“Ko na Riki bwa Kaekaan Ana Tataro Temanna,” Ibukin Kakorakoraia Kairake, Turai 2023.
Nakomai, Iriirai
Riiki bwa Kaekaan Ana Tataro Temanna
Iriiran ana wirikiriki te Tamnei e buokiira ni karao te bitaki.
Such as I Have I Give unto Thee [Ma ae Iai Irou ao I Anganiko], iroun Walter Rane
Betero ao Ioane a kamarurunga temanna te mwaane n te tembora.
Kona namakinna are ai bon akea te bwai are ko na aanga. Ma iai am onimaki iroun Iesu Kristo, ao am onimaki Irouna e bon tau ni kairiko nakon tabeua tamaroan bwaai.
Teutana mwiin maten ao mangautin Iesu Kristo, Betero ao Ioane a nako n te tembora, ike temanna te mwaane ae aki kona n nakonako e tekateka itinaniku ao ni bubuti buokana.
Betero e taku nakon teuarei, “Akea au tirewa ma au koora; ma ae iai i rou ao I anganiko: Ko na nakonako n aran Iesu Kristo are te I-Natareta” (taraa Mwakuri 3:6; e kairaki ma katuruturuana).
Betero ao Ioane a a kateirakea iaon waena. N te moan tai inanon maiuna, te mwaane aei e a kona n tei. E nakonako ao e kibakiba naba ibukin kimwareireina. Ana onimaki Betero iroun Kristo e anganna te ninikoria ni kamarurunga te mwaane man mwaakan te nakoanibonga.
N anne, tina riki ni okoaua. Kam na bon aki kona ni kamarurunga arorakiia aomata n taainako. Ma ami onimaki e kona n ibuobuoki ni kawai tabeua. N aron Betero, bwa tera are iroum, ko kona n anga.
Tamnei man Getty Images
Karaoan te Bitaki
Ko a tia n tataro n namakinna bwa ko aki maroaa? Ke temanna e na riki bwa raoraom?
E a tia temanna n roko, tareboon, ke tekiti nakoim n te tai anne? A na bon tia n ririmwiin te wirikiriki n tamnei ao ni kataia ni katamaroa, n ai arom. Ni kabane ake a karaoi bon te onimaki ni kabongana teutana man aia tai, teutana man ninikoriaia, ao teutana man te akoakoi—n taekana teuana, bwa tera are iai irouiia. Ngkoe naba e kona ni butuiko am onimaki bwa ko na mwakuri iaon ana wirikiriki te tamnei .
E taku Unimwaane Ronald A. Rasband man te Kooram n Abotoro n te Tengaun ma Uoman: “Ti karekea tibangara ae tabu n reiakinna ni kinaa [te Tamnei ae Raoiroi] kairiiri inanon maiura ao ni kaeka.”1
Ko aki kona n nooria tii ngkana ke ko a tia ni karaoa te bitaki n ana bong temanna, ngaia are e kona ni matoa nooran oin bukin ririmwiian te wirikriki n tamnei.
Ngaia are, kataia ni beku—karaoa are ko konaa—e na anganiko namakinan te kukurei ao tian te mwakuri riki ngkana akea mwiina ae ko nooria n taainako. Ngkana ko kakaungo nakon ana wirikriki te tamnei, te Tamnei ae Raoiroi e na buokiko n reiakinna bwa e kanga te beku ibukiia tabeman, riki inanon te ribwa n tai. Unimwaane Jeffrey R. Holland man te Kooram n Abotoro e reirei: “Tataro a kaekaaki … n angiin te tai … iroun te Atua man kabonganakiia aomata tabeman. Eng, I tataro bwa E na kabonganaira. I tataro bwa tina riki bwa kaekan aia tataro aomata.”2
Te Kimwareirei Ibukiia Aomata ni Kabane
Rinanon karaoan ae raoiroi, ko kona n riki bwa kaekaan aia tataro tabeman ao ni kunea te kimwareirei n taainako—ao ae akea tokina. Ngke e reirei Unimwaane Rasband: “Kimwareirei e roko n ai aron te rau ribuakon te kangaanga ke te maraki n atuu. E anga te raunnano ao te ninikoria, e katangaina koauan te euangkerio, ao e karababa ara tangira ibukin te Uea ao natin te Atuani kabane.”3 N atongana teuana, ko riki naba n ai aron Kristo.
Tii anga bwa tera are ko konaa n anga, moanna ma teutana te tai ao te ongeaba.
N tabetai, eng boni ngkoe temanna are ko kainnanoa te buoka teutana. Ikai naba, Tamara are i Karawa ae tatangira e kanakoa te wirikiriki n tamnei nakoia tabeman. A kona ni kunea te kimwareirei ngkai ko riki bwa kaekaan aia tataro, n ai arom naba ko kona n riki bwa te kaeka nakoia. Are nanona a bon mwaiti birion kaeka aika a riai, ao are imwina a na kona n nakonako n te kawai, tao ni kuri ni kaekako mauri.