Sefuluai: Toina Mai o Pupuni o le Lagi
O Nai Vaega
O a tatou mea uma o i ai ma o tatou tagata uma, e mai le Atua. I le avea ai ma soo o Keriso, tatou te fefaasoaa’i ma le naunauta’i ma i latou o siomia i tatou.
O mea uma e tuuina mai e le Alii ia i tatou, ua Ia poloaiina i tatou e toe faafoi atu ia te Ia ma Lona malo i le lalolagi le 10 pasene o a tatou mea faasili. Ua Ia folafola mai ia i tatou a tatou faamaoni i a tatou sefuluai, o le a Ia “toina … pupuni o le lagi, … ma sasaa atu le manuia mo outou ina seia silisili ona tele” [Malaki 3:10]. Ua Ia folafola mai ia i tatou o le a Ia puipuia i tatou mai le leaga. …
E tele ala e toina ai pupuni o le lagi. O ni isi e faaletino, ae o le tele e faaleagaga. O nisi e ma’ale’ale ma faigofie ona sopoloa ai le vaai. Talitonu i le taimi a le Alii; e oo mai lava e le aunoa faamanuiaga. …
… E talanoa le lalolagi i le sefuluai e faatatau i a tatou tupe, ae o le tulafono paia o le sefuluai i se tulaga autu o se mataupu o lo tatou faatuatua. O le faamaoni i a tatou sefuluai o se tasi lea o auala e faaalia ai lo tatou naunautaiga e faamuamua le Alii i o tatou olaga, i luga atu o o tatou lava naunauga ma fiafiaga. Ou te folafola atu a outou talitonu i le Alii, o le a mulimuli mai faamanuiaga o le lagi. …
O le tamaoaiga faaopoopo o le Alii e aumaia e ala i a outou sefuluai limafoai ua faamalolosia ai tupe faaagaga a le Ekalesia, e maua ai avanoa e faalautele ai le galuega a le Alii e sili atu i lo se isi mea ua tatou iloa. E silafia mea uma e le Alii, ma e oo mai le taimi, o le a tatou vaai ai ua faataunuuina Ona faamoemoega paia uma.