“7 ka Sekreto sa usa ka Independente nga Kinabuhi—Gipadayag,” Alang sa Kalig-on sa mga Kabatan-onan, Okt. 2023.
Tabang sa Kinabuhi
7 ka Sekreto sa usa ka Independente nga Kinabuhi—Gipadayag
Usa ka hapsay nga transisyon ngadto sa usa ka independente nga kinabuhi mainyoha. Ania ang pipila ka butang nga makatabang.
Mga paghulagway sa Guev Design
Ang mga hingkod nagpuyo og lahi nga kinabuhi kay sa inyoha. Ug ang kamatuoran mao, nga kamo magpuyo og hingkod nga kinabuhi sa umaabot. Kabahin sa hingkod nga kinabuhi mao ang pagkaindependente—pag-atiman sa inyong kaugalingon, pagpangita og kwarta, ug uban pa. Ania ang pito ka sekreto aron makaangkon og independente nga kinabuhi.
Sekreto 1: Kamo makagamit sa tulo ka tinubdan sa espirituhanong gahom sa inyong panaw.
Kamo adunay access sa tulo ka tinubdan sa espirituhanong gahom samtang magpadayon mo:
Hugot nga pagtuo kang Jesukristo—kanunay ug sa tanang butang. Tuo sa Manluluwas. Paningkamot nga motuman sa Iyang mga sugo ug motahod sa mga pakigsaad nga inyong gihimo. Pag-ampo kada adlaw ngadto sa Langitnong Amahan pinaagi sa ngalan ni Jesukristo. Dayon kamo mapanalanginan sa matag bahin sa inyong kinabuhi. Ayaw gayod pagduhaduha niana. (Tan-awa sa Mosiah 2:41.)
Kabubut-on—ang gahom sa pagpili ug sa pagbuhat. Kamo adunay kabubut-on. Kamo makapili sa pagsunod sa mga pagtulon-an ni Jesukristo. Ang Langitnong Amahan gusto nga kamo molihok alang sa inyong kaugalingon ug dili aghaton sa paglihok sa pwersa sa gawas (tan-aw sa 2 Nephi 2:14, 16). Bisan unsa pa ang inyong mga sirkumstansiya, kanunay adunay butang nga positibo nga inyong mahimo.
Matarong nga mga tinguha—pagkahibalo unsay inyong gusto ug ngano. Kon kamo gusto og maayong mga butang alang sa maayong mga rason, kamo mahimong mamaayo. Sama sa gipasabot ni Presidente Dallin H. Oaks, Unang Magtatambag sa Unang Kapangulohan: “Ang mga tinguha ang momando sa atong mga prayoridad, ang mga prayoridad mohulma sa atong mga pagpili, ug ang mga pagpili motino sa atong mga binuhatan. Agig dugang, ang atong mga binuhatan ug ang atong mga tinguha mao ang hinungdan nga kita mamahimong ingon niana nga matang sa tawo” (Abr. 2011 nga kinatibuk-ang komperensiya [Liahona, Mayo 2011, 45]).
Sekreto 2: Bayad pag-una sa ikapulo—bisan unsay mahitabo.
Kon kamo makakwarta, bayad og ikapulo gikan niini. Ayaw paghimog mga eksepsyon, ug ayaw kini og hunonga. Kon kamo motuman niini nga pasalig, ang Ginoo “moabli … sa mga bintana sa langit” alang kaninyo (Malaquias 3:10). Kini mahimong maglakip sa tanang matang sa mga panalangin—espirituhanon, temporal, emosyonal, ug daghan pa.
Sekreto 3: Adunay labaw pa sa usa nga dalan padulong sa independente nga kinabuhi.
Ang inyong mga opsiyon dili limitado sa usa ka kahanas, usa ka eskwelahan, usa ka degree, usa ka trabaho. Tuohi kini, ug kamo makakita og pipila ka babag ug mas daghan nga abli nga mga pultahan.
Kon kamo wala makahibalo sa inyong mga opsiyon, pangita og mga tawo nga adunay kasinatian ug kahibalo nga makahatag kaninyo og maayong tambag. Sila mahimong ang mga ginikanan, mga magtatambag sa eskwelahan, mga lider sa Simbahan, o usa ka sakop sa inyong komunidad kinsa naghimo og butang nga gusto ninyong buhaton. Pangutan-a sila giunsa nila pagkab-ot ang ilang pagkabutang karon o unsa nga mga kapanguhaan ang anaa alang kanimo.
