“Tinawag sa Dios,” Alang sa Kalig-on sa mga Kabatan-onan, Okt. 2023.
Tinawag sa Dios
Ni Stephanie E. Jensen ug Jessica Zoey Strong
Mga Magasin sa Simbahan
Kini nga mga miyembro nakakat-on sa ilang kaugalingon mismo nga ang mga propeta ug apostoles mga tinawag sa Dios. Mahimo usab ninyo!
Imahe
pakiglamano
Sa dihang nagsugod si Jesus sa Iyang mortal nga pangalagad, nagtawag Siya og napulog duha ka Apostoles. Ug sa dihang Iyang gipahiuli ang Iyang Simbahan, nagpili Siya og apostoles ug mga propeta aron mangulo kanato sa atong panahon. Pinaagi sa pagsunod sa ilang tambag, makaangkon kita og mga pagpamatuod nga mga tinawag sila sa Dios.
Pakighimamat sa Apostoles
Nakahimamat ka na ba og usa ka Apostol? Ania ang pipila sa mga istorya mahitungod sa mga tawo nga nakasulay.
Namulong ko sa Kinatibuk-ang Komperensiya—isip usa ka Batan-on
Ang kasinatian nga gihangyo sa paghatag og usa ka mensahe ngadto sa minilyon ka mga tawo sa Abril 2020 nga kinatibuk-ang komperensiya nakahatag nako og dakong kabug-at nga wala pa nako mabati sukad. Apan nahupay ko sa pagkasayod nga ang Ginoo motabang nako.
Samtang nag-andam ko sa akong mensahe, naghunahuna ko kon unsaon nga makadawat og pagpadayag. Kini nakatabang nako nga makapasalamat sa dedikasyon niadtong kinsa mamulong sa kinatibuk-ang komperensiya.
Dihang miabot na ang komperensiya, nabalaka ko, apan ang paghimamat ni Elder Gerrit W. Gong ug sa ubang Kinatibuk-ang mga Awtoridad nakatabang nako nga mobati og kalinaw. Dayon nahimamat nako si Presidente Russell M. Nelson. Nakigsulti siya nako nga daw magkaila na kaming daan sa tibuok namong kinabuhi. Gibati nako ang putli nga gugma ni Kristo samtang nakigsulti ko sa propeta.
Laudy K.
Imahe
batan-ong babaye nga anaa sa pulpito
Pagpahigayon og Face to Face nga Kalihokan uban ni Elder Soares
Dihang nahibalo ko nga maapil ko sa usa ka Face to Face nga kalihokan, ang labing nakapadasig nako mao ang oportunidad nga makigtrabaho uban sa usa ka Apostol.
Nakulbaan ko sa wala pa ang sibya kay kinahanglan kong mosulti og gamay nga Portuguese. Akong gisultihan si Elder Soares, “Nabalaka ko nga ang akong Amerkano nga tono mogawas.” Mitubag siya nako nga nagpahiyom ug mikidhat, nag-ingon, “Max ang mga tono nindot paminawon!”
Makusganon kaayo nakong gibati ang Espiritu sa dihang nakadungog ko niya nga mipamatuod nga ang Manluluwas buhi ug nagmahal kanatong tanan sa tagsa-tagsa.
Max A.
Imahe
litrato sa mga tawo nga nag-posing uban nila ni Elder ug Sister Soares
Dihang Gitabangan ko ni Elder Holland sa Akong Homework sa Math
Dihang nag-edad ko og 12, ang akong amahan nahimong presidente sa misyon didto sa Chile. Samtang anaa didto, nakigtrabaho siya permi uban ni Elder Holland. Usa ka adlaw miingon ko, “Pa, naa si Elder Holland sa akong libro sa math.”
“Kagahapon miabot og 1 ka oras ang biyahe ni Jeff Holland paingon sa trabaho. Karong buntag, nagdrayb si Jeff og 20 minutos paingon sa estasyonan sa tren, naghulat sa tren og 7 ka minuto, misakay sa tren og 12 ka minuto, ug dayon milakaw og 15 minutos paingon sa trabaho. Unsa ka dugay ang biyahe ni Jeff paingon sa trabaho karong buntaga?”
Isip komedya, ang akong mga ginikanan mipadala og litrato sa problema sa math ngadto ni Elder Holland uban sa mensahe: “Elder Holland, mahimo bang tabangan nimo si Whit sa iyang homework sa math?”
Si Elder Holland mitubag pinaagi sa sulat.
