Dali, Sunod Kanako
Ang Pundasyon sa Tinuod nga Simbahan ni Kristo
Ang Simbahan gitukod pinaagi sa mga propeta ug mga apostol, ug si Jesukristo mao ang bato sa pamag-ang.
Si Presidente Dallin H. Oaks, mitimbaya sa kabatan-onan ug sa mga young adult sa Rockford, Illinois, USA, niadtong Pebrero 12, 2023
Niadtong tingpamulak sa 2020, gisaulog nato ang ika-200 nga anibersaryo sa Unang Panan-awon ni Joseph Smith, nga mipasiugda sa Pagpahiuli sa ebanghelyo ni Jesukristo. Sa pagtimaan niining importante nga hitabo, ang Unang Kapangulohan ug ang Korum sa Napulog Duha ka Apostoles miandam og usa ka pamahayag, “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan.” Kami mopahayag nga Ang Simbahan ni Jesukristo sa mga Santos sa Ulahing mga Adlaw mao ang gipahiuli nga Simbahan sa Manluluwas.
The Desires of My Heart [Ang mga Tinguha sa Akong Kasingkasing], ni Walter Rane
Kami mopamatuod nga kini nga Simbahan mao ang “nakaangkla sa hingpit nga kinabuhi sa ulohang bato sa pamag-ang niini, si Jesukristo, ug diha sa Iyang walay kinutoban nga Pag-ula ug literal nga Pagkabanhaw,” ug nga “si Jesukristo mitawag na usab og mga Apostoles ug mihatag kanila og awtoridad sa pagkapari.”1 Kana mao ang pundasyon diin ang tinuod nga Simbahan ni Kristo natukod.
Ang Ulohang Bato sa Pamag-ang sa Atong Pagtuo
Kaniadto, ang mga pundasyon alang sa mga gambalay sa kasagaran butangan og dagko nga mga bato, nga mosuporta sa usa ka gambalay. Ang una ug ang labing importante niini nga mga bato mao ang bato sa pamag-ang. Kon mabutang na, ang bato sa pamag-ang motino sa dapit sa ubang tanang mga bato sa pundasyon.
Si Apostol Pablo mitudlo nga ang tinuod nga Simbahan sa Ginoo “tinukod ibabaw sa patukoranan nga mao ang apostoles ug mga propeta, nga niini si Jesukristo mao ang ulohang bato sa pamag-ang” (Mga Taga-Efeso 2:20). Ang Ginoong Jesukristo mao ang pundasyon sa atong pagtuo ug alang sa Simbahan nga nagdala sa Iyang ngalan.
Pinaagi sa dili matandi nga kinabuhi ug Pag-ula sa Manluluwas, ang tanan nga nagpakabuhi sukad mabanhaw gikan sa mga patay. Labaw pa kay niana, Siya miabli sa pultahan alang sa tanan nga mapasaylo sa ilang mga sala pinaagi sa paghinulsol, bunyag, ug pagbalaan pinaagi sa Espiritu Santo. Niining paagiha, pinaagi sa pagkamasulondon sa ebanghelyo ni Jesukristo, kita mahimong mobalik nga walay lama ngadto sa presensya sa Dios.2
The Good Shepherd [Ang Maayong Magbalantay], ni Michael Malm
Ako mopamatuod nga si Jesukristo mao lamang ang paagi ngadto sa pagkaimortal ug kinabuhing dayon. Ako nagmaya nga ako makagahin sa nahibilin sa akong kinabuhi sa pagpahayag niining importante nga kamatuoran ngadto sa tibuok kalibotan.
Unsa ang Gipasabot Nga ang Simbahan Gitukod Usab pinaagi sa mga Apostol ug mga Propeta?
Apostoles ang unang gitawag ni Jesukristo sa Iyang mortal nga pangalagad sa pagdumala sa Iyang Simbahan. Sa dihang ang Iyang Simbahan gipahiuli pinaagi ni Propeta Joseph Smith, Siya mitawag pag-usab og apostoles nga modumala. Ang tanan gitawag ngadto sa katungdanan sa pagkaapostol—bisan sa Unang Kapangulohan o sa Korum sa Napulog Duha—gipaluyohan isip “mga propeta, mga manalagna, ug mga tigpadayag,” apan ang labing senior lamang ang tawagon nga ang propeta tungod kay siya ang nagdumala sa tibuok Simbahan ug talagsaon nga gitugotan nga mamulong alang sa Ginoo.3
Ang mga Propeta ug Apostoles Gipili sa Pagpangulo sa Simbahan
Ang Manluluwas mipili kinsa ang mangulo sa Iyang Simbahan ug mihatag nila sa gikinahanglan nga awtoridad ug gahom. Karon ang Simbahan gipangulohan ni Jesukristo pinaagi sa Iyang propeta ug apostol, nga si Russell M. Nelson, ug sa iyang mga magtatambag sa Unang Kapangulohan, ug pinaagi sa Korum sa Napulog Duha ka Apostoles, kinsa adunay sagrado nga mga responsibilidad sa pagsaksi “sa ngalan ni Kristo sa tibuok kalibotan” ug sa pagtukod ug pagdumala sa Simbahan (Doktrina ug mga Pakigsaad 107:23, 33).
Ang Unang Kapangulohan ug ang Korum sa Napulog Duha ka Apostoles sa Rome Italy Temple Visitors’ Center, nga adunay estatuwa ni Jesukristo ug sa Iyang orihinal nga Napulog Duha ka Apostoles sa ilang luyo
Uban sa akong kaigsoonan sa Unang Kapangulohan ug sa Korum sa Napulog Duha ka Apostoles, ako mopamatuod nga si Jesukristo mao ang Anak sa Dios. Siya ang Kahayag sa Kalibotan. Siya mao ang atong Manluluwas gikan sa sala ug kamatayon. Ang Iyang gipili nga mga lider motudlo sa doktrina ni Kristo4 ug sa ubang walay kausaban nga mga kamatuoran sa ebanghelyo sumala sa paggiya sa Espiritu Santo. Kami walay laing tinguha kay sa pagtudlo unsa ang tinuod ug sa pag-awhag sa tanan sa pagsunod sa “mahinungdanon nga laraw sa kalipay” sa Dios (Alma 42:8).
Ikaw makahibalo niini alang sa imong kaugalingon. Pangutan-a ang imong Langitnong Amahan kon kami tinuod ba nga mga apostol ug mga propeta sa Ginoo, ug dayon gamita ang mga pagtulon-an sa Manluluwas sa imong kinabuhi. Kana mao ang paagi sa mga panalangin sa mortal ug kinabuhing dayon, ako mopamatuod sa ngalan ni Jesukristo, ang atong Manluluwas ug Manunubos.