“Mga Milagro sa Tanna,” Alang sa Kalig-on sa mga Kabatan-onan, Okt. 2023.
Mga Milagro sa Tanna
Nalubong nga trak, usa ka pundok sa mga porma sa interbyo alang sa bunyag, ug usa ka paresan sa mahalaron nga mga misyonaryo—kanang tanan mga kabahin didto sa mga milagro sa Habagatang Pasipiko.
Mga litrato pinaagi ni Leslie Nilsson
Si Mark J. Messick, presidente sa Vanuatu Port Vila Mission, nakadawat og tawag sa telepono gikan sa presidente sa district mahitungod sa Isla sa Tanna naghangyo nga magpadala didto og mga misyonaryo. Adunay 80 ka tawo nga naghulat aron interbyohon aron sila makaduol kang Jesukristo ug sa Iyang gipahiuli nga Simbahan pinaagi sa pagbunyag!
Si Presidente Messick misulay sa pagpadala sa iyang mga kaabag aron mopahigayon sa mga interbyo. Gikinahanglan silang mobiyahe gikan sa Isla sa Éfaté, diin nahimutang ang opisina sa misyon, ngadto sa Tanna, sobra sa 130 ka milya (209 ka kilometro) ang gilay-on. Apan pipila ka seryoso nga mga hagit ang nakabalda sa ilang biyahe.
Ang mga Kalangan Dili Kinahanglan nga Makadiskaril
Una, ang aktibo nga bulkan sa Tanna nahimong mas aktibo. Dayon usa ka gamay nga bagyo miguba sa dakong bahin sa Tanna. Sa kataposan, ang COVID-19 miabot sa Vanuatu niadtong 2022, ug ang tanan gisirado. Walay tawo nga gitugotan sa pagsulod o gula sa Éfaté o sa Tanna.
Pipila ka bulan ang milabay, human mikalma ang sitwasyon, sila si Elder Brian Moses Nalin ug Silas Toa miabot sa Tanna, andam nga mo-interbyo sa mga tawo. Nahadlok si Presidente Messick nga ang gidaghanon sa mga tawo nga gustong magpabunyag mokunhod tungod sa dugay kaayo nila nga paghulat.
Dihang si Elder Nalin, usa ka lumad sa Tanna, ug si Elder Toa miabot, dili 80 ka tawo ang naghulat—aduna nay 114.
Mga Suba sa Saetsiwi
Aron moabot sa layo kaayo nga branch sa Saetsiwi didto sa Isla sa Tanna, si Elder Nalin ug Toa nagdrayb ug dayon mibaktas sa bungtod sulod sa tulo ka oras, walay laing gikaon gawas sa mga lubi nga ilang makit-an samtang nagbaktas. Apan sa pag-abot nila sa Saetsiwi, wala nila makit-i ang presidente sa branch. Ug dayon nagsugod ang ulan nga may dalang unos.
Ang ulan mipuno sa mga suba, diin nahibaloan ni Elder Nalin nga sa dili madugay dili na matabok ug peligro. Ang mga elder nagdalidali og balik ngadto sa ilang trak, nasayod nga kinahanglan sila nga mobiya sa bungtod. Ang duha ka misyonaryo nakatabok nga luwas sa unang suba, apan sa ikaduha nga suba, nalubong ang trak. Ila kining giduso ug gani mihangyo sa uban nga motabang sa pagduso, apan wala mairog ang trak.
“Naghulat Kini”
Si Elder Nalin nakabantay sa laing suba nga midagayday padulong sa ilang suba ug kon unsa kini ka mas dako. Sa kadugayan miingon siya, “Ang among suba gamay lang gihapon, morag naghulat kini aron mi makagawas.” Apan wala kadto magdugay.
Kining duha ka elder nagdako sa Vanuatu, diin ang mga sakyanan talagsa ra kaayo ug hilabihan ka mahal. Busa, para nila, ang pagbiya sa trak dili gayod mahimo. Apan ang tubig misaka na kutob sa gunitanan sa mga pultahan.
Gitawagan nila si Presidente Messick ug nangutana kon unsay ilang buhaton.
Si Presidente Messick mitubag, “Salamat sa inyong pagtawag nako. OK ra na! Biyai ang trak kon asa kini ug pangita og luwas nga lugar karon dayon!”
Si Elder Toa ug Elder Nalin nag-atubang og mga hagit samtang misulay sila sa pag-abot sa mga tawo didto sa isla sa Tanna kinsa gustong magpabunyag—lakip na sa kalit nga unoson nga ulan nga mibaha sa mga suba nga ilang gitabok.
Pagtuo sa Gahom sa Dios
Si Elder Toa, ang kataposan nga mibiya sa trak, sa kadugayan miingon, “Milingi ko sa lingkoranan sa likod alang sa akong mga kasulatan ug sa mga porma sa bunyag, ug wala koy nakita. Ug naghunahuna ko nga tingali gidala na kadto ni Elder Nalin.” Kon mawala ang mga porma, ang mga misyonaryo kinahanglan nga mobalik sa Éfaté aron magkuha og bag-o.
