“O Auala e 4 e Lagolago ai Uo i Aiga e Le Lolotu Uma,” Mo le Malosi o le Autalavou, Iulai 2023.
Fesoasoanio le Olaga
O Auala e 4 e Lagolago ai Uo i Aiga e Le Lolotu Uma
E mafai ona e fesoasoani i tagata uma ia lagona le alofaina ma le tausia lelei i le lotu e tusa lava po o a o latou tulaga.
E eseese uma lava aiga. Mo se faataitaiga, o tagata e te vaai i ai i le lotu, e mafai ona i ai ni tagata o le aiga e le o ni tagata o le Ekalesia po o e ua filifili e o ese mai le Ekalesia. A aunoa ma le lagolago a le aiga, e mafai ona faigata i tagata ona auai i le lotu, pe lagona foi e pei o i latou o ni tagata auai.
O iina tatou te aoga ai!
E mafai ona e faia se matafaioi taua i le faamanuiaina o ituaiga uma o aiga, i ituaiga uma o tulaga. O nisi nei o auala e mafai ona e fesoasoani ai:
Ata na tusia e Oksana Grivina
Tatalo mo Auala e Fesoasoani Atu Ai
Tatalo ia iloa pe mafai faapefea ona e fesoasoani ia i latou o e o mai i le lotu ma o latou aiga. Ia saunia e faatino tali e te maua.
Ia Malamalama i le Aiga
Afai e mafai, taumafai ia iloa le aiga atoa o lau uo. O le a fesoasoani lenei mea ia te oe e iloa ai po o le a le lagolago o loo i ai i lau uo i le fale ma po o le a le mea e faigata ai le auai i le lotu mo i latou. A o faasolosolo ona e iloa lelei le aiga, e mafai ona musuia oe e fesoasoani i ni auala patino o manaomia.
Ia Mautinoa ia Ola Pea i le Talalelei
E toatele tagata e fiafia i le Ekalesia pe a latou vaai i tagata o le ekalesia o ola i mea latou te talitonu i ai. E te le iloa lava po o ai o loo vaavaai mai. E mafai ona e ausia le tele o mea lelei i le na o le ola ai i le talalelei. O le faia o lena mea o le a faamanuiaina ai lou olaga ma mafai ai ona fesoasoani e aumaia le malamalama o le talalelei ia i latou o siomiaina oe.
Tau Lava o le Agalelei Atu
Aua le manatu faatauvaa i le auala e mafai ai e le agalelei faigofie ona faia se eseesega tele. Mo se faataitaiga:
Afai e te vaai i se tasi o nofo na o ia i le lotu, nofo i o latou autafa pe ofo atu latou te nonofo faatasi ma lou aiga.
Afai e le mafai ona latou o i le lotu po o nisi gaoioiga na o i latou lava, ofo atu e ave i latou pe valaaulia i latou e o mai ma lou aiga.
E taua foi le faaaofia ai o au uo i gaoioiga. O se valaaulia i se gaoioiga a le uarota po o le aiga e ono foliga mai e laitiiti, ae e mafai ona fesoasoani i lau uo e filifili e latalata atu ai i le Faaola ma Lana Ekalesia pe afai latou te lagona o loo faaaofia ai i latou.