“Kakaean te Mweenga, Tangira, ao n Riki bwa Kaaina,” Ibukin Kakorakoraia Kairake, Turai 2023.
Aan Kateitei aika a Matoatoa
Kakaean te Mweenga, Tangira, ao n Riki bwa Kaaina
Kamataata n te korotamnei iroun Jessica Parker
Onoua au ririki ngke I a kitaniia oin au utu. E bon rang ni kananokawaki ao n kakamaaku. Tabeua namwakaina imwin rikin aei, I moan ongo taekan Iesu Kristo.
I moana kawarakiia te utu are a riki bwa au utu ake a kaikawaai. A mwaiti natiia ake a rangi n akoi nakoiu ao tangira te Tia Kamaiu. Au utu ae boou a kairai nakon te taromauri ma ngaiia, ao I namakina te mano ao te kukurei.
E anaa tabeua te ririki nanakou n taromauri ao warekan koroboki aika tabu imwain karekean au atatai bwa tera raoi te euangkerio, ao I a rangi n tangiria ni kan bwabetitoaki. Bon 12 au ririki ngke I tabekaki rouiia au karo ake a na natinai, ao I a kariaiakaki ni bwabetito ngkana I tangiria!
N au tai ni bwabetito, I kaota au koaua ao n namakina ana tangira te Atua ni katobibiai ma te korakora ae bati.
Warekan Ana Boki Moomon ao reiakinan taekan Iesu e a tia ni buokai n ataia ae I aki maroaa are bon ngai natin te Atua. E ngae ngkana aki nakoraoi bwaai n aron ae I tangiria, E mena n taainako ikekei ibukiu.
Violet B., Hawaii, USA