11 Tala Pupuu Moni e uiga i le Faasoaina Atu o le Talalelei

Ma le ala e mafai ai foi ona e faasoa atu!

Faaali Atu le Auala e Mafai ai e le Talalelei ona Fesoasoani

Sa ou i ai i le vasega i se tasi aso ma nofo i autafa o la’u uo. Sa matou sauni e sue se suega, ma sa ia fai mai ia te au sa matuai popole lava o ia. Sa ou lagonaina e tatau ona ou aoaoina o ia i le auala e tatalo ai. Ona ma punonou uma lea o o ma ulu ma tatalo le leoa mo se fesoasoani i le suega. Ou te faafetai e mafai ona fesoasoani le tatalo e faatoafilemu ai le popole o lau uo.

Abigail, Iurukuei

Auauna Atu i Tagata e Manaomia le Fesoasoani.

Sa i ai se matou tamaitai matua i le matou uarota sa le mafai ona sau i le sauniga faamanatuga ona o atugaluga o le soifua maloloina. Sa ma fesili atu ma lo’u tamā i le epikopo pe mafai ona ma aveatu le faamanatuga i lona fale i vaiaso taitasi. O lona toalua, o lē sa le toaga i le lotu, na amata foi ona ai ma inu i le faamanatuga. O le faapotopotoina o Isaraelu o lona uiga e manaomia ona tatou valaaulia isi ia faalatalata atili atu ia Iesu Keriso. O le auaunaga o se vaega tele lea.

Shion, Iuta, ISA

Valaaulia i se Gaoioiga

Sa ou tietie i se uila i tafatafa o se lotu ina ua ou vaaia le toatele o tagata iina o sisiva. Sa ou valaau atu i se alii talavou (e igoa ia Courage) ma fesili atu ia te ia po o le a le mea sa latou faia. Na fai mai o ia na o mai i vasega e taua o seminare. Sa ia fai mai ia te au o le a i ai se gaoioiga i le lotu ma fesili mai pe ma te o. O Courage, i le avea ai ma a’u uo, na suia moni lava lo’u olaga e ala i le fesoasoani mai ia ou iloa e uiga i le talalelei.

David, Ghana

Avea ma se Faataitaiga

E tele mea ou te aoaoina e ala i le matauina o lo’u uso matua. Ou te fiafia i taaloga vitio ma le soka, ma, o le mea moni, atonu o le a ou faia na mea i taimi uma pe ana leai o ia. E fiafia foi o ia i na mea, ma o le tele o taimi ma te taaalo faatasi ai, ae na te faaavanoa lava le taimi e tuputupu ae ai ma faaleleia. O le a le galo lava ia te au le valaaulia e faaaoga fualaau faasaina i le aoga. Sa vave ona ou mafaufau i lo’u uso ma iloa le mea o le a ia filifilia; ona ou te fia pei o ia, sa ou faia le filifiliga sa’o ma fai atu leai.

Emilio, Tennessee, ISA

Fesoasoani i Isi ia Lagona le Alofa o Keriso

I le taimi o se konafesi a le MMA, sa ou lagona le tuuatoatasi. Sa ou tatalo i aso uma, ma le faamoemoe ia lagona le Agaga ma le alofa o Iesu Keriso. Ina ua uma se tasi o lauga, sa sau se tamaitai talavou ou te lei iloaina lelei ma fusi atu au. Sa ou lagonaina le alofa o Keriso i lana opo, e pei o loo Ia tau mai ia te au e alofa o Ia ia te au.

Natalie, Chile

Mulimuli i Uunaiga

I se tasi aso sa ou maua ai se uunaiga faaleagaga e tatau ona ou valaaulia la’u uo mamae mai le aoga i se faigalotu. Sa ou manao e le amanaiaina le uunaiga, ae na iu ina ou auina atu ia te ia se tesi i le aso na muamua atu. A o ma nonofo faatasi i le faigalotu, sa ou popole. Ae ina ua uma le lotu, sa i ai se ataata tele i ona foliga. O se faamanatu ia te au e sili atu le silafia e le Atua o Ana fanau nai lo a’u ma e tatau ona ou mulimuli i taimi uma i uunaiga e faasoa atu le talalelei a Iesu Keriso.

Eliza, Minesota, ISA

Tatalo e uiga i Mea e Fai Atu

Na o i ma’ua ma lo’u tuafafine ia tagata o le Ekalesia i le matou aoga. E matauina e tagata e ese lava i ma’ua ma e masani lava ona fai mai ni fesili. I le taimi muamua sa ou popole e talanoa atu ia i latou, ae sa ou tatalo ina ia mafai ona fai atu le mea sa’o, ma sa latou faalogo ma faaaloalogia a’u filifiliga.

Ruben, Nouei

Faasoa Atu Upumoni o le Talalelei i le Initoneti

Mo se sini, sa ou suesue i le Sau, Mulimuli Mai ia te A’u ma maua ai mau ma upusii e faasoa atu i luga o ala o faasalalauga faaagafesootai. Sa ou mauaina ni nai faamatalaga mai tagata na faapea mai na latou lagonaina le Agaga e ala i au faasoa. O le faasoaina atu o le talalelei e mafai ona fesoasoani i isi i auala e le mafai ona tatou mafaufauina i lena taimi.

Raquel, Pasila

Faaaoga ni Auala Eseese Fou

I se tasi o a’u vasega i le aoga, sa matou faitauina ai se tusi na faitioina ai le Ekalesia. Sa ou iloaina e tatau ona ou talanoa atu e uiga i upumoni o le talalelei toefuataiina. O lea na sii ai i luga lo’u lima. Sa valaau mai le faiaoga ia te au, ae sa ou le iloa se tala e fai atu. Mo se mafuaaga, sa amata ai ona ou usuina pese o Mataupu Faavae o le Faatuatua. I lou te’i, sa oo mai se migao loloto i le potu atoa. Mulimuli ane, sa itiiti le fenumiai, ma sa faia e lo’u faiaoga ma tamaiti o le vasega le talanoaga a le vasega ma a’u ma le faaaloalo sili atu.

Monique, Massachusetts, ISA

Avea o se Malamalama

Ina ua 15 ou tausaga, sa tonu ia te au o le a amata ona ou saili mo se lotu e auai. I ni nai aso mulimuli ane, sa ou faauo ai i se teineitiiti i le aoga sa foliga mai sa i ai se malamalama e uiga ia te ia. I ni nai vaiaso mulimuli ane, sa ia valaaulia ai a’u i lona fale. Ina ua ou taunuu atu iina, sa valaaulia a’u e lona aiga ou te auai faatasi ma i latou mo le afiafi faaleaiga. Sa amata ona ou fiafia i Le Ekalesia a Iesu Keriso o le Au Paia o Aso e Gata Ai, sa tele lava ina faavae i le fiafia o le aiga o la’u uo i lena afiafi.

McKaylie, Colorado, ISA

Faasoa Atu i le Alofa

Sa uunaia a’u e lo’u tausoga e feiloai ma faifeautalai, ou te manatu, ona sa manao o ia ia ou fiafia i faamanuiaga sa ia fiafia ai i lena taimi. Sa ou lagonaina o lo’u tausoga ma la’u uo, o Enoka, sa alolofa ia te a’u ma mananao i se mea lelei mo a’u. Sa ou lagona ai le toafimalie tele e sau i le lotu.

Eric, Kana