“Mga Rason nganong adunay mga patakaran ,” Alang sa Kalig-on sa mga Kabatan-onan, Okt. 2023.
Mga Rason nganong adunay mga Patakaran
Ang pagkasayod sa mga patakaran maayo—ug ang pagsabot sa rason alang niini gamhanan ug magdala og tinuod nga kamaya.
Usa na katuig ang milabay dihang gipahibalo ni Elder Dieter F. Uchtdorf ang pagmantala sa Alang sa Kalig-on sa mga Kabatan-onan: Usa ka Giya sa Paghimo og mga Pagpili. Kana nga gamayng booklet nakapahimo og kausaban sa mga tawo latas sa tibuok kalibotan.
Si Elder Gerrit W. Gong mipakigbahin niini nga giya ngadto sa bise presidente sa Panama. Si Elder David A. Bednar nagtudlo gikan sa giya didto sa Bucharest, Romania. Ug si Presidente Russell M. Nelson mihatag sa mga batan-on didto sa Nevada og usa ka tahas sa pagtudlo sa mga sakop sa ilang pamilya sa mga kamatuoran nga anaa sa giya. Miingon siya, “Kining importante nga giya naglangkob og importanteng mga baroganan nga motabang sa matag tawo aron maandam alang sa templo.”1
Mga Rason sa Pagpahiuli
Ang mga tin-edyer ug ang ilang mga pamilya sa gihapon adunay mga patakaran ug mga sugo, apan ang milagro sa giya mao nga mas labi kining naghisgot mahitungod sa mga rason nganong adunay mga patakaran.
Diha sa Alma 12:32 atong mabasa, “Busa ang Dios mihatag ngadto kanila sa mga sugo, human ikapahibalo ngadto kanila ang laraw sa katubsanan. Ang Pagpahiuli sa ebanghelyo dili lamang usa ka pagpahiuli sa mga patakaran, apan usab usa ka pagpahiuli sa mga rason.
Ang Napulo ka Sugo nakalahutay sa Dakong Apostasiya; ang mga rason sa pagtuman sa mga kasugoan mao ang nawala. Atong makita kana nga mga rason diha sa plano sa katubsanan. Kon tinuoray kita nga makasabot sa mga rason, makaamgo kita nga ang mga sumbanan ug mga sugo nga gisunod sa husto nga mga rason mahimong dalan nga modala kanato ngadto sa tinuod nga kamaya.
Usa ka batan-ong lalaki nga akong tawgon og Joseph miingon, “Sa akong eskwelahan nailhan na kong daan kon unsay akong mahimo ug dili mahimo. Ang mga tawo moingon, ‘ Si Joseph dili mahimong moinom ug kape o alkohol. Si Joseph dili motan-aw og pornograpiya o mamalikas.’ Karon gusto nakong mahibalo sila sa mga rason.”
Miingon siya nga kon ang mga tawo kasagaran sa una mangutana niya kon nganong nagpakabuhi siya niini nga paagi, motubag siya, “Tungod sa akong simbahan.” Nindot kana nga tubag, apan adunay mas maayo pa. Karon iyang itudlo ang mga baroganan diha sa Alang sa Kalig-on sa mga Kabatan-onan nga giya:
-
Imahebatang babaye ug batang lalaki nag-istoryahanay
Mga paghulagway pinaagi ni Emily Davis
Nganong mosimba man ka inig ka Dominggo?
-
Tungod kay gihigugma nako ang Dios ug ang uban.
-
Imahemga batang lalaki sa eskwelahan nag-istoryahanay
Nganong dili man ka moinom og kape o alkohol?
-
Tungod kay sagrado ang akong lawas.
-
Imahemga batang lalaki nga nag-istoryahanay
Nganong dili man ka motan-aw og pornograpiya?
-
Tungod kay gusto kong maglakaw sa kahayag.
-
Imahebatang babaye ug batang lalaki nga naglakaw ug nag-istoryahanay
Dili ba lisod ang pagpaningkamot nga magpakamaayo sa tanang panahon?
-
Usahay, apan si Kristo nagtabang nako.
Usa sa mga masusihon nga pagtuon mi-report nga ang ubang batan-ong mga tawo namiya sa relihiyon kay wala nila masabti ang mga rason sa mga balaod ug mga pagdili nga may kalabotan sa relihiyon.2 Si Joseph wala maapil niana. Ang Alang sa Kalig-on sa mga Kabatan-onan nga giya nakatabang niya nga masayod sa mga rason alang sa iyang kaugalingon ug mopakigbahin niini ngadto sa uban. Makahimo usab kini og sama niana alang kanimo.