O La Tatou Soa Tumau
O Nai Vaega
Na o Le Toatasi, saunia e Malory Fiso
Matou te manaomia, ma o le a outou manaomia, le mafutaga faifai pea a le Agaga Paia. Ia, tatou te mananao i ai, ae ua tatou iloa mai aafiaga e le faigofie ona ausia. Tatou te taufai mafaufau ma tautatala ma faia mea i o tatou olaga i aso taitasi e mafai ona faatiga ai i le Agaga.
A oo ina tupu lena mea, aua o le a tupu, atonu tatou te lagonaina le lē faamaonia mai le Alii. E ono faaosoosoina foi i tatou ia lagona ua tuua na o i tatou. …
Afai ua faigata ia te oe ona lagonaina le Agaga Paia, atonu e te mafaufau loloto pe i ai lava se mea e tatau ai ona e salamo ma mauaina le faamagaloga. E mafai ona e tatalo ma le faatuatua ina ia iloa le mea e tatau ona faia ina ia faamamaina ai ma ia atili agavaa ai mo le mafutaga faifai pea ma le Agaga Paia.
Afai e te manao e maua le mafutaga ma le Agaga Paia, e tatau ona e manao i ai mo mafuaaga tonu. E tatau ona avea ou faamoemoega ma faamoemoega o le Alii. Afai e manatu faapito tele ou faanaunauga, o le a faigata ia te oe ona mauaina ma lagonaina uunaiga a le Agaga.
O le ki mo a’u ma mo oe o le manao lea i mea e finagalo ai le Faaola. O ō tatou faanaunauga e tatau ona faaosofia e le alofa mama o Keriso. …
… E auina atu le Agaga Paia i tagata faamaoni o le feagaiga o le Ekalesia a Iesu Keriso. Ia, o le a tulaga ese ou aafiaga, ma o le a taialaina e le Agaga i le ala e sili ona fetaui lelei i lou faatuatua ma le gafatia e maua ai faaaliga mo oe ma mo i latou e te alofa ma auauna i ai. Ou te tatalo ma lo’u loto atoa ina ia faatupulaia lou talitonuga mautu.