“Auai i le Au Lava e Tasi,” Mo Le Malosi o le Autalavou, Iulai 2023.
Auai i le Au Lava e Tasi
O nei tamaitai e toalua na eseese au i le aoga na avea ma uo mo le olaga atoa.
Ata na pueina e Jeffery Barker Edwards
O Sister Dil na toe ono vaiaso o totoe o lana misiona i Ausetalia ina ua ia iloa o le a ia faaaluina na vaiaso mulimuli e auauna atu ai ma Sister Tuala!
“O le mea mulimuli lava lea semanu ou te sainia mo au lava ia,” o le tala lea a Sister Dil.
O Sister Dil ma Sister Tuala o ni tagata taaalo numera muamua mo au pasiketipolo a la aoga maualuga i Aukilani, Niu Sila. Sa tauva i laua. E masani ona la taaalo faasaga i le tasi ma le isi i tauvaga faaiu, ma e lei manaia.
“Ina ia tuu teisi i totonu o le matalalaga,” o le tala lea a Sister Tuala, “matou te savavali ese mai le malae ma ni maosiosia ma ni totolia.”
Sa faaaluina e Sister Dil ma Sister Tuala le tele o taimi e aoao ai ma taaalo pasiketipolo. “O o ma olaga o le pasiketipolo lava,” o le tala lea a Sister Dil.
Ina ua uma ona faauu mai le aoga maualuga, sa la lagonaina uma le uunaiga e auauna atu i se misiona—e ui e leai se tasi o i laua na lagonaina se manao e auauna atu muamua.
Faia o le Filifiliga e Auauna Atu
Mo Sister Tuala, sa alu se taimi e faaogatusa ai lona loto ma le finagalo o le Alii. “Sa 21 ou tausaga ina ua ou faia le faaiuga e faatino le uunaiga,” o lana tala lea. “Sa ou matuai tauivi lava seia oo ina ou i ai i luga o le vaalele.”
Sa taunuu Sister Tuala i lana misiona i Ausetalia i le taimi o le faama”i pipisi o le KOVITI-19, ma e ui ina sa faigata, ae sa matuai faafetai lava o ia sa ia filifili e auauna atu.
“E le mafai ona ou vaai faalemafaufau i le avea ai ma le Sister Tuala lava lea e tasi sa ou i ai ina ua 21 ou tausaga. Ou te lagona moni lava ua ou tuputupu ae.”
Sa i ai ia Sister Dil se uunaiga “manino ma tuusao” e auauna atu i se misiona ina ua ia maua lona faamanuiaga faapeteriaka. Ina ua mavae sina taimi, sa tonu ia te ia e mulimuli i le uunaiga e auauna atu, aua “o le finagalo o le Alii o le ala sao lava lea i taimi uma ma le filifiliga sili ona lelei.” Na oo mai le valaauga, ma sa ia teuina ana ato e auauna atu i Ausetalia.
Auai i le Au Lava e Tasi … i se Mea Mamao
Ona sa auauna atu Sister Dil ma Sister Tuala i le misiona lava lea e tasi sa le faapea ai o i laua o ni uo i le taimi lava lea. Ina ua mavae se taimi umi o fetaui a la au, sa faigata pea ia Sister Dil ma Sister Tuala ona vaai le tasi i le isi i se isi lava tulaga.
O le mea moni, o le aso muamua na vaai ai Sister Tuala ia Sister Dil, o se tasi o ona manatu muamua o le, “Ou te le iloa pe tatau ona ou fiafia ia te ia.”
Faamutaina o le Feteenaiga
O lea ina ua tofia Sister Tuala ma Sister Dil e galulue faatasi, sa matuai ese lava.
Sa i ai uma ni manatu e uiga i le tasi ma le isi e faavae i le auala na la taaalo ai i le malae pasiketipolo. Sa manatu le tasi o le isi sa malosi, faatautava, ma agaleaga.
Ae na amata ona suia mea a o la masani i le tasi ma le isi. Na iloa e Sister Dil o Sister Tuala o “le faafeagai atoa” o le auala sa ia vaai ai ia te ia i taimi uma. “O ia moni lava o se tagata agaalofa—o se tasi o soa sili ona agaalofa sa ma auauna faatasi,” o le tala lea a Sister Dil.
Sa i ai foi ia Sister Tuala se aafiaga faapena. Na te lei iloaina o ona lagona o le faatautava ia Sister Dil sa avea “o se feteenaiga e lei mafaufauina” i lona olaga.
O na lagona le lelei o feteenaiga ma faamasinoga na suia i le alofa ma le malamalama a o ia amata ona vaai po o ai moni lava Sister Dil. Ma e ui ina sa manatu Sister Tuala sa filemu Sister Dil, ae sa ia iloa ae “e mafai e Sister Dil ona talanoa!”
I le la faigauo fou, sa iloa ai e Sister Dil ma Sister Tuala atonu la te lei avea moni lava ma ni fili.
“I le pasiketipolo e te atiaeina i lou mafaufau lenei manatu e tatau ona tatou manumalo, ma o isi ’au uma lava o le fili,” o le tala lea a Sister Dil. “Ona mae’a lea o le pasiketipolo, ma e iloa ai, ‘Oi, ua le o toe avea i laua ma fili. Atonu e lei avea moni lava i laua ma fili.’”
Ia, ua vaai nei Sister Dil ma Sister Tuala ua la i ai i le “au” lava e tasi—au a le Atua.
Keriso i le Lotolototoi, saunia e Judith Mehr
O le Taulaga a Iesu Keriso e mo tagata uma.
Na taufai lagonaina e nei tuafafine le aao o le Atua i lo la tofiga o ni soa ma iloa le mana o le Togiola a Iesu Keriso na faatagaina ai i la’ua e maua le faamalologa ma suiga.
“Na faia e Iesu Keriso lena taulaga ina ia mafai ai ona faamaloloina mea sese uma na tutupu i le taimi ua tuanai, faaatoatoa, ma faaleleia atili,” o le tala lea a Sister Dil. “E mafai ona tatou faamagalo atu. E mafai ona tatou faagalo. E mafai ona tatou agai pea i luma, ma suia mea uma.
E le gata ina sa faamaloloina e Sister Tuala ma Sister Dil lo la feteenaiga, ae sa la aoaoina foi le auala e vaai atu ai i isi e pei ona silasila mai le Atua ia i latou.
“O le oo mai iinei ma le mafai ona vaai i la’u soa ma isi tagata i se malamalama e ese mai, ua ou iloa ai e taua le tala o tagata uma,” o le tala lea a Sister Tuala. “Ma e manaomia e tagata uma le Togiola a Iesu Keriso.”
Sa la aoaoina e ui lava e mafai ona faigata, ae e mafai e ni tagata se toalua o e na vaai muamua i le tasi ma le isi o ni fili ona o mai faatasi e ala i le alofa.
“E le afaina po o le a lou matua po o le a foi lou ituaiga tagata,” o le tala lea a Sister Tuala, “pe o oe o se tagata e le talitonu po o se tagata lotu.”
“Afai e mafai ona ou galue faatasi ma se tasi ou te lei mauaina moni se sootaga maoae, ma o i ma’ua uma e toalua e o mai faatasi mo se faamoemoega autu e tasi, ona mafai foi lea e isi tagata.”