Ako Makahimo sa Tanan nga Butang pinaagi kang Kristo

Ang kabatan-onan nagpakigbahin kon sa unsang paagi si Kristo milig-on kanila sa pagbuhat sa lisod nga mga butang (tan-awa sa Mga Taga-Filipos 4:13).

Nag-atubang og Tumang Kabalaka diha sa Misyon

batan-ong lalaki

Tungatunga sa akong misyon sa Arizona, USA, kalit akong nakasinati sa unang pag-atake sa kalisang. Nakigsulti ko sa mga lider, nangayo og tabang, ug nag-ampo og maayo. Apan ang tabang nga akong gikinahanglan ingon og wala moabot. Gibati nako nga nag-inusara ug nahadlok. Giingnan gani ko nga basin ako papaulion.

Usa ka adlaw ang akong inahan nanawag. Siya nangutana, “Makapadayon ra ba ka?” Ako mitubag og, “Ambot lang. “Ambot lang gayod.” Dayon miingon ang akong mama, “Makapadayon ba ka og usa pa ka bulan?” Miingon ko, “Ambot lang.”

“Mga usa ka semana kaha?” nangutana siya. “Ambot lang,” miingon ko pag-usab. “Usa ka adlaw kaha?” nangutana siya. “Ako. Wala. Makahibalo,” miingon ko.

Dayon nangutana siya, “Makahimo ba ka og usa na lang ka minuto?” Sa kataposan ako miingon, “Aw oo, mahimo pa.” Siya misulti nako, “Nan buhata kana. Himoa ang usa ka minuto ngadto sa laing minuto, hangtod moabot ka og usa ka oras. Dayon tugoti nga mopadayon kini, hinayhinay. Ayaw pagdali. Himoa nga ang Dios mopuli. Mosaad ko nga ma-Ok ra ka.”

Misalig ko sa iyang mga pulong. Karon ako hapit na moabot og 21 ka bulan sa misyon. Nakigbisog gihapon ko sa kahimsog sa pangisip usahay. Apan nakasinati usab ako og daghang kamaya. Ug ako adunay hugot nga pagtuo nga kon ako mag-anam-anam, minuto ngadto sa laing minuto, ako makahimo niini pinaagi sa gahom sa Ginoo ug sa Iyang walay kinutoban nga Pag-ula. Ang mga pakigbisog sa kahimsog sa pangisip tinuod. Apan kon kita moduol ngadto ni Kristo, kita makahimo sa lisod nga mga butang.

Elder Rhett Turley, Arizona Mesa Mission

Kon kamo nakigbisog sa mga pagbati sa tumang kabalaka o depresyon, pangayo og tabang sa usa ka gisaligan nga hamtong.