“E faapefea ona avea au ma se faataitaiga i tagata o le aiga o loo tauivi e ola i aoaoga a Iesu Keriso?” Mo Le Malosi o le Autalavou, Iulai 2023.
Fesili ma Tali
“E faapefea ona avea au ma se faataitaiga i tagata o le aiga o loo tauivi e ola i aoaoga a Iesu Keriso?”
Faaali Atu, Auauna Atu, ma Faasoa Atu
“Faaali atu i lou aiga le ala e te lagona ai le fiafia i le ola ai i le talalelei. E mafai ona e auauna atu ia i latou ma faasoa atu ou aafiaga ia i latou. E mafai foi ona e valaaulia faifeautalai e fai se afiafi faaleaiga i lou fale.”
Luciana M., 18, Mendoza, Atenitina
Saili ina ia Malamalama
“O nisi o tagata o lo‘u aiga na faia nisi o mea e le ogatusa ma tulaga faatonuina a le Atua. Taumafai ia malamalama i a latou mafuaaga mo mea o loo latou faia. E le faapea e tatau ona e faia le mea o loo latou faia. O le mea e sili ona taua, alofa ia i latou e tusa lava po o a mea latou te faia pe tautatala ai.”
Melody E., 16, Texas, ISA
Mulimuli i le Faaola
“Ou te taumafai lava e avea ma se faataitaiga mo lo‘u aiga e ala i le talanoa e uiga i aoaoga a le Ekalesia. Ou te taumafai lava i taimi uma e faaataata atu Keriso ia te au lava ia. Ou te iloa afai ou te mulimuli ia te Ia, o le a mafai ona avea au ma se faataitaiga lelei i lo’u aiga ma fesoasoani e aumaia le malamalama o Keriso i o latou olaga.”
Adalia C., 19, Rio Grande do Sul, Pasila
Ta musika Faagaeetia
“Ou te siomia a‘u lava i ala o faasalalauga lelei lea e aumaia le Agaga i totonu o lo‘u aiga. O le taina o se viiga i le piano e fesoasoani ou te lagona ai le olioli tusa lava pe o tauivi tagata o lou aiga. Faaauau pea ona faalagolago i le Faaola mo le olioli ma le filemu, e tusa lava pe le faia e isi o loo siomia oe.”
Lauren B., 14, Maryland, ISA
Alofa Ia i Latou
“E le mafai ona e suia filifiliga a tagata o lou aiga e sili atu nai lo le mea e mafai ona latou suia ai oe, ae e mafai lava ona e alofa ia i latou i taimi uma. Sa faaalia e Keriso le alofa tele i tagata e lei malilie pe fiafia foi ia te Ia. O tagata uma o se atalii/afafine o le Atua, ma e ala i lou alofa, e mafai ai ona latou lagonaina le alofa o le Tama Faalelagi.”
Brooklyn D., 17, Iuta, ISA
Saili ia Vaai e pei o le Silasila a Keriso
“O le i ai o le alofa faaKeriso ma le taumafai e vaai i talaatu o o latou vaivaiga e mafai ona fesoasoani tatou te malamalama ai i mea o loo feagai ma i latou. E malamalama lelei Iesu Keriso ia i tatou taitoatasi. Ma e mafai ona tatou amata vaai ma fesoasoani i isi e pei ona Ia faia pe afai tatou te ole atu ia te Ia e taiala i tatou.”
John K., 17, Indiana, ISA
Aua le Faamasino
“O loo ou aoao e alofa ia i latou, ia agalelei ia i latou, ma aua le faamasinoina i latou.”
Logan C., 18, Iuta, ISA