“Fitu Aso o le Faasoa Atu,” Mo Le Malosi o le Autalavou, Iulai 2023.
Fitu Aso o le Faasoa Atu
E mafai ona e faasoa atu le talalelei i auala masani ma lelei. Ua e saunia mo le lu’i?
Pe a tatou talanoa e uiga i le faasoaina atu o a tatou molimau, e masani ona tatou mafaufau i le tuuina atu o a tatou molimau i sauniga faamanatuga po o nisi faatulagaga aloaia. Ae ua uunaia i tatou e “vaavaai mo avanoa e avatu ai lo outou faatuatua i auala masani ma lelei.”1
I le luitau e fitu aso o loo i lalo, e mafai ona e faasoa atu lau molimau i se auala ese i aso uma mo se vaiaso. E mafai ona e faia nei mea i soo se faasologa, pe e mafai foi ona e mauaina ni ou lava manatu! Ua e saunia mo le lu’i?
Ata na tusia e Emily Davis
Aso 1: Lotu
Mafaufau e tuuina atu lau molimau i se sauniga anapogi ma molimau i le lotu pe afai o se mea lena e te fiafia i ai. Afai e leai, e mafai foi ona e faasoa atu lau molimau i le lotu e ala i le auai i au vasega i le Aso Sa ma i le seminare. O faamatalaga e te faasoa atu iina e mafai ona siitia ai isi ma faamalosia ai a latou molimau faapea foi ma lau molimau.
Aso 2: Uo
O le a se mea na e aoaoina i le lotu i le Aso Sa? Na e fiafia i se mea na faasoa atu e se tasi i se lauga i le sauniga faamanatuga po o le talanoaga a lau vasega? Atonu o le pese amata o se tasi o viiga e sili ona e fiafia i ai. Ta’u atu i se uo e uiga i lena mea! Ona fesili atu lea e uiga foi ia latou faaiuga o le vaiaso.
Aso 3: Ala o Faasalalauga Faaagafesootai
O ala o faasalalauga faaagafesootai o se nofoaga sili lea e faasoa atu ai mea faaleagaga e masani lava ma lelei. Mo lenei aso o le luitau, mafaufau e faasoa atu se faamatalaga e uiga i:
-
Se tasi o fuaiupu o mau e sili ona e fiafia i ai.
-
O se upusii faagaeetia mai le konafesi aoao.
-
O se mafaufauga po o se aafiaga faaleagaga.
-
O se mea e te fiafia i ai pe talisapaia e uiga i le Faaola.
-
O se auala na Ia fesoasoani ai ia te oe talu ai nei po o se uiga e te faamemelo ai ia te Ia ma pe aisea.
Aso 4: Tesi po o le Vitio
Auina atu se savali faagaeetia i se uo e ala i tesi po o vitio. E mafai ona e faasoa atu se lauga o le konafesi e te manatu latou te mananao ai, ta’u atu ia i latou se mea e te talisapaia ai i latou, pe faasoa atu e uiga i lou faatuatua ia Iesu Keriso. Mo se faataitaiga, atonu e manaomia ona latou iloa e uiga i le alofa o le Tama Faalelagi mo i latou. E mafai foi ona e ta’u atu ia i latou faafesaga’i!
Aso 5: Auaunaga
Atonu e te mafaufau pe mafai faapefea ona avea le auauna atu i isi o se auala e faasoa atu ai lau molimau. Sa aoao mai le Aposetolo o Paulo, “Ia fai oe ma faaa’oa’o i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoia” (1 Timoteo 4:12). Ina ia mafai ona e faaali atu ou talitonuga e ala i au faataitaiga, e ala i le auauna atu i isi e pei ona o le a auauna atu ai le Faaola ia i latou.
Aso 6: Faatufugaga
O nisi taimi e faaaoga ai e tagata faatufugaga o se auala ese e faasoa mai ai o latou manatu ma lagona. E mafai ona e faaaogaina atavali, atavane, solo, musika, po o soo se ituaiga o faatufugaga e faasoa atu ai ou lagona e uiga ia Iesu Keriso ma Lana talalelei.
Aso 7: Talanoaga Faasamasamanoa
Aua e te fefe e ta’u atu ou talitonuga i faatulagaga faasamasamanoa, e pei lava o le a e faasoa atu nisi manatu o ia te oe e uiga i se autu ua tuuina mai.
Ioe, e mafai ona e talanoa e uiga i gaoioiga a le Ekalesia po o se mau na e faitauina talu ai nei, ae e mafai foi ona sili atu ona faasamasamanoa nai lo lena. Mo se faataitaiga:
-
Afai e te lagona le musuia i le natura, faailoa atu lou talisapaia o foafoaga a le Atua i se isi tagata.
-
Atonu na e maua se aafiaga manaia faaleagaga talu ai nei. Faamatala i se uo pe afai e le patino tele.
-
Saili talafaatusa o le talalelei i se tusi po o se ata tifaga e te fiafia i ai, ma faasoa atu ou malamalamaaga.
Tulaga Masani ma Faalenatura
A o e maua ni auala eseese e faasoa atu ai ou talitonuga, o le a avea atili ma se mea masani mo oe le faia o lena mea. Atonu e lagona le le manaia i le taimi muamua, ae e le afaina! Manatua, o lau molimau lava ia ua avea ma se mea masani ia te oe—o se vaega o lou tagata. O le faasoaina atu e mafai foi ona avea ma mea masani. Pau lava le mea e manaomia o le faailoaina teisi atu i aso taitasi.
O le a faapefea ona e faasoa atu lau molimau i le asō?