Dayon usa sa mga tawo kinsa miduol aron motabang misugod sa pagsinggit. Si Elder Toa wala makasabot unsay iyang gisulti. Apan nakasabot si Elder Nalin kay iya man kadtong lumad nga pinulongan. Misinggit siya sa iyang kauban, “Gawas na sa trak kay naay nagpadulong!”
Si Elder Toa mikatkat sa likod nga pultahan kay ang tubig miabot na sa bintana sa atubangan. Sa higayon nga nakagawas na siya, ang suba mibanlas sa trak padulong sa ubos. Sa dihang nakita nila ang trak nga naglutaw padulong sa ubos sa bungtod, nakita nila ang mga kasulatan ug mga porma sa bunyag didto sa likod nga lingkoranan.
Si Elder Toa sa kadugayan miingon, “Samtang didto pa kami sa suba, among gitawag ang gahom sa Dios aron moprotekta sa among mga kasulatan ug mga porma sa bunyag. Nagtuo mi nga Iya kining maluwas sumala sa Iyang kagustohan.”
“Human sa among pag-ampo, nasayod mi nga ang tanan mamaayo ra,” Si Elder Toa sa wala madugay miingon.
Ang Dios Nasayod Kon Unsaon Pagluwas
Ang presidente sa district mitawag nila ni Elder Toa ug Nalin nga ang presidente sa branch sa Saetsiwi, ang tawo nga wala nila makit-i ganina, nakakaplag sa ilang trak. Ang suba miduso niini ngadto sa 820 ka piye (250 ka metro) gikan sa dakong dalan, apan samtang ang makina nabasa ug ang trak kinahanglan nga ipaguyod alang sa uban nga pag-ayo, ang gawas nga bahin sa trak wala malumping o magaras. Hinuon, ang ilang mga libro sa leksiyon, mga notebook, ug mga pampleta nabasa ug nadaot. “Dili na nimo mabasa ang ubang mga pulong,” si Elder Toa miingon.
Apan nagtungtong sa ibabaw sa ubang mga butang, ang ilang mga kasulatan ug ang mga porma sa interbyo sa wala damha nga paagi kay uga ug wala madaot.
Bisan gibiyaan nila ni Elder Toa ug Elder Nalin ang trak sa nabahaan nga suba, napalgan kini pagkahuman. Bisan kon ang makina kinahanglan nga ayohon, ang trak walay lumping o garas. Apan ang labing milagroso sa tanan, ang labing importante nga mga butang nga ilang gikarga sa sulod wala madaot.
“Lakaw sumala sa Mando sa Imong Kasingkasing”
Ang mga elder mibiyahe ngadto sa walo ka branch diin gikinahanglan sila nga mopahigayon og mga interbyo didto sa Tanna. Tungod kay nadaot ang makina sa sakyanan, sa kasagaran maglakaw sila. Ang usa nila sa kadugayan miingon ngadto sa iyang kauban nga misyonaryo, “Kon ang imong bitiis maluya na sa paglakaw, molakaw ka sumala sa mando sa imong kasingkasing.”
Sa usa lamang ka branch, 48 ka tawo ang matinud-anong naghulat aron mabunyagan. Si Elder Nalin miinterbyo niadtong makasulti sa lumad nga pinulongan sa Tanna, ug si Elder Toa miinterbyo sa mga Bislama og sinultihan. Sa dihang nahuman na sila, natingala sila sa pagkakita sa adlaw nga misalop. Ang mga interbyo milungtad sa tibuok adlaw.
Si Elder Toa ug Elder Nalin milatas sa Tanna aron mobunyag sa mga tawo kinsa midawat sa gipahiuli nga ebanghelyo ni Jesukristo.
Mibunyag sila sa mga tawo latas sa isla, daghan kanila mga pamilya, sa mga suba ug sa dagat. Walay igong gidaghanon sa sinina sa bunyag, mao nga ang ubang bag-o nga mga miyembro mitunol sa ilang basa nga mga sinina ngadto sa laing tawo hangtod nga ang tanan nabunyagan.
Ang mga elder mibunyag sa mga tawo, daghan kanila mga pamilya, bisan asa sila gikan, bisan unsa ka layo. Ang mga tawo ug ang mga elder nagpakita og dakong pagtuo.
Sama sa gisulti ni Propeta Joseph Smith, “Ang atong mga misyonaryo nangadto … ; … ang kamatuoran sa Dios magpadayon nga maisogon, halangdon, ug gawasnon, hangtod nga kini makasulod sa matag yuta, makabisita sa matag dapit, molukop sa matag nasod, ug makasulti sa matag dunggan, hangtod ang mga katuyoan sa Dios matuman, ug ang Halangdong Jehova moingon nga ang buhat nahuman na.”1