I Le Ala o Lo Latou Tiute
O Nai Vaega
Ou te faafetai mo le faitau miliona o tagata o le Ekalesia i nei aso ua o mai i le Faaola ma fetaomi atu i luma i luga o le ala o feagaiga. … O le malosi o lo outou faatuatua i le Tama Faalelagi ma le Alii o Iesu Keriso atoa ai ma o outou soifuaga faatauvaa ma faapaiaina ua uuna’ia ai a’u ina ia avea ma se tagata ma se soo lelei atu.
Ou te alofa ia te outou. Ou te faamemelo ia te outou. Ou te faafetai atu ia te outou. Ma ou te faamālō atu ia te outou.
O se faamatalaga a Samuelu le sa Lamana i le Tusi a Mamona ua sili ona taāofa’i ai o’u lagona mo outou.
“Faauta o le vaega tele o i latou ua i ai i le ala o lo latou tiute … ma o loo latou taumafai ma le filiga e le faavaivai ina ia mafai ona latou aumai o e o totoe o o latou uso i le malamalama o le upumoni” [Helamana 15:5–6; ua faaopoopo le faamamafa]. …
Tou te alolofa ma auauna atu, faalogo ma aoao, popole ma faamafanafana atu, ma aoao atu ma molimau atu i le mana o le Agaga Paia. Tou te anapopogi ma tatalo soo, ma sa faasolo malolosi ma atili malolosi ai i le lotomaualalo, ma tuputupu a’e ma le mausali ma atili mausali ai i le faatuatua ia Keriso, “seia oo ina faatutumuina o [outou] agaga i le olioli ma le faamafanafanaga, ioe, seia oo ina faamamāina ma faapaiaina o [outou] loto, o le faapaiaga lea e oo mai ona o … [le] tuuina atu o o [outou] loto i le Atua” [Helamana 3:35].
… O outou i aso nei o ē o loo fetaōmi atu i luma i le ala o lo outou tiute, o le malosi’aga lea o le Ekalesia toefuata’iina a le Faaola. Ma e pei ona folafola mai le Alii, “o nofoalii ma malo, itumalo ma mana uma, o le a faaali ma tuu mai i luga o i latou uma o e na tumau ma le lototoa mo le talalelei a Iesu Keriso” [Mataupu Faavae ma Feagaiga 121:29].