Uso e ma Tuafafine ia Keriso
O Nai Vaega
Ua aoao mai e le talalelei a Iesu Keriso e faapea o i tatou uma o ni atalii ma ni afafine agaga na fanaua e ni matua faalelagi o ē alolofa moni ia i tatou ma sa tatou ola o se aiga i le afioaga o le Atua ae tatou te le’i fananau mai i lenei lalolagi. Ua aoao mai foi i tatou e le talalelei e faapea na foafoaina i tatou uma i le faatusa ma foliga o le Atua. O le mea lea, ua tatou tutusa ai i Ona luma. …
O le avea ai o ni soo o Keriso, ua valaaulia i tatou e faateleina lo tatou faatuatua i, ma le alofa mo, lo tatou uso faaleagaga ma le usoga faaletuafafine e ala i le lalagaina moni faatasi o o tatou loto i le lotogatasi ma le alofa, tusa lava po o a o tatou eseesega, ona faateleina ai lea o lo tatou tomai e faalauiloa le faaaloalo mo le mamalu o atalii ma afafine uma o le Atua. …
… E leai se avanoa mo mafaufauga po o faatinoga faailoga tagata i le nuu o le Au Paia. …
Talosia ia tatou faaogatusa o tatou loto ma mafaufau ma le malamalama ma molimau e faapea, e tutusa i tatou uma i luma o le Atua, ua faaeeina atoatoa i tatou uma i le gafatia e tasi ma le tofi e faavavau. Talosia ia tatou olioli atili i le sootaga faaleagaga o loo i ai i lo tatou va ma faatauaina uiga faaleatua ma meaalofa eseese ua ia i tatou uma. …
Ou te molimau atu ia te outou a faaauau ona tatou ola ai i le ala lea i lo tatou olaga faitino, o le a amata se aso fou ma se sulu fou lea o le a faamalamalamaina ai o tatou olaga ma suluia ia avanoa matagofie e faataua atili, ma ia faamanuiaina atili ai i le eseese na foafoaina e le Atua i Ana fanau. O le a avea moni i tatou ma meafaigaluega i Ona aao e faalauiloa le faaaloalo ma le mamalu i Ona atalii ma afafine uma.