Malo o Mamalu
O Nai Vaega
O le aoaoga faavae ua faaalia mai o le Ekalesia toefuataiina a Iesu Keriso ua aoao mai ai e faapea, o fanau uma a le Atua—faatasi ma ni tuusaunoaga e matua faatapulaaina ona iloilo iinei—o le a iu ina mautofi i le tasi o malo e tolu o le mamalu, e oo lava i se aupito itiiti lea e “sili mamao atu i lo malamalamaaga uma” [Mataupu Faavae ma Feagaiga 76:89]. …
O se tasi aoaoga faavae ma faiga tulagaese a le Ekalesia toefuataiina, o poloaiga ma feagaiga ua faaalia mai lea o loo ofo atu ai i fanau uma a le Atua le avanoa paia o le faaagavaaina mo le tikeri aupito maualuga o le mamalu i le malo selesitila. O lena taunuuga aupito maualuga—le faaeaga i le malo selesitila—o le taulaiga lea a Le Ekalesia a Iesu Keriso o le Au Paia o Aso e Gata Ai.
… I le mamalu “selesitila” e tolu ona atufola, o lona atufola aupito maualuga o le faaeaga i le malo selesitila. …
O le fuafuaga a le Atua, o loo faavae i luga o upumoni e faavavau, e manaomia ai faapea, o le faaeaga e na o le faamaoni lava i feagaiga o se faaipoipoga e faavavau i le va o se alii ma se tamaitai i le malumalu paia, o lea faaipoipoga o le a i’u ina avanoa ia i latou uma e faamaoni. …
O le Faamasinoga Mulimuli ua lē na o se iloiloga o le aofaiga atoa o amioga lelei ma leaga—o mea ua tatou faia. E faavae i le aafiaga tupito o a tatou faatinoga ma mafaufauga—o tagata ua avea aii tatou. Tatou te agavaa mo le ola e faavavau e ala i se faagasologa o le liua. …
Ona o Iesu Keriso ma Lana Togiola, a tatou sese i lenei olaga, e mafai ona tatou salamo ma toe foi i le ala o feagaiga lea e tau atu i le mea e finagalo ai lo tatou Tama Faalelagi mo i tatou.