“Pipiimau Pea i le Upumoni,” Mo le Malosi o le Autalavou, Iulai 2023.
Pipiimau Pea i Le Upumoni
Ata na tusia e Ben Simonsen
O le taimi muamua lava na ou vaai ai i se fale o le Ekalesia, sa ou faapea o se falemai. Sa matuai mama ma filemu. Sa ou fiafia i le talalelei a Iesu Keriso i le taimi lava na ou auai ai i sauniga lotu.
Sa amata ona aoaoina au e tamaitai faifeautalai, ma sa ou filifili loa e papatiso. O le aso sili lea!
Sa faailoa mai ia te au le talalelei e lo’u tuaoi, o se faifeautalai ua mae’a lana misiona. Sa ia valaau mai ia te au i se tasi taeao o le Aso Sa ma fai mai matou te o i le lotu faatasi ma ia ma lona aiga. I le taimi muamua, sa fai mai lo’u tina e le mafai ona ou alu ona sa leai se ma tupe mo le pasese o le pasi. Ina ua ou ta’u atu i lo’u tuaoi, sa ia fai mai o le a ia aveina a’u, ma sa faatagaina a’u e lo’u tina ou te alu.
E Tusa Lava Pe Tatou Te Savavali Na o i Tatou
Ina ua uma ona ou papatiso, sa ou oo i le tele o ni taimi faigata faatasi ma lo’u aiga. O nisi taimi latou te mananao ou te nofo i le fale i le Aso Sa, ae ou te filifili e alu pea i le lotu. O le tele o taimi sa faigata ai ona taumafai e tumau i luga o le ala o feagaiga.
O nisi o tagata o lo’u aiga sa tetee i le Ekalesia ma ua fai mai ia te au sa ou faia se filifiliga sese e auai. Pe a latou ta’u mai lenei mea ia te au, e oo mai nei upu i lo’u mafaufau: “Ou te iloa o loo soifua le Tama Faalelagi ma Iesu Keriso. Ou te iloa e moni le Ekalesia.” O nei mafaufauga na fesoasoani ia te au e taofimau ai i le upumoni.
O a Tatou Faatinoga e Mafai ona Pa’i Atu i Olaga o Isi
Ina ua ou tauivi ia iloa pe faapefea ona totogi le sefuluai, sa faaali mai e lo’u tuaoi ia te au le auala e totogi ai. O le taimi nei pe a tuuina mai e lo’u tina ia te au se tupe, ou te totogia lava la’u sefuluai i taimi uma. Ua matou vaai ma lo’u aiga i faamanuiaga e maua mai ai. Ua amata foi ona tuuina mai e lo’u aiga a latou tupe e totogi o se sefuluai! O se mea na faateia ai.
O le tele lava o taimi ou te alu ai na o au i le lotu, ae o nisi taimi e sau ai lo’u tina faatasi ma a’u. Sa filifili lo’u tina e aoao atili e uiga i le talalelei ma iloa ai le fiafia tele, e ui e lei papatisoina lava o ia.
O Le Tatalo ma le Faatuatua e Suia Ai Loto
Ua ou vaai i le aao o le Alii i le olaga o lo’u aiga a o ou tatalo mo i latou ma ole atu i isi e tatalo mo i latou i totonu o le malumalu. Ua sili atu ona lagolago tagata o lo’u aiga, ma ua latou uunaia nei au ou te alu i le lotu ma ia faamaoni i le tagata ua ou i ai.
Na maliu talu ai nei lo’u tamamatua, ma sa ou maua lona igoa a o faia galuega o talafaasolopito o aiga. Sa ou fesili i lo’u tama pe mafai ona ou faia ona sauniga i totonu o le malumalu. Sa ia fai mai, “Tau lava o le fai pe afai o le mea sa’o lea.”
Olioli ma le Fiafia Moni
O le faitauina o tusitusiga paia ma le iloaina e uiga i le Togiola a Iesu Keriso ua aumaia ai ia te au le olioli, fiafia, filemu, ma le mafanafana.
Ou te iloa e ala i le taulaga togiola a le Faaola, e mafai ai ona ou toe faatasi ma lo’u Tama Faalelagi ma e mafai ona faatasi lo’u aiga ma a’u e faavavau pe afai e faamauina i matou i le malumalu i se aso.
O le tusitala e sau mai Vanuatu ma e nofo i Fiti.