E Matua Tele Atu Lo Outou Olioli
O Nai Vaega
O le asō, ou te talanoa atu ai i le toatele o tagata matutua ua i ai tomai faapitoa i le Ekalesia, o ē e mafai ona avea o ni faifeautalai. O loo manaomia oe e le Alii. …
A o o’u asiasi atu i misiona i le salafa o le lalolagi, ua ou vaai i le galuega ofoofogia a la tatou anoano o faifeautalai matutua. Ua manino lo latou fiafia e faia “le finagalo o le Alii” ma le femaliua’i e faia “le pisinisi a le Alii” [Mataupu Faavae ma Feagaiga 64:29]. …
Ua tele ulugalii na ou valaauina e auauna atu ma ua matauina a o faatumulia e le Malamalama o Keriso o latou foliga. I lo latou toe taliu mai na latou faamatalaina ai lo latou latalata atili i le Alii ma le tasi i le isi, lagonaina le Agaga o le Alii o liligi ifo i o latou luga, ma le iloa ua latou faia se eseesega. O ai sē o le a lē mana’o i lena mea? …
I le avea ai ma se Aposetolo a le Alii o Iesu Keriso, ou te valaaulia oe ia e auauna atu o se faifeautalai i le faapotopotoina o Isaraelu ma atonu e toe auauna foi i se isi misiona. …
Ou te folafola atu foi a e auauna atu, o le a e lagonaina le alofa o le Alii i lou olaga, o le a e iloa o Ia, o le a Ia silafia oe, ma “o le a tele lou olioli” [Mataupu Faavae ma Feagaiga 18:15]. O lau auaunaga tuuto atu ia Iesu Keriso o le a musuia ma faamanuia ai lou aiga, o fanau a lau fanau, ma fanau a fanau. “O [le a] faateleina le filemu po o le manuia, ma le alofa” [Iuta 1:2] i o latou olaga mo tausaga a sau.