inanon ara moan reirei, ti kaoa bwa e na wareka te koroboki ae tabu ni kabaibati. Rinanon matentenin ana kiraati, iai te kangaanga n ana wareware, e baebae ana wareware iaon taian taeka. Ana kaeka iaon ara titiraki a bon kimototo. Ti aki koaua bwa mwaitira mataatana.
Ti tuangnga bwa e na wareki mwakoro ake a rineaki n ana Boki Moomon imwain rokora are imwina. Ngke ti a manga oki, e a tia ni warekii ma e taraa n aki mataata iai. Ti iango bwa tao iai tabeua ana kangaanga ma reiakinana. Ti iango ngkana ti riai n reitinako n reirei ma ngaia. Ma ti bon reitinako.
Rokora are imwina, ti bon kubanako ngke e taku bwa e a tangiria ni kan bwabetitoaki. Ngkanne, ti a reitinako n reireinna, ti a nooria bwa e a nakoraoi riki aron ana wareware. Ana kaeka nakon ara titiraki a bon kimototo ma a taraa n tamaroa ao a eti.
I a manga kamwaingaki nakon te kaawa ae kaokoro, ma au tia reiakinai e koroboki imwina n taku bwa te aine aei e a tia ni bwabetitoaki ao ni boutokaaki irouia membwa n te mwaanga. Ngkana ko a tia n titirakiniira inanon wiiki ake mai imwaina bwa antai ara reitaki ni kabane ake a nang bwabetitoaki ao n riki bwa membwa n te Ekaretia, a na bon akea iangoana iroun neiei are ngaia are e na moan bwabetitoaki.
Ao ti reiakina te reirei ngkoa—te reirei ae ti te arona are e reiakinna te Abotoro Betero ngkoa are ngaira n tatabemaniira ti kainanoa te reiakinaki: Te Atua e aki inanonano n tarakiia aomata” (Makuri 10:34).
Te Bitaki ae Bubura
Betero e kairiiri iaon te Ekaretia inanon taai ni kangaanga. Te Tia Kamaiu e tuangiia Ana Abotoro, “Kam na nako n aba ni kabane, n tataekina te euangkerio nakoia kaain aonaaba ni kabane” (Mareko 16:15). Ma n anne a kaman kabwarabwara ao ni bwabetito tii ibuakoia Iutaia.
Ngkanne mwaitin bwaai aika a tamaroa a riki. Mataniwia ana tanga ni buaka Rom ae arana Korenerio—te I Tientaire, tiaki te Iutaia, te tautia are tii te arona ana kaboraoi ma koraki ake a taura Iesu Kristo—e noora te anera n te mii. Te anera e tuanga Korenerio bwa e na nakon te mwaane ae arana Betero bwa e na reireinna. E aki maan imwiin anne, Betero e karekea te mii n te aro are e noora te amwarake are e tabuaki iaan tuan Iutaia, ma e tuangaki bwa e na kanna ibukina bwa e a tia te Atua ni kaitiakia. Imwiin reken miin Betero aei, ana toro Korenerio a roko ao n tuangnga bwa e na iriia. E tuangaki Betero iroun te Tamnei bwa e na iriia.
Imwiin kaitiboona ma Korenerio ao e nooria bwa te mwaane ae tamaroa ao e kokoaua, Betero e a ataa nanon miina ni burabeti. Te euangkerio e kainnanoa karokoana nakoia Tientaire n ai aron naba Korenerio. Anne ngke e taku Betero, “Man te koaua are I ataia bwa te Atua e aki inanonano n tarakin aroia aomata: ma e tangiraki Irouna ane e maakua, ma ni karaoa te raoiroi” (Mwakuri 10:34–35). Betero e reireina Korenerio taekan Iesu Kristo ao e kaoia ma kaain batana bwa a na bwabetitoaki. (Taraa Makuri 10.)
Uotakin te euangkerio nakoia Tientaire e karekea te bitaki ae bubura ibukin te Ekaretia n taai akekei. E bon kangaanga irouia tabeman aomata bwa a na butimwaea te bitaki aei. Ma bon te bwai ae eti, ao e reiakin aan koaua ibukin taekan te Atua ao raora n aomata ngkoa.
Akea te Nanonano
Ngke E kakabwaiaiia Natina, te Atua e aki kaota te aro n inanonano ni kaeti ma te aba, reeti, te mwaane ke aine, kaubwai, reirei, atatai, taraakim, ke kakaokoron bitaki tabeua are e karaureia aomata.1 Bwa “titebo aomata ni kabane iroun te Uea; ane e raoiroi e na nanonaki riki roun te Atua” (1 Nibwaai 17:35). Ni kabane a kona n roko Nakoina, ibukina “titebo aroia ni kabane Imatana” (2 Nibwaai 26:33). E “taraa te nano” (1 Tamuera 16:7). Te Uea e tangiriia ake a “karaoa ae eti, … tangira n nanoanga, ao … nakonako n nanorinano” (Mika 6:8).
Temanna ae kona n roko nakon Iesu Kristo, karaoa te berita ae tabu ma Tamara are i Karawa, ao tou mwiin Aia kawai. Ao te koaua aei e riai ni kairira bwa e kanga tibwauaan ana euangkerio te Uea ao Ana tangira.
Ti na aaki taraa aron tein anuan te aomata ao n iangoia bwa aki tau n “aroia” ibukin te euangkerio. Ti na aki kabotaua ana waaki te aonaaba nakoia aomata ao n iangoia bwa waaki ni kabotau akanne a na kakeai aroia ae tau man katinanikuaki n te aro. Ti na aki baireia ae ti na aki buoka temanna ibukina ngkai a kaokoro aroia n tautaeka, te bwai ae tatangiria, ke nanoia ae a tangiria mai iroura.
Te Atua e aki taraa te aomata bwa a baireaki man kinakiia bwa a tei man kurubu aika a mwaiti ke anuan maiuia. E nooriia n tatabemaniia—Natina. Ao anne arora bwa ti riai n taraia aomata n tatabemaniia—ngkai akea aron kabotauaia n tatabeman ma ti te arona aia tai ao wanawanaia n roko nakon te Atua.
Riki bwa te Tia Ikoikotiia
Beretitenti Russell M. Nelson e kaungaiira bwa ti na iri n ikoikota Iteraera.2 Ma ngkana ngaira, ti aki ti te arona ma te Atua, n rineia n inanonano n tarakin aroia aomata” ngkana e roko tibwauaan te euangkerio ao n ikotiia aomata n te ekaretia, ti na bon kamaenakoia ke bwenauaiia riki nakon are ti ikoikotiia ao ni katiteuanaia.
Ti karaoa te motinnano ngaira n tatabemaniira: akea te kamaenakoaki. Ko na Riki bwa taan ikoikoti. Tangira, tibwatibwa, ao kakao.
Ngai ma toau ti aki koaua raoi ngkana te aine are ti reireinna i Tiaman e bon tangiria ni kan bwabetitoaki. Tiaki ataa nanona, ma te Atua e ataia. I kukurei bwa ti namakina ana wirikiriki te tamnei n teimatoa n reireina neiei.
Ngkai ko kataia n tou mwiin te Tamnei ao ni kataia n aki inanonano n tarakin aron te aomata, ko na kairaki bwa ko na buokiia koraki ake a mena iraikim n roko nakon Kristo, n aki tarai kabwakaia.