Vaaia o le Aiga o le Atua e ala i Tioata Vaaiga Aoao
O Nai Vaega
Pe mafai ea ona amata vaai e pei ona silasila le Atua e tusa lava pe o ola ai i lenei paneta—ia lagona lenei faalogona o le vaaiga aoao ? Ou te talitonu tatou te mafaia, e ala i le mata o le faatuatua, e vaai mamao ai ma vaai ai ia i tatou lava ma o tatou aiga i le faamoemoe ma le olioli. …
… Ona o Keriso, e lelei ai mea uma. O mea uma o loo faapopoleina ai oe ma oe ma oe o le a LELEI lava mea uma! Ma o i latou o e vaai atu ma se mata o le faatuatua e mafai ona lagona o le a LELEI mea uma i le taimi nei. …
O nisi taimi o mea tatou te manaomia o le faateleina o le loto malamalama nai lo fautuaga; ia faateleina le faalogo nai lo se lauga. …
Sei o tatou vaai mamao atu e tagai ai i sootaga faaleaiga e fai ma auala mamana e aoao ai i tatou i lesona na tatou o mai iinei e aoao ai ao tatou liliu atu i le Faaola.
Tatou te ioeina, i se lalolagi pa’u, e leai se auala e avea ai ma se toalua, matua, atalii po o se afafine, fanau a se fanau, faufautua, po o se uo atoatoa—ae e faitau miliona auala e avea ai ma se tagata lelei. …
I nei aso e gata ai, atonu o la tatou galuega aupito silisili o le i ai faatasi ma ē pele ia i tatou—o tagata lelei o loo ola i se lalolagi amioleaga. O lotatou faamoemoe e suia ai le ala latou te vaai ai ia i latou lava ma tagata moni ua avea ai i latou. Ma e ala i lenei tioata o le alofa o le a latou vaai ai i le tagata o le a avea ai i latou. …
Ma talu ai o i tatou o fanau o le feagaiga, e mafai ona tatou talosaga mo lenei lagona o le faamoemoe i le taimi nei! …
O le alofa o le mea lea e suia loto. O le mafuaaga aupito mama lea o mafuaaga uma, ma e mafai e isi ona lagonaina. … E mautinoa lava, o i latou e sili ona alolofa ma umi ona alolofa atu e manumalo! …
O oe ma a’u? E mafai ona tatou faia lenei mea! E mafai ona tatou pipiimau ma faamoemoe pea!