“Avea o se Tali i le Tatalo a se Tasi,” Mo le Malosi o le Autalavou, Iulai 2023.
Sau, Mulimuli Mai ia te A’u
Avea o se Tali i le Tatalo a se Tasi
O le mulimuli i uunaiga e fesoasoani ia i tatou e faia ai se eseesega.
O Le Mea ua ia te A’u, Ou Te Avatu Lea ia te Oe, saunia e Walter Rane
Ua faamalolo e Peteru ma Ioane se tagata i le malumalu.
Atonu e te lagonaina e lē tele ni mea e te tuuina atu. Ae ua ia te oe lou faatuatua ia Iesu Keriso, ma ua lava lou faatuatua ia te Ia e taitai atu ai i nisi o mea ofoofogia.
E lei leva ona mavae le maliu ma le Toetu o Iesu Keriso, ae o Peteru ma Ioane i le malumalu, lea sa nofo ai i fafo atu se tagata e le mafai ona savali, ma talosagaina i laua mo se foa’i.
Sa tau tau e Peteru i le tagata, “E leai sa’u ario po o sa’u auro; a o le mea ua ia te au ou te avatu lea ia te oe, I le suafa o Iesu Keriso o le Nasareta, ina tu ai ia i luga, ina savali” (tagai Galuega 3:6; faaopoopo le faamamafa).
Sa faatu a’e e Peteru le tagata i ona vae. Mo le taimi muamua i lona olaga, sa mafai ona tu le tagata. Sa savali o Ia ma na osooso i le olioli. O le faatuatua o Peteru ia Keriso na ia maua ai le lototele e faamalolo ai le tagata e ala i le mana o le perisitua.
Ia tatou faamaoni, la. Atonu o le a e le faamaloloina ma’i faaletino o tagata uma i taimi uma. Ae o lou faatuatua e mafai ona fesoasoani i isi auala. E pei o Peteru, o mea ua ia te oe, e mafai ona e tuuina atu.
Ata pu‘e mai le Getty Images
Faia o se Eseesega
Pe na i ai se taimi na e tatalo ai ina ia faaitiitia lou lagonaina o le tuuatoatasi? Pe o se tasi o le a avea ma au uo?
Pe na alu atu, valaau, pe tesi atu se tasi ia te oe i lena taimi? Atonu na latou mulimuli i se uunaiga ma taumafai e faaleleia atili, e pei lava o oe. Na pau lava le mea na latou faia o le faaaogaina ma le faamaoni o o latou taimi, o se vaega o lo latou lototele, ma sina agalelei—i se isi faaupuga, o mea na latou maua. E mafai foi ona e faatagaina lou faatuatua e uunai oe e faatino uunaiga.
Na aoao mai Elder Ronald A. Rasband o le Korama a Aposetolo e Toasefululua: “Ua ia i tatou le tiutetauave paia e aoao ai ia iloa faatosinaga [a le Agaga Paia] i o tatou olaga ma tali atu.”1
E te le matauina i taimi uma le taimi pe na e faia foi se eseesega i se aso o se tasi, o lea e mafai ai ona faigata le vaai i le faamoemoega o le mulimuli i uunaiga.
Peitai, o le taumafai e auauna atu—faia o mea e mafai ona e faia—o le a e lagona ai le fiafia ma le ausiaina e tusa lava pe e te le vaaia i taimi uma ia taunuuga. A o e faalogologo i uunaiga, o le a fesoasoani le Agaga Paia ia te oe e aoao pe faapefea ona auauna atu i isi, e oo lava i se faatulagaga pisi. E pei ona saunoa mai Elder Jeffery R. Holland o le Korama a Aposetolo e Toasefululua: “Ua tali mai tatalo … o le tele o taimi … e ala i le faaaogaina e le Atua o isi tagata. Ou te tatalo ia Ona faaaogaina i tatou. Ou te tatalo ia avea i tatou ma tali i tatalo a tagata.”2
Olioli mo Tagata Uma
O le faia o mea lelei, e mafai ai ona avea oe ma tali i tatalo a isi ma maua le olioli i le ala—ma i le faavavau. E pei ona aoao mai Elder Rasband: “E oo mai le olioli o se filemu i le lotolotoi o faigata po o le lototiga. E aumaia le mafanafana ma le lototele, e faaalia mai upumoni o le talalelei, ma faalautele atu lo tatou alolofa mo le Alii ma fanau uma a le Atua.”3 I se isi faaupuga, e avea atili foi oe e faapei o Keriso.
Tau lava o le tuuina atu o mea e te mafaia, amata i sina taimi ma le usiusitai.
O nisi taimi, ioe, o oe lea e manaomia sina fesoasoani faaopoopo. O iinei foi, e auina mai ai e se Tama Faalelagi alofa ia uunaiga i isi. E mafai ona latou maua le olioli a o avea ma se tali i au tatalo, e pei lava ona mafai ona avea oe o se tali i a latou tatalo. O lona uiga e faitau piliona tali talafeagai, ma o le isi tali e sosoo ai atonu o savali mai i le auala, o le a fai atu talofa.