“Teimatoa Iaon te Koaua,” Ibukin Kakorakoraia Kairake, Turai 2023.
Teimatoa Iaon te Koaua
Kamataata n te tamnei iroun Ben Simonsen
Te moantain are I noora ana kateitei te Ekaretia, I taku ngai bwa te onaoraki. E bon rang n itiaki ao n aki rongoaa. I tangira Ana euangkerio Iesu Kristo n te tai are I ira te bootaki n taromauri.
Mitinare aine a moana reireinakiu, ao I iangoia ni kan bwabetitoaki. Bon te bong ae tamaroa!
Te euangkerio e bon kaotaki nakoiu mairoun te mitinare ae bane ana tai ae kaain rarikiu. E weteai ni moaningabongin te Tabati ao e tuangai bwa N na iria ma ana utunakon te Taromauri. N te moan tai, tinau e tuangai bwa I aki konaa n nako ibukina bwa akea ara mwane ibukin kantokara n te bwati. Ngke I tuanga kaain rarikiu taekan anne, ao e taku bwa e na kairai, ao tinau e kariaia nakou.
Riki Ngkana Ti Nakonako Ti Ngaira
Imwiin tiau ni bwabetito, I karekea au tai aika kanganga ma au utu. N tabetai a tangirai bwa N na tiku n te mweenga n te Tabati, ma I rineia bwa N na nako n taromauri. Angiin te tai e bon rang ni matoa ni kataia n teimatoa iaon kawain te berita.
Tabeman kaain au utu a tia n totokoa te Ekaretia ao n tuangai bwa I a tia ni karaoa au rinerine ae bure ni kaainna. Ngkana a tuangai aei, taeka aika a roko nakon au iango: “I ataia ae Tamara are i Karawa ao Iesu Kristo a maiu. I ataia bwa e bon koaua te Ekaretia.” Iango aikai a tia ni buokai n teimatoa iaon te koaua.
Ara Mwakuri E Kona n Ringa Maiuia Tabeman
Ngke I aki ataa aron kabwakaan au kabwianibwai, raoraou e kaota aron kabwakaana. Ngkai ngke tinau e anganai au boketemwane, n taainako I kabwaka au kabwianibwai. Ngai ma Au utu ti a tia ni kakabwaiaaki mai iai. Au utu a moanna n anganganai aia mwane bwa N na kabwaka aia kabwianibwai! Anne e tia n riki bwa te kamiimi.
Angiin te tai I nanako n taromauri bon tii ngai, ma n tabetai e irirai tinau. Tinau e iangoia n reiakina riki taekan te euangkerio ao ni kunea bwa e rangi ni kakukurei, e ngae ngke e bon tuai ni bwabetitoaki.
Te Tataro ao te Onimaki e Bitii Nano
I a tia n noora bain te Uea inanon maiuia au utu ngke I tataro ibukiia ao bubutia tabeman bwa a na tataro ibukiia inanon te tembora. Kaain au utu a rikirake ni boutoka, ao ngkai a kaungaai bwa N na nanako n taromauri ao ni karaoi bwaai ake I namakin bwa eti.
Tibu te unimwaane e a bon tibwa motirawa n te tai ae aki maan, ao I kunea arana ngke I karaoa te mwakuri ibukin rongorongon te utu. I tuanga tamau ngkana I kona ni karekea ana otenanti bwa a na karaoaki n te tembora. E taku, “Karaoia ngkana bon te bwai ae eti.”
Te Kimwareirei ae Koaua ao e Kakukurei
Warekan koroboki aika tabu ao ataakin taekan Ana Mwakuri ni Kamaiu Iesu Kristo e uota te kimwareirei, kakukurei, rau, ao te mweengaraoi.
I ataia bwa rinanon ana anga karea te Tia Kamaiu, I kona ni mena irarikin Tamara are i Karawa ao are au utu a kona ni mena ma ngai n aki toki ngkana ti kabaeaki inanon te tembora teuana te bong.
Te tia korokaraki bon kaain Vanuatu ao e maeka i Biti.