“Edukasyon sa Simbahan: Adunay Luna alang sa Tanan,” Alang sa Kalig-on sa mga Kabatan-onan, Okt. 2023.
Edukasyon sa Simbahan: Adunay Luna alang sa Tanan
Importante ang edukasyon. Ang Ginoo—ug ang Iyang Simbahan—motabang ninyo nga makat-on kutob sa inyong mahimo.
Litrato pinaagi ni??
“Unsa ang akong mga plano human sa hayskul?”
“Unsay gusto nakong buhaton?”
“Kinsa ako gustong mamahimo?”
“Ang kolehiyo ba alang kanako?”
Kini mga importante nga mga pangutana! Ug ang mga tubag makahimo og mahinungdanon, tibuok kinabuhi nga kalainan sa inyong kinabuhi. Mao nga ang Ginoo—ug ang Iyang Simbahan—gusto nga motabang ninyo nga makat-on kutob sa inyong mahimo.
Nganong Importante Kaayo ang Edukasyon?
Ang Langitnong Amahan gusto nga kamo kanunay nga magkat-on. Adunay temporal ug espirituhanon nga mga rason nga magtinguha og pagkat-on ug edukasyon. Ang mga kasulatan nagtudlo nga “ang himaya sa Dios mao ang salabotan, o, sa lain nga mga pulong, kahayag ug kamatuoran” (Doktrina ug mga Pakigsaad 93:36). Ang pagkat-on ug ang edukasyon “kabahin sa inyong mahangtoron nga tumong sa pagkahimong mas sama sa Langitnong Amahan.”1
Ang atong minahal nga propeta, si Presidente Russell M. Nelson, mitudlo, “Sa Simbahan, ang pag-angkon og edukasyon ug pag-angkon og kahibalo mga relihiyoso nga responsibilidad. Edukaron nato ang atong mga hunahuna aron nga sa umaabot kita makahatag og bililhong pagserbisyo ngadto sa laing tawo.”2
Ang Ginoo Motabang Kaninyo
Daghang panalangin ang moabot kon inyong iapil ang Ginoo sa inyong edukasyon. Siya motabang ninyo nga mabuntog ang mga babag—tingali kamo nakigbisog nga makatutok sa pag-eskwela, o tingali ang pagbasa lisod alang kaninyo. Kon kamo moduol ngadto sa Ginoo ug mohimo sa inyong bahin, ang Ginoo mopalambo sa inyong mga paningkamot ug mohatag og mga oportunidad nga dili ninyo mahunahuna karon!
Tabang gikan sa Simbahan sa Ginoo
Bisan asa pa kamo magpuyo, ang Simbahan ni Jesukristo sa mga Santos sa Ulahing mga Adlaw adunay mga oportunidad sa edukasyon nga anaa pinaagi sa Church Educational System (CES). Kini naglakip sa seminary, nga naghatag og espirituhanon nga pundasyon sa inyong pagkat-on atol sa inyong mga katuigan sa hayskul. Ug kini naglakip sa daghang mga eskwelahan ug mga programa sa Simbahan.
Nakahibalo ba kamo ngano nga ang Simbahan namuhunan pag-ayo og daghang mga kapanguhaan sa edukasyon? Tungod kay ang Ginoo nahigugma kaninyo. Gusto Siya nga kamo magpaduol ngadto Kaniya ug makakaplag og emosyonal, intelektuwal, ug espirituwal nga kalig-on. Ang mga lider sa Simbahan gusto sa samang butang! Kami nag-ampo alang kaninyo ug sa inyong kalamposan. Kami naghatag og kapanguhaan kaninyo ug sa pagtabang kaninyo nga makab-ot ang inyong balaan nga potensyal.
Ang Pagkat-on nga Pulihan ang Kahadlok sa Hugot nga Pagtuo
Sa unsa nga paagi nga ang Ginoo ug ang Iyang Simbahan motabang kaninyo sa inyong dalan sa edukasyon? Usa ka batan-ong lalaki gikan sa Brazil nakat-on nga sila makatabang sa talagsaong mga paagi.
