O Le Faamaumau Oa ma le Ala E Tau Atu i le Aiga
O Nai Vaega
O Le Toe Foi Mai o le Atalii Faamaumau Oa, saunia e Richard Burde
O i ai se tasi o tatou e le’i tuua le ala o le paia, ma mafaufau faavalevalea e mafai ona tatou maua le fiafia tele atu i lo tatou o i o tatou lava ala manatu faapito?
E i ai se tasi o i tatou e le’i lagonaina le lotomaualalo, lotonutimomoia, ma naunau mo le faamagaloga ma le alofa mutimutivale?
Atonu na o tatou tomanatu, “Mata ea e mafai ona toe fo’i? Pe o le a faia pea ma o’u pona e faavavau, teena, ma faaesea e a’u uo muamua? Pe sili ea le nofo leiloa ai pea? Mata o a ni tāga a le Atua pe afai ou te taumafai e toefo’i atu?”
[O le] faataoto [a le atalii faamaumau oa] ua aumaia ai ia i tatou le tali.
O le a tamo’e mai lo tatou Tama Faalelagi ia i tatou, ua faatumulia Lona finagalo i le alofa ma le agalelei. …
O le a olioli le lagi i lo tatou toefo’i mai. …
E ui atonu o filifiliga ua aveese mamao ai oe mai le Faaola ma Lana Ekalesia, ae o loo tu le Foma’i Sili o le Faamalologa i le auala e tau atu i le fale, e talileleia oe. Ma o i tatou o tagata o le Ekalesia a Iesu Keriso, e saili ia mulimuli i Lana faataitaiga ma opoina oe o ni o tatou uso ma tuafafine, o ni a tatou uo. Tatou te olioli ma fiafia faatasi ma oe. …
Ou te le faafoliga faapea o le toe fo’i mai o se mea e faigofie ona fai. E mafai ona ou molimau atu i lena mea. Atonu, o le mea moni, o le filifiliga aupito fefeu lea o le a e faia.
Ae ou te molimau atu o le taimi lava e tonu ai ia te oe e toefo’i mai ma savali i le ala o lo tatou Faaola ma le Togiola, o le a ulufale atu Lona mana i lou olaga ma o le a mafai ona suia oe.