Sekreto 4: Kamo mahimong aduna na sa unsa ang gikinahanglan sa mga tawo.
Alang sa pinansyal nga pagkaindependente, kamo magkinahanglan og “mabaligya nga mga kahanas”—mga butang nga inyong mahimo aron kamo bayran sa mga tawo. Ania ang sekreto: aduna na kamo sa pipila niana. Pananglitan, math, pagpanahi, pisikal nga kalig-on, pagpanindot sa buhok, pagdrowing, pagdrayb og sakyanan, pag-organisar og mga butang, pagsulbad og mga problema, paggamit og mga computer, pagpakigsulti sa mga tawo ug makuha ang ilang pagsalig, pagkamasaligan, ug daghan pa.
Kon kamo wala makahibalo sa inyong mga kahanas, pangutana og hamtong aron sa pagsulti ninyo unsa ang inyong nakamahoan. Ug kon kamo gusto nga mopalambo og piho nga kahanas nga wala pa ninyo, kamo makakat-on niini.
Sekreto 5: Basa!
Ang pagbasa mao ang yawe sa mas maayo nga edukasyon, mas maayo nga trabaho, ug mas maayo nga pagsabot kon sa unsa nga paagi ang kalibotan naglihok. Bisan kon kamo maayo nga mobasa, pagbasa pa og dugang. Pagbasa sa mga kasulatan. Basaha ang unsay gihatag nga buluhaton kaninyo sa eskwelahan. Dayon pangita og mga butang nga gusto ninyong basahon sa inyong kaugalingon.
Ang pagbasa makatabang ninyo nga makaangkon og kahibalo ug sa paghunahuna ug sa pagpakigsulti nga klaro. Dako kini nga gamit kaninyo bisan unsa pay inyong pilion nga buhaton sa umaabot.
Sekreto 6: Ang mga butang nga dili ninyo bantayan mawala.
Kon kamo dili magbantay sa paagi sa inyong paggasto og kwarta, moabot ang adlaw nga kini hapit na mahurot. Ang usa ka badyet mao ang usa ka plano sa pagsubay pila ang kwarta nga mosulod, pila ang migawas, ug pila ang inyong natigom. Makatabang usab kini kaninyo sa pagbutang og limitasyon sa inyong paggasto sa lainlaing mga butang.
Adunay lainlaing mga matang sa sistema sa pagbadyet: mga ledger nga adunay mga kolum, mga software program, mga sobre sa cash nga adunay mga kategoriya nga gisulat diha niini. Pangita og sistema nga maayo alang kaninyo.
(Lain pay ato, ang pagbaton og badyet wala magpasabot nga kamo dili moggasto og kwarta sa makalingaw nga mga butang. Inyo lang masubay ang inyong kwarta ug mogasto sa maalamong paagi.)
Sekreto 7: Ang utang mao ang lungag nga dili ninyo gusto nga padayonon sa pagkalot.
Ang utang mao nga kamo kinahanglan nga mobayad og kwarta nga inyong gihulaman. Kasagaran kamo mobayad sa gihulaman nga kwarta sa hinayhinay sa taas nga panahon nga adunay tubo—dugang nga kantidad nga mao ang porsyento sa kantidad nga inyong gihulaman.
Ang utang dili na makontrol kon kamo manghulam og sobra kay sa inyong mabayran ug ang tubo magpadayon sa pagdugang sa unsay inyong bayaran.
Tingali kamo mangutang aron makuha ang piho nga butang nga kamo walay igong kwarta nga ibayad, sama sa edukasyon, pagpanag-iya og balay, o usa ka sakyanan. Apan pagbantay. Pangita og mga opsiyon nga motabang ninyo nga molikay sa utang kutob sa mahimo.
Mga credit card motugot ninyo sa pagpalit og mga butang karon ug bayran kini unya. Kini usab utang—nga adunay dako nga tubo. Kon kamo mobati nga kinahanglan nga mokuha og credit card, bayri ang tanan matag higayon nga adunay balayranan. Kon kamo kanunay mobayad sa minimum nga bayranan, mas lisod ang paggawas gikan sa utang.