Gibati og kahadlok si Samad sa kolehiyo: “Akong gibati nga kini dili alang kanako,” siya miingon. “Apan ang akong amahan miawhag nako nga mosulay sa BYU–Pathway Worldwide. Nahadlok ko ug wala motuo sa akong kaugalingon, apan ako mihukom nga moapil.”
Sa sinugdanan, si Samad mibati nga napakyas. “Akong gibati nga ako walay nakab-ot bisan unsa,” siya miingon. “Nagkinahanglan ko og kahayag ug paglaom. Ang BYU–Pathway nahimong paglaom alang kanako.”
Si Samad nagsugod sa pagbaton og pagsalig sa iyang kaugalingon ug sa Langitnong Amahan. “Mas daghan akong nakat-onan matag semana, mas maayo ang akong gibati” siya miingon. “Ang pangserbisyo nga mga misyonaryo ug ang mga magtutudlo mipahinumdom nako sa akong mga talento ug mga abilidad. Ang talagsaong mga kurso ug mga istorya sa mga tawo nga nakadawat og mga panalangin nakatabang nako nga moabli sa akong kasingkasing ug mitugot sa Ginoo nga mousab nako alang sa mas maayo.”
Ang pagkawalay paglaom ug kahadlok ni Samad sa umaabot nawala sa matag bag-ong ting-eskwela. “Gusto ko nga mopakigbahin og kasinatian ngadto sa uban kinsa nag-atubang og samang mga kahadlok ug mga kabalaka nga akong gibati,” siya miingon. “Adunay paglaom diha kang Jesukristo. Siya makatabang kaninyo sa inyong edukasyon. Gihimo nako ang unang lakang, ug dili gayod ko magmahay niini.”
Adunay luna alang kaninyo sa bisan unsa nga dalan sa edukasyon nga inyong pilion. Ang Ginoo gusto nga kamo mogamit sa inyong edukasyon sa paghimo og kalainan, ug Siya mogiya kaninyo samtang kamo maningkamot nga makat-on sa inyong tibuok kinabuhi.
Unsa nga mga Oportunidad ang Anaa?
Samtang ang tanang mga programa sa edukasyon sa Simbahan gidisenyo sa pagpaduol ninyo ngadto ni Jesukristo, ang matag usa adunay piho nga gitutokan. Ania ang mga opsiyon nga anaa pinaagi sa Sistema sa Edukasyon sa Simbahan:
-
Ang Institute usa ka kapanguhaan nga gidisenyo sa paghatag og espirituhanon nga komplemento ug usa ka sosyal nga koneksyon sa mga young adult kinsa moeskwela sa dili mga eskwelahan sa Simbahan o wala gayod mag-eskwela.
-
Ang BYU–Pathway Worldwide nagserbisyo sa mga estudyante sa sobra sa 180 ka nasod, nagtabang nila nga makapalig-on og pagsalig sa akademiko nga paagi. Ang mga estudyante makadawat og taas nga kalidad, maabot nga edukasyon bisan asa man sila nagpuyo.
-
Ang Brigham Young University (BYU) sa Provo, Utah, makuti sa akademik, nga mapilion sa mga kinahanglanon sa pagdawat ug nagpunting sa mga programa sa nakagradwar na.
-
Ang BYU–Hawaii adunay mga estudyante gikan sa sobra sa 70 ka nasod, nga nagpokus sa Asya ug Pasipiko.
-
Ang BYU–Idaho adunay importante nga gihatagan og gibug-aton nga moserbisyo sa wala pa makagradwar nga mga estudyante nga adunay mga magtutudlo nga nagtutok sa pagtudlo.
-
Ang Ensign College sa Siyudad sa Salt Lake, Utah, nagtanyag og mga bag-ong mga ideya, puno sa pagtuo ug hands-on nga mga kurso nga gihimo sa pagtabang sa mga estudyante sa dakong bahin sa Utah nga makakuha og mga trabaho.