“Minahal nga Whitney—nalipay ko nga imong nahibaloan ang akong regular nga trabaho. Permi kong magpadala og mga problema sa math para sa mga libro ug usahay maglibog ko kon kinsang ngalan ang akong gamiton. Tingali gamiton nako ang imong ngalan sa sunod. (‘Kon si Whitney dunay 5 ka hinigugma sa Provo ug mapun-an og 1 kada adlaw sa 14 ka adlaw didto sa Chile, pila man kanila ang mabunyagan, magmisyon, ug gustong makigminyo niya?’) Salamat sa pag-anhi dinhi! Mapasigarbohon kaayo ko nimo! Jeff Holland.”
Imahe
sulat
Klaro kaayo nga si Elder Holland nagkomedya lang bahin sa pagsulat og mga problema sa math (ug pagbaton og daghang mga hinigugma!). Apan kini nga klase sa sulat mipabati nako nga importante ko.
Dihang si Elder Holland mitudlo sa mga miyembro sa Chile sa pagbasa sa Basahon ni Mormon kada adlaw, nagsugod ko pagbasa sa akong kaugalingon, isip usa ka 12 anyos. Didto nagsugod gayod nga nakaugmad ko sa akong kaugalingon nga pagpamatuod.
Whitney L.
Imahe
litrato sa usa ka pamilya nga ni-posing uban nila ni Elder ug Sister Holland
Paghimamat ni Elder Soares didto sa France
Niadtong 2021, ang akong mga ginikanan gitawag isip mga lider sa misyon sa France Lyon Mission. Pagka 2022, si Elder Soares mibisita. Sa iyang pakigpulong ngadto sa mga misyonaryo, misulti siya nga ang iyang bagahe nawala atol sa usa sa iyang biyahe sa eroplano.
Nakapahigmata kadto nako. Sayon ra kaayo nga magtan-aw sa apostoles ug mga propeta sa TV ug maghunahuna nga sayon ra ang ilang kinabuhi. Apan ang atong mga lider dili mohangyo nga buhaton kini—gitawag sila aron sa pagbuhat niini. Gipili nila ang pagsunod sa Ginoo, ug nagpasabot kana nga biyaan ang ilang mga plano alang sa umaabot.
Si Elder Soares nagtudlo nako unsay ipasabot nga mahimong disipulo ni Kristo. Bisan tuod busy siya ug adunay iyang mga kalisod, naningkamot siya sa pagpakigsulti sa daghang mga miyembro kutob sa mahimo. Nakaamgo ko nga ang Mga Kinatibuk-ang Awtoridad mga tawo nga sama ninyo ug nako kinsa mipili kang Kristo ug naningkamot sa pagpakita sa Iyang gugma.
Lydie L.
Imahe
Jesukristo
Imahe
litrato sa usa ka pamilya nga ni-posing uban ni Elder Soares
Pinaagi sa Pag-ampo ug Pagtuo
Kon wala pa ka makahimamat og usa ka Apostol, OK ra! Kadaghanan nato wala makasulay. Makaangkon mo og pagpamatuod nga tinawag sila sa Dios pinaagi sa pagpaminaw, pagsunod, ug pag-ampo mahitungod sa ilang mga gitudlo.
Buhata Unsay Ilang Gitudlo
Nakahimamat ko og mga lider dihang nagpahigayon ko og Face to Face nga kalihokan, apan dili kadto mao ang higayon nga nakaangkon ko og pagpamatuod nga mga tinawag sila sa Dios.
Dihang naminaw ko sa ilang mga pulong, mibuhat sa unsay ilang gitudlo, ug nagtan-aw sa akong kaugalingon nga nausab ngadto sa mas Kristohanon nga tawo, diha niana akong gibati nga ang Dios nagpamatuod nako nga sila mga espesyal nga mga saksi ni Kristo.
Aaron K.
Imahe
batan-ong lalaki
Pagsunod sa mga Pagdapit sa Propeta
Kanunay kong maghulat sa kinatibuk-ang komperensiya. Nakahinumdom ko nga malipayon kaayo dihang ang akong mga higala ug ako mihimo og lista sa mga butang nga gisulti sa propeta ug mipahinumdom sa usag-usa sa pagbuhat niadtong mga butanga. Usa niadto mao ang pag-adto sa templo, ug ako ug ang akong mga higala nagkuyog. Makalingaw kaayo kadto, ug gibati nako ang tumang kalinaw. Ang pagbuhat sa unsay gihangyo sa propeta nakatabang nako nga makaamgo kon unsa kadako ang gugma ni Jesukristo nako.
Leticia F.
Imahe
batan-ong babaye
Nakahimamat man ikaw og Apostol o wala, makahibalo ka sa kamatuoran: Ang Apostoles nagpamatuod sa kamatuoran ug walay laing gusto gawas lang sa labing maayo alang kanimo. Samtang ikaw magsunod kanila, ang Espiritu Santo mopahibalo nimo nga mga tinawag sila sa Dios.