“Pe a Faatiga Oe e Filifiliga a Isi Tagata,” Mo le Malosi o le Autalavou, Iulai 2023.

Pe a Faatiga Oe e Filifiliga a Isi Tagata

Saunia e Gabrielle Shiozawa

Mekasini a le Ekalesia

O nisi nei o mea e manatua pe a faaaoga e isi tagata lo latou faitalia i auala e faatiga ai ia te oe.

tamaitai talavou o loo feagai ma lagona le lelei

E te faia le tele o filifiliga i aso uma—o ofu e fai, o mea e ai mo le taeao, po o fea uo e tafafao faatasi. O le faitalia, po o le saolotoga e filifili ai ma faatino, o se tasi lea o meaalofa silisili ua tuuina mai e le Atua ia i tatou.

E i ai foi taunuuga o a tatou filifiliga, ma o nisi taimi o filifiliga a isi tagata e mafai ona faatiga ai i tatou. Afai na i ai se taimi na faasalaina ai oe ona o se mea na faia e lou uso, ua e iloa le faigata tele pe a faaaoga e isi tagata lo latou faitalia i auala e te le manao ai!

Ae o nisi taimi e sili atu ona leaga mea e mafai e tagata ona faaaoga ai lo latou faitalia. Atonu e sauaina oe e tamaiti i le aoga, pe atonu foi ua filifili se tagata o le aiga e tuua le Ekalesia. E tele taimi e foliga mai ai e le tonu le olaga. Ae, o loo e taumafai e faaaoga lou faitalia e fai ai filifiliga sa’o—aisea la e le faia ai e i latou?

Ioe, e le mafai ona e puleaina isi. Ae o le tala fiafia, e mafai ona e suia oe lava. O le fuafuaga o le fesuiai lea o mea e te taulai i ai ma faia filifiliga lelei e tusa lava pe le faia e isi.

O nisi nei o mea e manatua e uiga i le agai i luma ma le faatuatua, e tusa lava pe faaaoga e isi tagata lo latou faitalia i auala e faatiga ai ia te oe:

Sa saili Satani e faaumatia le faitalia (tagai Mose 4:3). E ui lava e faigata le vaai atu i isi o faia ni filifiliga leaga, ae ua e saoloto foi e faia filifiliga lelei e mulimuli ia Iesu Keriso ma avea atili e faapei o Ia!
O au amioga e i ai se aafiaga. Manatua, “”Ua tatou saoloto e filifili, ae e le mafai ona tatou filifilia taunuuga. ¹ O le vaaia o le auala e aafia ai oe i filifiliga a isi tagata e mafai ona avea o se faamanatu lelei mo oe e faia filifiliga e le afaina ai oe lava po o isi.
E nafa tagata uma ma a latou lava filifiliga (tagai Mataupu Faavae ma Feagaiga 101:78). E lē tatau ona mamafatu ia te oe le lagonaina o le tiutetauave mo le suia o isi tagata po o a latou filifiliga. Nai lo lena, e mafai ona e taulai atu i le faia o faaiuga lelei ma mulimuli ia Iesu Keriso.
E mafai ona e filifili e agalelei. Atonu e agaleaga se tasi ia te oe, ae e mafai lava ona e agalelei atu ia i latou. E manaomia le lototele e agalelei atu ai i tagata ma faamagalo i latou pe a latou agaleaga ia te oe, ae o le mea tonu lava lena o le a faia e Iesu (tagai Luka 23:34).
E tatau ona e taulai atu i mea e mafai ona e puleaina. Atonu e le mafai ona e taofia ou matua mai le tatalaina o se faaipoipoga, mo se faataitaiga, ae e mafai ona e filifili e taulai atu i le tumau ai i le ala o feagaiga, fesoasoani i nai ou tei, aoao e uiga i sootaga maloloina, ma le setiina o sini mo lou lava aiga i le lumanai. Filifili e liliu ou luitau i ni avanoa e tuputupu ae ai ma aoao.
Ua ia te oe se faasinomaga paia ma se faamoemoega. A e manatua lou faasinomaga o se atalii o le Atua ma toe taulai atu i au sini i le olaga, e mafai ona e vaai i le ata e tele atu. O le taulai atu i lou faamoemoega ma le vaaia o nei luitau ua na o se vaega itiiti o le tala o lou olaga e mafai ona fesoasoani ia te oe e agai ai i luma ma le faatuatua.
E ala i le faatuatua ia Iesu Keriso, e mafai ai ona e maua le filemu faaletagata lava ia, e tusa lava pe le toafilemu mea o siomia ai oe. Sa saunoa Peresitene Russell M. Nelson, E mafai ona tatou lagonaina le filemu ma le olioli tumau, e oo lava i taimi faigata.”“² O le olaga o se sami sousou, ma e faigofie ona moomoo ia faatoafilemuina e le Atua na afa mo i tatou. Ae o nisi taimi nai lo le faatoafilemuina o le sami, Na te faatoafilemuina i tatou, o le au seila. Liliu atu ia te Ia ma ou faafitauli, ma o le a Ia fesoasoani ia te oe.

Na tuuina atu e le Atua ia te oe le faitalia ina ia mafai ona e filifili e mulimuli ia te Ia ma o lea e avea ai e faapei o Ia. A o e faia, o le a masani lava ona e aoao mai au lava filifiliga ma mea sese ma mai filifiliga a isi. E ui lava e faigata ona vaai atu i tagata o faia filifiliga e faatiga ia te oe, ae e mafai ona e aoao mai na aafiaga ma agai i luma ma le faamoemoe, faatuatua, ma le olioli.